2 Timothy 3
He advertiseth him of the times to come,
2 Timothy 3:1 But wite thou this thing, that in the laste daies perelouse tymes schulen neiye, and men schulen be louynge hem silf, 2 Timothy 3:2 coueitouse, hiy of bering, proude, blasfemeris, not obedient to fadir and modir, vnkynde, 2 Timothy 3:3 cursid, with outen affeccioun, with out pees, false blameris, vncontynent, vnmylde, 2 Timothy 3:4 with out benygnyte, traitouris, ouerthwert, bollun with proude thouytis, blynde, loueris of lustis more than of God, 2 Timothy 3:5 hauynge the licknesse of pitee, but denyynge the vertu of it. And eschewe thou these men.
describeth the enemies of the truth,
2 Timothy 3:6 Of these thei ben that persen housis, and leden wymmen caitifs chargid with synnes, whiche ben led with dyuerse desiris, euere more lernynge, 2 Timothy 3:7 and neuere perfitli comynge to the science of treuthe. 2 Timothy 3:8 And as Jannes and Mambres ayenstoden Moises, so these ayenstonden treuthe, men corrupt in vndirstonding, repreuyd aboute the feith. 2 Timothy 3:9 But ferthere thei schulen not profite, for the vnwisdom of hem schal be knowun to alle men, as hern was.
propoundeth unto him his own example,
2 Timothy 3:10 But thou hast getun my teching, ordinaunce, purposing, feith, long abiding, loue, 2 Timothy 3:11 pacience, persecuciouns, passiouns, whiche weren maad to me at Antioche, at Ycony, at Listris, what maner persecucyouns Y suffride, and the Lord hath delyuered me of alle. 2 Timothy 3:12 And alle men that wolen lyue feithfuli in Crist Jhesu, schulen suffre persecucioun. 2 Timothy 3:13 But yuele men and disseyueris schulen encreese in to worse, errynge, and sendinge in to errour. 2 Timothy 3:14 But dwelle thou in these thingis that thou hast lerud, and that ben bitakun to thee, witinge of whom thou hast lerud; 2 Timothy 3:15 for thou hast knowun hooli lettris fro thi youthe, whiche moun lerne thee to heelthe, bi feith that is in Crist Jhesu.
and commendeth the holy Scriptures.
2 Timothy 3:16 For al scripture inspirid of God is profitable to teche, to repreue, to chastice, to lerne in riytwisnes, 2 Timothy 3:17 that the man of God be parfit, lerud to al good werk.