1 Samuel 31
Saul having lost his army, and his sons slain, he and his armourbearer kill themselves.
1 Samuel 31:1 Forsothe Filisteis fouyten ayens Israel, and the men of Israel fledden bifor the face of Filisteis, and felden slayn in the hil of Gelboe. 1 Samuel 31:2 And Filisteis hurliden on Saul, and on hise sones, and smytiden Jonathas, and Amynadab, and Melchisua, sones of Saul. 1 Samuel 31:3 And al the weiyte of batel was turned in to Saul; and men archeris pursueden hym, and he was woundid greetli of the archeris. 1 Samuel 31:4 And Saul seide to his squyer, Drawe out thi swerd, and sle me, lest perauenture these vncircumcidid men come, and sle me, and scorne me. And his squyer nolde, for he was aferd bi ful grete drede; therfor Saul took his swerd, and felde theronne. 1 Samuel 31:5 And whanne his squyer hadde seyn this, that is, that Saul was deed, also he felde on his swerd and was deed with hym. 1 Samuel 31:6 Therfor Saul was deed, and hise thre sones, and his squyer, and alle his men in that dai togidere.
The Philistines possess the forsaken towns of the Israelites.
1 Samuel 31:7 Forsothe the sones of Israel, that weren biyendis the valei, and biyendis Jordan, sien that the men of Israel hadden fled, and that Saul was deed, and hise sones, and thei leften her citees and fledden; and Filisteis camen, and dwelliden there.
They triumph over the dead carcases.
1 Samuel 31:8 Forsothe in the tother dai maad, Filisteis camen, that thei schulden dispuyle the slayn men, and thei founden Saul, and hise thre sones, liggynge in the hil of Gelboe; and thei kittiden awei the heed of Saul, 1 Samuel 31:9 and dispuyliden hym of armeris; and senten in to the lond of Filisteis bi cumpas, that it schulde be teld in the temple of idols, and in the puplis. 1 Samuel 31:10 And thei puttiden hise armeris in the temple of Astoroth; sotheli thei hangiden his bodi in the wal of Bethsan.
They of Jabesh-gilead, recovering the bodies by night, burn them at Jabesh, and mournfully bury their bones.
1 Samuel 31:11 And whanne the dwellers of Jabes of Galaad hadden herd this, what euer thingis Filisteis hadden do to Saul, 1 Samuel 31:12 alle the strongeste men risiden, and yeden in al that nyyt, and token the deed bodi of Saul, and the deed bodies of hise sones fro the wal of Bethsan; and the men of Jabes of Galaad camen, and brenten tho deed bodies bi fier. 1 Samuel 31:13 And thei token the boonus of hem, and birieden in the wode of Jabes, and fastiden bi seuene daies.