Wycliffe Bible

1 Samuel 17

The armies of the Israelites and Philistines being ready to battle,

1 Samuel 17:1 Forsothe Filisteis gaderiden her cumpenyes in to batel, and camen togidere in Socoth of Juda, and settiden tentis bitwixe Socoth and Azecha, in the coostis of Domyn. 1 Samuel 17:2 Sotheli Saul and the men of Israel weren gaderid, and camen in to the valey of Terebynte, and dressiden scheltrun to fiyte ayens Filisteis. 1 Samuel 17:3 And Filisteis stoden aboue the hil on this part, and Israel stood on the hil on the tother part of the valey, that was bitwixe hem.

Goliath cometh proudly forth to challenge a combat.

1 Samuel 17:4 And a man, sone of a widewe, whos fadir was vncerteyn, yede out of the castels of Filisteis, Goliath bi name of Geth, of sixe cubitis heiy and a spanne; 1 Samuel 17:5 and a brasun basynet on his heed; and he was clothid with an haburioun hokid, ether mailid; forsothe the weiyte of his haburioun was fyue thousynde siclis of bras; 1 Samuel 17:6 and he hadde bootis of bras in the hipis, and a scheld of bras hilide hise schuldris. 1 Samuel 17:7 Forsothe the schaft of his spere was as the beem of webbis; forsothe thilke yrun of his spere hadde sixe hundrid siclis of yrun; and his squier yede bifor hym. 1 Samuel 17:8 And he stood, and cried ayens the cumpenyes of armed men of Israel, and seide to hem, Why camen ye redi to batel? Whether Y am not a Filistei, and ye ben the seruauntis of Saul? Chese ye a man of you, and come he doun to syngulere batel; 1 Samuel 17:9 if he may fiyte with me, and sleeth me, we schulen be seruauntis to you; forsothe if Y haue the maystry, and sle hym, ye schulen be boonde, and ye schulen serue vs. 1 Samuel 17:10 And the Filistei seide, Y haue seyd schenschip to dai to the cumpenyes of Israel; yyue ye a man, and bigynne he synguler batel with me. 1 Samuel 17:11 Sotheli Saul and alle men of Israel herden siche wordis of the Filistey, and thei weren astonyed, and dredden greetli.

David, sent by his father to visit his brethren, taketh the challenge.

1 Samuel 17:12 Forsothe Dauid was the sone of a man of Effrata, of whom it is biforseid, of Bethleem of Juda, to which man the name was Isay, which hadde eiyte sones; and the man was eld in the daies of Saul, and of greet age among men. 1 Samuel 17:13 Sotheli thre grettere sones of Ysai yeden after Saul in to batel; and the names of hise thre sones, that yeden to batel, Heliab, the firste gendryd, and the secounde, Amynadab, and the thridde, Samma. 1 Samuel 17:14 Forsothe Dauid was the leeste. Therfor while thre grettere sueden Saul, Dauid yede, 1 Samuel 17:15 and turnede ayen fro Saul, that he schulde kepe the floc of his fadir in Bethleem. 1 Samuel 17:16 Forsothe the Filistey cam forth in the morewtid, and euentid; and stood bi fourti daies. 1 Samuel 17:17 Sotheli Ysai seide to Dauid his sone, Take thou to thi britheren meete maad of meele, the mesure of ephi, and these ten looues, and renne thou in to the castels to thi britheren; 1 Samuel 17:18 and thou schalt bere to the tribune these ten litil formes of chese; and thou schalt visite thi britheren, whether thei doon riytli, and lurne thou, with whiche men thei ben ordeyned. 1 Samuel 17:19 Forsothe Saul, and thei, and alle the sones of Israel in the valei of Terebynte fouyten ayens Filisteis.

