2 Samuel 15
Absalom, by fair speeches and courtesies, stealeth the hearts of Israel.
2 Samuel 15:1 Therfor aftir these thingis Absolon made a chaar to hym, and knyytis, and fifti men, that schulden go bifor hym. 2 Samuel 15:2 And Absolon roos eerli, and stood bisidis the entryng of the yate in the weie; and Absolon clepide to hym ech man, that hadde a cause that he schulde come to the doom of the kyng, and Absolon seide, Of what citee art thou? Which answeride, and seide, Of o lynage of Israel Y am, thi seruaunt. 2 Samuel 15:3 And Absolon answeride to hym, Thi wordis semen to me good and iust, but noon is ordeyned of the kyng to here thee. And Absolon seide, Who schal ordeyne me iuge on the lond, 2 Samuel 15:4 that alle men that han cause come to me, and Y deme iustly? 2 Samuel 15:5 But whanne a man cam to Absolon to greete hym, he helde forth the hond, and took, and kisside that man; 2 Samuel 15:6 and Absolon dide this to al Israel, that cam to doom to be herd of the kyng; and Absolon drow awei the hertis of men of Israel.
Under pretence of a vow he obtaineth leave to go to Hebron.
2 Samuel 15:7 Forsothe aftir foure yeer Absolon seide to kyng Dauid, Y schal go, and Y schal yelde my vowis, whiche Y vowide to the Lord in Ebron; 2 Samuel 15:8 for thi seruaunt vowynge vowide, whanne he was in Gessur of Sirie, and seide, If the Lord bryngith ayen me in to Jerusalem, Y schal make sacrifice to the Lord. 2 Samuel 15:9 And the kyng seide to hym, Go thou in pees. And Absolon roos, and yede in to Ebron.
He maketh there a great conspiracy.
2 Samuel 15:10 Forsothe Absolon sente aspieris in to al the lynage of Israel, and seide, Anoon as ye heren the sown of clarioun, seye ye, Absolon schal regne in Ebron. 2 Samuel 15:11 Forsothe twei hundrid men clepid of Jerusalem yeden with Absolon, and yede with symple herte, and outirli thei knewen not the cause. 2 Samuel 15:12 Also Absolon clepide Achitofel of Gilo, the councelour of Dauid, fro his citee Gilo. And whanne he offride sacrifices a strong swerynge togidere was maad, and the puple rennynge togidere was encreessid with Absolon.
David upon the news fleeth from Jerusalem.
2 Samuel 15:13 Therfor a messanger cam to Dauid, and seide, With al herte al Israel sueth Absolon. 2 Samuel 15:14 And Dauid seide to hise seruauntis that weren with hym in Jerusalem, Rise ye, and flee we; for noon ascaping schal be to us fro the face of Absolon; therfor haste ye to go out, lest he come, and ocupie vs, and fille on vs fallynge, and smyte the citee bi the scharpnesse of swerd. 2 Samuel 15:15 And the seruauntis of the kyng seiden to hym, We thi seruauntis schulen performe gladli alle thingis, what euer thingis oure lord the kyng schal comaunde. 2 Samuel 15:16 Therfor the kyng yede out, and al his hous, on her feet; and the king lefte ten wymmen concubyns, that is, secundarie wyues, to kepe the hous. 2 Samuel 15:17 And the king yede out, and al Israel, on her feet, and the kyng stood fer fro the hous. 2 Samuel 15:18 And alle hise seruauntis yeden bisidis him, and the legiouns of Cerethi and of Ferethi, and alle men of Geth strong fiyters, sixe hundrid men, that sueden him fro Geth, yeden on foote bifor the kyng.
Ittai would not leave him.
