Wycliffe Bible

Acts 12

King Herod persecuteth the Christians, killeth James, and imprisoneth Peter: whom an angel delivereth upon the prayers of the Church.

Acts 12:1 And in the same tyme Eroude the king sente power, to turmente sum men of the chirche. Acts 12:2 And he slowe bi swerd James, the brothir of Joon. Acts 12:3 And he siy that it pleside to Jewis, and keste to take also Petre; and the daies of therf looues weren. Acts 12:4 And whanne he hadde cauyte Petre, he sente hym in to prisoun; and bitook to foure quaternyouns of knyytis, to kepe hym, and wolde aftir pask bringe hym forth to the puple. Acts 12:5 And Petre was kept in prisoun; but preier was maad of the chirche with out ceessing to God for hym. Acts 12:6 But whanne Eroude schulde bringe hym forth, in that nyyt Petre was slepinge bitwixe twei knyytis, and was boundun with twei cheynes; and the keperis bifor the dore kepten the prisoun. Acts 12:7 And lo! an aungel of the Lord stoode nyy, and liyt schoon in the prisoun hous. And whanne he hadde smyte the side of Petre, he reiside hym, and seide, Rise thou swiftli. And anoon the cheynes felden doun fro hise hoondis. Acts 12:8 And the aungel seide to hym, Girde thee, and do on thin hoosis. And he dide so. And he seide to hym, Do aboute thee thi clothis, and sue me. Acts 12:9 And he yede out, and suede hym; and he wiste not that it was soth, that was don bi the aungel; for he gesside hym silf to haue sey a visioun. Acts 12:10 And thei passiden the first and the secounde warde, and camen to the iren yate that ledith to the citee, which anoon was opened to hem. And thei yeden out, and camen in to o street, and anoon the aungel passide awei fro hym. Acts 12:11 And Petre turnede ayen to hym silf, and seide, Now Y woot verili, that the Lord sente his aungel, and delyueride me fro the hoond of Eroude, and fro al the abiding of the puple of Jewis. Acts 12:12 And he bihelde, and cam to the hous of Marie, modir of Joon, that is named Marcus, where many weren gaderid togidre, and preiynge. Acts 12:13 And whanne he knockid at the dore of the yate, a damysel, Rode bi name, cam forth to se. Acts 12:14 And whanne sche knewe the vois of Petre, for ioye sche openyde not the yate, but ran in, and telde, that Petre stood at the yate. Acts 12:15 And thei seiden to hir, Thou maddist. But sche affermyde, that it was so. And thei seiden, It is his aungel. Acts 12:16 But Petre abood stille, and knockide. And whanne thei hadden opened the dore, thei sayen hym, and wondriden. Acts 12:17 And he bekenyde to hem with his hoond to be stille, and telde hou the Lord hadde led hym out of the prisoun. And he seide, Telle ye to James and to the britheren these thingis. And he yede out, and wente in to an othere place. Acts 12:18 And whanne the dai was come, ther was not lytil troubling among the knyytis, what was don of Petre. Acts 12:19 And whanne Eroude hadde souyt hym, and foonde not, aftir that he hadde made enqueryng of the keperis, he comaundide hem to be brouyt to hym. And he cam doun fro Judee in to Cesarie, and dwellide there.

In his pride taking to himself the honour due to God, he is stricken by an angel, and dieth miserably.

Acts 12:20 And he was wroth to men of Tyre and of Sidon. And thei of oon acord camen to hym, whanne thei hadden counseilid with Bastus, that was the kingis chaumbirleyn, thei axiden pees, for as myche that her cuntrees weren vitailid of hym. Acts 12:21 And in a dai that was ordeyned, Eroude was clothid with kyngis clothing, and sat for domesman, and spak to hem. Acts 12:22 And the puple criede, The voicis of God, and not of man. Acts 12:23 And anoon an aungel of the Lord smoot hym, for he hadde not youun onour to God; and he was wastid of wormes, and diede.

After his death, the Word of God prospereth.

Acts 12:24 And the word of the Lord waxide, and was multiplied. Acts 12:25 And Barnabas and Saul turneden ayen fro Jerusalem, whanne the mynystrie was fillid, and token Joon, that was named Marcus.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!