1 Samuel 17:20 Therfor Dauid roos eerli, and bitook the floc to the kepere, and he yede chargid, as Ysai hadde comaundid to hym; and he cam to the place Magala, and to the oost, which oost yede out to the batel, and criede in the batel. 1 Samuel 17:21 For Israel hadde dressid scheltrun; but also Filisteis weren maad redi euen ayens. 1 Samuel 17:22 Therfor Dauid lefte the vessels, whiche he hadde brouyt, vndur the hond of a kepere at the fardels, and he ran to the place of batel, and he axyde, if alle thingis weren doon riytli anentis hise britheren. 1 Samuel 17:23 And whanne he spak yit to hem, thilke bastard apperide, Goliath bi name, a Filistei of Geth, and stiede fro the castels of Filisteis; and while he spak these same wordis, Dauid herde. 1 Samuel 17:24 And whanne alle men of Israel hadden seyn the man, thei fledden fro his face, and dredden hym greetli. 1 Samuel 17:25 And ech man of Israel seide, Whether thou hast seyn this man that stiede? for he stiede to seie schenship to Israel; therfor the kyng schal make riche with greet richessis the man that sleeth thilke Filistei; and the kyng schal yyue his douyter to that man, and schal make the hows of his fader with out tribut in Israel. 1 Samuel 17:26 And Dauyd spak to the men that stoden with hym, and seide, What schal be youun to the man that sleeth this Filistei, and doith awei schenschip fro Israel? for who is this Filistei vncircumcidid, that dispiside the scheltruns of God lyuynge? 1 Samuel 17:27 Forsothe the puple tolde to hym the same word, and seide, These thingis schulen be youun to the man that sleeth hym.

Eliab chideth him.

1 Samuel 17:28 And whanne Heliab, his more brother, had herd this, while he spak with othere men, he was wrooth ayens Dauid, and seide, Whi camest thou, and whi leftist thou tho fewe scheep in deseert? Y knowe thi pride, and the wewardnesse of thin herte; for thou camest doun to se the batel. 1 Samuel 17:29 And Dauid seide, What haue Y do? Whether it is not a word?

He is brought to Saul.

1 Samuel 17:30 And Dauid bowide a litil fro hym to another man; and Dauid seide the same word, and the puple answeride to hym al word as bifore. 1 Samuel 17:31 Forsothe these wordis weren herd, whiche Dauid spak, and weren teld in the siyt of Saul.

He sheweth the reason of his confidence.

1 Samuel 17:32 And whanne Dauyd was brouyt to Saul, Dauyd spak to hym, The herte of ony man falle not doun for that Filistei, Y thi seruaunt schal go, and Y schal fiyte ayens the Filistei. 1 Samuel 17:33 And Saul seide to Dauid, Thou maist not ayenstonde this Filistei, nether fiyte ayens hym, for thou art a child; forsothe this man is a werriour fro his yong wexynge age. 1 Samuel 17:34 And Dauid seide to Saul, Thi seruaunt kepte the floc of his fadir, and a lioun cam, ether a bere, and took awei a ram fro the myddis of the floc; 1 Samuel 17:35 Y pursuede, and killide hem, and rauyschide fro the mouth of hem; and thei risiden ayens me, and I took the nether chaule of hem, and Y stranglide, and killide hem. 1 Samuel 17:36 For Y thi seruaunt killide bothe a lioun and a bere; therfor and this Filistei vncircumcidid schal be as oon of hem. Now Y schal go, and Y schal do awey the schenschip of the puple; for who is this Filistei vncircumcidid, that was hardi to curse the oost of God lyuynge? 1 Samuel 17:37 And Dauid seide, The Lord that delyuerede me fro the mouth of the lioun, and fro the hond, that is, power, of the bere, he schal delyuere me fro the hond of this Filistei. Forsothe Saul seide to Dauid, Go thou, and the Lord be with thee.

Without armour, armed with faith, he slayeth the giant.

