Cornelius, a devout man,
Acts 10:1 A man was in Cesarie, Cornelie bi name, a centurien of the cumpanye of knyytis, that is seid of Italie; Acts 10:2 a religious man, and dredinge the Lord, with al his meyne; doynge many almessis to the puple, and preynge the Lord euere more. Acts 10:3 This say in a visioun opinli, as in the nynthe oure of the dai, an aungel of God entringe in to hym, and seiynge to hym, Cornelie. Acts 10:4 And he bihelde hym, and was a dred, and seide, Who art thou, Lord? And he seide to hym, Thi preieris and thin almesdedis han stied vp in to mynde, in the siyt of the Lord.
being commanded by an angel, sendeth for Peter:
Acts 10:5 And now sende thou men in to Joppe, and clepe oon Symount, that is named Petre. Acts 10:6 This is herborid at a man Symount, curiour, whos hous is bisidis the see. This schal seie to thee, what it bihoueth thee to do. Acts 10:7 And whanne the aungel that spak to hym, was gon awei, he clepide twei men of his hous, and a knyyt that dredde the Lord, whiche weren at his bidding. Acts 10:8 And whanne he hadde told hem alle these thingis, he sente hem in to Joppe.
Acts 10:9 And on the dai suynge, while thei maden iournei, and neiyeden to the citee, Petre wente vp in to the hiest place of the hous to preie, aboute the sixte our. Acts 10:10 And whanne he was hungrid, he wolde haue ete. But while thei maden redi, a rauysching of spirit felde on hym;
who by a vision,
Acts 10:11 and he say heuene openyd, and a vessel comynge doun, as a greet scheet with foure corneris, to be lette doun fro heuene in to erthe, Acts 10:12 in which weren alle foure footid beestis, and crepinge of the erthe, and volatilis of heuene. Acts 10:13 And a vois was maad to hym, Rise thou, Petre, and sle, and ete. Acts 10:14 And Petre seide, Lord, forbede, for Y neuer ete ony comun thing and vnclene.
is taught not to despise the Gentiles.
Acts 10:15 And eft the secounde tyme the vois was maad to him, That thing that God hath clensid, seye thou not vnclene. Acts 10:16 And this thing was don bi thries; and anoon the vessel was resseyued ayen. Acts 10:17 And while that Petre doutide with ynne hym silf, what the visioun was that he say, lo! the men, that weren sent fro Corneli, souyten the hous of Symount, and stoden at the yate. Acts 10:18 And whanne thei hadden clepid, thei axiden if Symount, that is named Petre, hadde there herbore.
Acts 10:19 And while Petre thouyte on the visioun, the spirit seide to hym, Lo! thre men seken thee. Acts 10:20 Therfor ryse thou, and go doun, and go with hem, and doute thou no thing, for Y sente hem. Acts 10:21 And Petre cam doun to the men, and seide, Lo! Y am, whom ye seken; what is the cause, for which ye ben come? Acts 10:22 And thei seiden, Cornelie, the centurien, a iust man, and dredinge God, and hath good witnessyng of alle the folc of Jewis, took aunswere of an hooli aungel, to clepe thee in to his hous, and to here wordis of thee. Acts 10:23 Therfor he ledde hem inne, and resseyuede in herbore; and that nyyt thei dwelliden with hym. And in the dai suynge he roos, and wente forth with hem; and sum of the britheren folewiden hym fro Joppe, that thei be witnessis to Petre. Acts 10:24 And the other dai he entride in to Cesarie. And Cornelie abood hem, with hise cousyns, and necessarie freendis, that weren clepid togidere. Acts 10:25 And it was don, whanne Petre was come ynne, Corneli cam metynge hym, and felle doun at hise feet, and worschipide him. Acts 10:26 But Petre reiside hym, and seide, Aryse thou, also Y my silf am a man, as thou. Acts 10:27 And he spak with hym, and wente in, and foonde many that weren come togidere. Acts 10:28 And he seide to hem, Ye witen, how abhomynable it is to a Jewe, to be ioyned ether to come to an alien; but God schewide to me, that no man seye a man comyn, ethir vnclene. Acts 10:29 For which thing Y cam, whanne Y was clepid, with out douting. Therfor Y axe you, for what cause han ye clepid me? Acts 10:30 And Cornelie seide, To dai foure daies in to this our, Y was preiynge and fastynge in the nynthe our in myn hous. And lo! a man stood bifore me in a whijt cloth, and seide, Acts 10:31 Cornelie, thi preier is herd, and thin almesdedis ben in mynde in the siyt of God. Acts 10:32 Therfor sende thou in to Joppe, and clepe Symount, that is named Petre; this is herborid in the hous of Symount coriour, bisidis the see. This, whanne he schal come, schal speke to thee. Acts 10:33 Therfor anoon Y sente to thee, and thou didist wel in comynge to vs. Now therfor we alle ben present in thi siyt, to here the wordis, what euer ben comaundid to thee of the Lord.
As he preacheth Christ to Cornelius and his company,
Acts 10:34 And Petre openyde his mouth, and seide, In trewthe Y haue foundun, that God is no acceptor of persoones; Acts 10:35 but in eche folk he that dredith God, and worchith riytwisnesse, is accept to hym. Acts 10:36 God sente a word to the children of Israel, schewinge pees bi Jhesu Crist; this is Lord of alle thingis. Acts 10:37 Ye witen the word that is maad thorou al Judee, and bigan at Galile, aftir the baptym that Joon prechide, Jhesu of Nazareth; Acts 10:38 hou God anoyntide hym with the Hooli Goost, and vertu; which passide forth in doynge wel, and heelynge alle men oppressid of the deuel, for God was with hym. Acts 10:39 And we ben witnessis of alle thingis, whiche he dide in the cuntrei of Jewis, and of Jerusalem; whom thei slowen, hangynge in a tre. Acts 10:40 And God reiside this in the thridde dai, and yaf hym to be maad knowun, Acts 10:41 not to al puple, but to witnessis bifor ordeyned of God; to vs that eeten and drunken with hym, after that he roos ayen fro deth. Acts 10:42 And he comaundide to vs to preche to the puple, and to witnesse, that he it is, that is ordeyned of God domesman of the quyk and of deede. Acts 10:43 To this alle prophetis beren witnessing, that alle men that bileuen in hym, schulen resseyue remyssioun of synnes bi his name.
the Holy Ghost falleth on them,
Acts 10:44 And yit while that Petre spak these wordis, the Hooli Goost felde on alle that herden the word. Acts 10:45 And the feithful men of circumcisioun, that camen with Petre, wondriden, that also in to naciouns the grace of the Hooli Goost is sched out. Acts 10:46 For thei herden hem spekynge in langagis, and magnyfiynge God. Acts 10:47 Thanne Petre answeride, Whether ony man may forbede watir, that these ben not baptisid, that han also resseyued the Hooli Goost as we?
and they are baptized.
Acts 10:48 And he comaundide hem to be baptisid in the name of the Lord Jhesu Crist. Thanne thei preieden hym, that he schulde dwelle with hem sum daies.