2 Samuel 15:19 Forsothe the kyng seide to Ethai of Geth, Whi comest thou with vs? Turne thou ayen, and dwelle with the kyng, for thou art a pilgrym, and thou yedist out fro thi place. 2 Samuel 15:20 Thou camest yistirdai, and to dai thou art compellid to go out with vs. Sotheli Y schal go, whidur Y schal go; turne ayen, and lede ayen thi britheren with thee, and the Lord do mercy and treuthe with thee, for thou schewidist grace and feith. 2 Samuel 15:21 And Ethai answeride to the kyng, and seide, The Lord lyueth, and my lord the kyng lyueth, for in what euer place thou schalt be, my lord the kyng, ether in deeth ethir in lijf, there thi seruaunt schal be. 2 Samuel 15:22 And Dauid seide to Ethay, Come thou, and passe. And Ethai of Geth passide, and the kyng, and alle men that weren with hym, and the tother multitude. 2 Samuel 15:23 And alle men wepten with greet vois, and al the puple passide; and the kyng yede ouer the strond of Cedron, and al the puple yede ayens the weie of the olyue tree, that biholdith to deseert.
Zadok and Abiathar are sent back with the Ark.
2 Samuel 15:24 Forsothe and Sadoch the preest cam, and alle the dekenes with hym, and thei baren the arke of boond of pees of God, and thei diden doun the arke of God; and Abiathar stiede, til al the puple was passid that yede out of the citee. 2 Samuel 15:25 And the kyng seide to Sadoch, Bere ayen the arke of God in to the citee; if Y schal fynde grace in the iyen of the Lord, he schal lede me ayen, and he schal schewe to me that arke and his tabernacle. 2 Samuel 15:26 Sotheli if the Lord seith, Thou plesist not me; Y am redi, do he that, that is good bifor hym silf. 2 Samuel 15:27 And the kyng seide to Sadoch, preest, A! thou seere, that is, profete, turne ayen in to the citee, with pees; and Achymaas, thi sone, and Jonathas, the sone of Abiathar, youre twei sones, be with you. 2 Samuel 15:28 Lo! Y schal be hid in the feeldi places of deseert, til word come fro you, and schewe to me. 2 Samuel 15:29 Therfor Sadoch and Abiathar baren ayen the arke of God in to Jerusalem, and dwelliden there.
David and his company go up mount Olivet weeping.
2 Samuel 15:30 Forsothe Dauid stiede on the hil of olyue trees, stiynge and wepynge, with the heed hilyd, and goynge with nakid feet; but also al the puple that was with hym, stiede with the heed hilid, and wepte.
He curseth Ahithophel's counsel.
2 Samuel 15:31 Forsothe it was teld to Dauid, that Achitofel was in the sweryng togidere with Absolon; and Dauid seide, Lord, Y byseche, make thou fonned the counsel of Achitofel.
Hushai is sent back with instructions.
2 Samuel 15:32 And whanne Dauid stiede in to the hiyenesse of the hil, in which he schulde worschipe the Lord, lo! Cusi of Arath, with the cloth to-rent, and with the heed ful of erthe, cam to hym. 2 Samuel 15:33 And Dauid seide to hym, If thou comest with me, thou schalt be to me to charge; sotheli if thou turnest ayen in to the citee, 2 Samuel 15:34 and seist to Absolon, Y am thi seruaunt, kyng, suffre thou me to lyue; as Y was the seruaunt of thi fadir, so Y schal be thi seruaunt; thou schalt distrye the counsel of Achitofel. 2 Samuel 15:35 Forsothe thou hast with thee Sadoch and Abiathar, preestis; and thou schalt schewe ech word, what euer word thou schalt here in the hows of the kyng, to Sadoch and Abiathar, preestis. 2 Samuel 15:36 Sotheli twei sones of hem ben with hem, Achymaas, sone of Sadoch, and Jonathan, sone of Abiathar; and ye schulen sende bi hem to me ech word which ye schulen here. 2 Samuel 15:37 Therfor whanne Chusi, freend of Dauid, cam in to the citee, also Absolon entryde in to Jerusalem.