2 Kings 20
Hezekiah, having received a message of death, by prayer hath his life lengthened.
2 Kings 20:1 In tho daies Ezechie was sijk til to the deeth; and Isaie, the prophete, sone of Amos, cam to hym, and seide to hym, The Lord God seith these thingis, Comaunde to thin hows, for thou schalt die, and thou schalt not lyue. 2 Kings 20:2 Which Ezechie turnyde his face to the wal, and worschipide the Lord, and seide, 2 Kings 20:3 Y biseche, Lord, haue mynde, hou Y yede bifor thee in treuthe, and in a parfit herte, and Y dide that, that was plesaunt bifor thee. Therfor Ezechie wepte bi greet wepyng. 2 Kings 20:4 And bifor that Ysaie yede out half the part of the court, the word of the Lord was maad to Isaie, and seide, 2 Kings 20:5 Turne thou ayen, and seie to Ezechie, duyk of my puple, The Lord God of Dauid, thi fadir, seith thes thingis, Y herde thi preiere, and Y siy thi teer, and, lo! Y heelide thee. In the thridde dai thou schalt stie in to the temple of the Lord, 2 Kings 20:6 and Y schal adde fiftene yeer to thi daies; but also Y schal delyuere thee and this citee fro the hond of the kyng of Assiriens, and Y schal defende this citee for me, and for Dauid, my seruaunt. 2 Kings 20:7 And Ysaie seide, Brynge ye to me a gobet of figis. And whanne thei hadden brouyte it, and hadde putte on his botche, he was heelid.
The sun goeth ten degrees backward for a sign of that promise.
2 Kings 20:8 Forsothe Ezechie seide to Isaie, What schal be the signe, that the Lord schal heele me, and that in the thridde dai Y schal stie in to the temple of the Lord? 2 Kings 20:9 To whom Ysaie seide, This schal be a signe of the Lord, that the Lord schal do the word which he spak; wolt thou, that the schadewe stie by ten lynes, ethir turne ayen bi so many degrees? 2 Kings 20:10 And Ezechie seide, It is esy that the schadewe encreesse bi ten lynes, nethir Y wole that this be doon, but that it turne ayen bacward bi ten degrees. 2 Kings 20:11 Therfor Ysaie, the prophete, clepide inwardli the Lord, and brouyte ayen bacward bi ten degrees the schadewe bi lynes, bi whiche it hadde go doun thanne in the orologie of Achaz.
Berodach-baladan, sending to visit Hezekiah because of the wonder, hath notice of his treasures.
2 Kings 20:12 In that tyme Beradacbaladan, sone of Baladam, the kyng of Babiloyne, sente lettris and yiftis to Ezechie; for he hadde herd that Ezechie was sijk, and hadde couerid. 2 Kings 20:13 Forsothe Ezechie was glad in the comyng of hem, and he schewide to hem the hows of spyceries, and gold, and siluer, and dyuerse pymentis, also oynementis, and the hows of hise vessels, and alle thingis whiche he myyte haue in hise tresouris; no word was, which Ezechie schewide not to hem in his hows, and in al his power.
Isaiah understanding thereof foretelleth the Babylonian captivity.
2 Kings 20:14 Sotheli Ysaie, the prophete, cam to the kyng Ezechie, and seide to hym, What seiden these men, ether fro whennus camen thei to the? To whom Ezechie seide, Thei camen to me fro a fer lond, fro Babiloyne. 2 Kings 20:15 And he answeride, What sien thei in thin hows? Ezechie seide, Thei sien alle thingis, what euer thingis ben in myn hows; no thing is in my tresouris, which Y schewide not to hem. 2 Kings 20:16 Therfor Isaie seide to Ezechie, Here thou the word of the Lord. 2 Kings 20:17 Lo! dayes comen, and alle thingis that ben in thin hows, and whiche thingis thi fadris maden til in to this dai, schulen be takun awey into Babiloyne; not ony thing schal dwelle, seith the Lord. 2 Kings 20:18 But also of thi sones, that schulen go out of thee, whiche thou schalt gendere, schulen be takun, and thei schulen be geldyngis in the paleis of the king of Babiloyne. 2 Kings 20:19 Ezechie seide to Isaie, The word of the Lord, which he spak, is good; ooneli pees and treuthe be in my daies.
Manasseh succeedeth Hezekiah.
2 Kings 20:20 Forsothe the residue of wordis of Ezechie, and al his strengthe, and hou he made a cisterne, and a watir cundijt, and brouyte watris, in to the citee, whether these ben not writun in the book of wordis of daies of the kyngis of Juda? 2 Kings 20:21 And Ezechie slepte with hise fadris, and Manasses, his sone, regnyde for hym.