2 Kings 25
Jerusalem is besieged.
2 Kings 25:1 Forsothe it was don in the nynthe yeer of his rewme, in the tenthe moneth, in the tenthe dai of the moneth, Nabugodonosor, kyng of Babiloyne, cam, he, and al his oost, in to Jerusalem; and thei cumpassiden it, and bildiden stronge thingis in the cumpass therof. 2 Kings 25:2 And the citee was closid, and cumpassid, til to the eleuenthe yeer of king Sedechie, 2 Kings 25:3 in the nynthe day of the monethe; and hungur hadde maistrie in the citee, and breed was not to the puple of the lond.
Zedekiah taken, his sons slain, his eyes put out.
2 Kings 25:4 And the citee was brokun, and alle men werriours fledden in the niyt bi the weie of the yate, which is bitwixe the double wal, to the gardyn of the kyng; sotheli Caldeis bisegiden the citee bi cumpas. Therfor Sedechie fledde bi the weie that ledith to the feeldi placis of the wildirnesse; 2 Kings 25:5 and the oost of Caldeis pursuede the king, and it took him in the pleyn of Jerico; and alle the werriours, that weren with him, weren scaterid, and leften him. 2 Kings 25:6 Therfor thei ledden the king takun to the king of Babiloyne, in to Reblatha, which spak dom with him, that is, with Sedechie. 2 Kings 25:7 Sotheli he killide the sones of Sedechie bifor him, and puttide out his iyen, and boond him with chaynes, and ledde him in to Babiloyne.
Nebuzar-adan defaceth the city, carrieth the remnant, except a few poor labourers, into captivity,
2 Kings 25:8 In the fifthe monethe, in the seuenthe dai of the monethe, thilke is the nyntenthe yeer of the king of Babiloyne, Nabuzardan, prince of the oost, seruaunt of the king of Babiloyne, cam in to Jerusalem; 2 Kings 25:9 and he brente the hows of the Lord, and the hows of the king, and the housis of Jerusalem, and he brente bi fier ech hows; 2 Kings 25:10 and al the oost of Caldeis, that was with the prince of knyytis, distriede the wallis of Jerusalem in cumpas. 2 Kings 25:11 Forsothe Nabuzardan, prince of the chyyualrie, translatide the tother part of the puple, that dwellide in the citee, and the fleeris, that hadden fled ouer to the king of Babiloyne, and the residue comyn puple; 2 Kings 25:12 and he lefte of the pore men of the lond vyntilieris, and erthe tilieris.
spoileth and carrieth away the treasures.
2 Kings 25:13 Sotheli Caldeis braken the brasun pilers, that weren in the temple, and the foundementis, and the see of bras, that was in the hous of the Lord; and thei translatiden al the metal in to Babiloyne. 2 Kings 25:14 And thei token the pottis of bras, and trullis, and fleisch hokis, and cuppis, and morteris, and alle brasun vessels, in whiche thei mynystriden; 2 Kings 25:15 also and censeris, and violis. The prince of the chyualrie took tho that weren of gold, and tho that weren of siluer, 2 Kings 25:16 that is, twei pileris, o see, and the foundementis, whiche king Salomon hadde maad in to the temple of the Lord; and no weiyte was of metal of alle the vessels. 2 Kings 25:17 O piler hadde eiyten cubitis of hiyte, and a brasun pomel on it of the heiyte of thre cubitis, and a werk lijk a net, and pomgarnadis on the pomel of the piler, alle thingis of bras; and the secounde piler hadde lijk ournyng.
The nobles are slain at Riblah.
2 Kings 25:18 Also the prince of the chyualrie took Saraie, the firste preest, and Sophony, the secunde prest, 2 Kings 25:19 and thre porteris, and oon onest seruaunt of the citee, that was a souereyn ouer men werriours, and fyue men of hem that stoden bifor the king, whiche he foond in the citee; and he took Sopher, the prince of the oost, that preuide yonge knyytis, ether men able to batel, of the puple of the lond, and sixe men of the comyns, that weren foundyn in the citee; 2 Kings 25:20 whiche Nabuzardan, prince of the chyualrie, took, and ledde to the king of Babiloyne, in to Reblatha. 2 Kings 25:21 And the kyng of Babiloyne smoot hem, and killide hem in Reblatha, in the lond of Emath; and Juda was translatid fro his lond.
Gedaliah, who was set over them that remained, being slain, the rest flee into Egypt.
2 Kings 25:22 Sotheli he made souereyn Godolie, sone of Aicham, sone of Saphan, to the puple that was left in the lond of Juda; which puple Nabugodonosor, king of Babiloyne, hadde left. 2 Kings 25:23 And whanne alle the duykis of knyytis hadde herd these thingis, thei, and the men that weren with hem, that is, that the king of Babiloyne hadde ordeyned Godolie, thei camen to Godolie, in Maspha, Ismael, sone of Nathanye, and Johannan, sone of Charee, and Saraie, sone of Thenameth of Nechophat, and Jeconye, sone of Machati, thei, and Machat, and the felowis of hem. 2 Kings 25:24 And Godolie swoor to hem, and to the felowis of hem, and seide, Nyle ye drede to serue the Caldeis; dwelle ye in the lond, and serue ye the king of Babiloyne, and it schal be wel to you. 2 Kings 25:25 Forsothe it was don in the seuenthe monethe, that is, sithen Godolie was maad souereyn, Hismael, the sone of Nathanye, sone of Elysama, of the kyngis seed, cam, and ten men with hym, and thei smytiden Godolie, which diede; but also thei smytiden Jewis and Caldeis, that weren with hym in Maspha. 2 Kings 25:26 And al the puple roos fro litil til to greet, and the prynces of knyytis, and camen in to Egipt, and dredden Caldeis.
Evil-merodach advanceth Jehoiachin in his court.
2 Kings 25:27 Therfor it was doon in the seuenthe and threttithe yeer of transmigracioun, ether passyng ouer, of Joakyn, kyng of Juda, in the tweluethe monethe, in the seuene and twentithe dai of the monethe, Euylmeradach, kyng of Babiloyne, in the yeer in which he bigan to regne, reiside the heed of Joakyn, kyng of Juda, 2 Kings 25:28 fro prisoun, and spak to hym benygneli; and he settide the trone of Joakyn aboue the trone of kyngis, that weren with hym in Babilonye. 2 Kings 25:29 And he chaungide hise clothis, whiche he hadde in prisoun; and he eet breed euer in the siyt of Euylmeradach, in alle the daies of his lijf. 2 Kings 25:30 Also Euylmeradach ordeynede sustenaunce to hym with out ceessyng; which sustenaunce also was youun of the kyng to hym bi alle daies, and in alle the daies of his lijf.