1 Samuel 17:38 And Saul clothide Dauid with hise clothis, and puttide a brasun basynet on his heed, and clothide hym with an haburioun. 1 Samuel 17:39 Therfor Dauid was gird with his swerd on his cloth, and bigan to asaie if he myyte go armed; for he hadde not custom. And Dauid seide to Saul, Y may not go so, for Y haue not vss. And Dauid puttide awei tho, 1 Samuel 17:40 and he took his staaf, which he hadde euere in the hondis. And he chees to hym fyue clereste stonys, that is, harde, pleyn, and rounde, of the stronde; and he sente tho in to the schepherdis scrippe, which he hadde with hym; and he took the slynge in the hond, and yede forth ayens the Filistei. 1 Samuel 17:41 Sotheli the Filistei yede, goynge and neiyyng ayens Dauid; and his squyer yede bifor hym. 1 Samuel 17:42 And whanne the Filistei hadde biholde Dauid, and hadde seyn hym, he dispiside Dauid; forsothe Dauid was a yong wexynge man, rodi, and feir in siyt. 1 Samuel 17:43 And the Filistei, seide to Dauid, Whether Y am a dogge, for thou comest to me with a staf? And the Filistei curside Dauid in hise goddis; and he seide to Dauid, 1 Samuel 17:44 Come thou to me, and Y schal yyue thi fleischis to the volatilis of heuene, and to the beestis of erthe. 1 Samuel 17:45 Sotheli Dauid seide to the Filistei, Thou comest to me with swerd, and spere, and scheeld; but Y come to thee in the name of the Lord God of oostis, of God of the cumpanyes of Israel, to whiche thou seidist schenschip to dai. 1 Samuel 17:46 And the Lord schal yyue thee in myn hond, and Y schal sle thee, and Y schal take awey thin heed fro thee; and I schal yyue the deed bodies of the castels of Filisteis to day to the volatils of heuene, and to the beestis of erthe; that al the erthe wite, that the Lord God is in Israel, 1 Samuel 17:47 and that al this chirche knowe, that the Lord saueth not in swerd nether in spere; for the batel is his, and he schal bitake you in to oure hondis. 1 Samuel 17:48 Therfor whanne the Filistei hadde rise, and cam, and neiyede ayens Dauid, Dauid hastide, and ran to batel ayens the Filistei. 1 Samuel 17:49 And Dauid putte his hond in to his scrippe, and he took o stoon, and he castide with the slynge, and ledde aboute, and smoot the Filistei in the forheed; and the stoon was fastned in his forheed, and he felde doun in to his face on the erthe. 1 Samuel 17:50 And Dauid hadde the maistrie ayens the Filistei in a slyng and stoon, and he killide the Filistei smytun. And whanne Dauid hadde no swerd in the hond, 1 Samuel 17:51 he ran, and stood on the Filistei, and took his swerd; and Dauid drow out the swerd of his schethe, and killide him, and kittide awei his heed. Forsothe the Filisteis sien, that the strongeste of hem was deed, and thei fledden. 1 Samuel 17:52 And the sones of Israel and of Juda risiden to gidere, and crieden, and pursueden Filisteis, til the while thei camen in to the valei, and til to the yate of Accaron. And woundid men of Filisteis felden in the weye of Sarym, and til to Geth, and til to Accaron. 1 Samuel 17:53 And the sones of Israel turneden ayen, aftir that thei hadden pursuede Filisteis, and thei assailiden the tentis of hem. 1 Samuel 17:54 Forsothe Dauid took the heed of the Filistei, and brouyte it in to Jerusalem; sotheli he puttide hise armeris in the tabernacle of the Lord.

Saul taketh notice of David.

1 Samuel 17:55 Forsothe in that tyme in which Saul siy Dauid goynge out ayens the Filistei, he seide to Abner, prince of his chiualrie, Abner, of what generacioun cam forth this yong waxynge man? And Abner seide, Kyng, thi soule lyueth, I knowe not. 1 Samuel 17:56 And the kyng seide, Axe thou, whos sone this child is. 1 Samuel 17:57 And whanne Dauid hadde come ayen, whanne the Filistei was slayn, Abner took Dauid, and brouyte hym in, hauynge in the hond the heed of the Filistei, bifor Saul. 1 Samuel 17:58 And Saul seide to hym, Of what generacioun art thou, yong waxynge man? And Dauid seide, Y am the sone of thi seruaunt, Isai of Bethleem.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!