Paul being accused by Tertullus the orator,
Acts 24:1 And aftir fyue daies, Ananye, prince of preestis, cam doun with summe eldere men, and Terculle, a feir speker, which wenten to the precident ayens Poul. Acts 24:2 And whanne Poul was somened, Terculle bigan to accuse hym, and seide, Whanne in myche pees we doon bi thee, and many thingis ben amendid bi thi wisdom, euere more and euery where, Acts 24:3 thou best Felix, we han resseyued with al doyng of thankingis. Acts 24:4 But lest Y tarie thee lengere, Y preie thee, schortly here vs for thi mekenesse. Acts 24:5 We han foundun this wickid man stirynge dissencioun to alle Jewis in al the world, and auctour of dissencioun of the secte of Nazarenus; and he also enforside to defoule the temple; Acts 24:6 whom also we token, and wolden deme, after oure lawe. Acts 24:7 But Lisias, the trybune, cam with greet strengthe aboue, and delyuerede hym fro oure hoondis; Acts 24:8 and comaundide hise accuseris to come to thee, of whom thou demynge, maist knowe of alle these thingis, of whiche we accusen hym. Acts 24:9 And Jewis putten to, and seiden, that these thingis hadden hem so.
answereth for his life and doctrine.
Acts 24:10 And Poul answeride, whanne the president grauntide hym to seie, Of mony yeeris Y knowe thee, that thou art domesman to this folk, and Y schal do ynowy for me with good resoun. Acts 24:11 For thou maist knowe, for to me ben not more than twelue daies, sithen Y cam vp to worschipe in Jerusalem; Acts 24:12 and nether in the temple thei founden me disputinge with ony man, nether makynge concours of puple, nether in synagogis, nether in citee; Acts 24:13 nether thei moun preue to thee, of the whiche thingis thei now accusen me. Acts 24:14 But Y knowleche to thee this thing, that aftir the secte which thei seien eresie, so Y serue to God the fadir, and Y bileue to alle thingis that ben writun in the lawe and profetis; and Y haue hope in God, Acts 24:15 whiche also thei hem silf abiden, the ayenrisyng to comynge of iust men and wickid. Acts 24:16 In this thing Y studie with outen hirtyng, to haue concience to God, and to men euermore. Acts 24:17 But after many yeeris, Y cam to do almes dedis to my folc, and offryngis, and auowis; Acts 24:18 in whiche thei founden me purified in the temple, not with company, nether with noise. And thei cauyten me, and thei crieden, and seiden, Take awei oure enemye. Acts 24:19 And summe Jewis of Asie, whiche it behofte to be now present at thee, and accuse, if thei hadden ony thing ayens me, Acts 24:20 ether these hem silf seie, if thei founden in me ony thing of wickidnesse, sithen Y stonde in the counsel, Acts 24:21 but oneli of this vois, by which Y criede stondynge among hem, For of the ayenrisyng of deed men Y am demyd this dai of you. Acts 24:22 Sothely Felix delayede hem, and knewe moost certeynli of the weie, and seide, Whanne Lisias, the tribune, schal come doun, Y schal here you. Acts 24:23 And he comaundide to a centurien to kepe hym, and that he hadde reste, nethir to forbede ony man to mynystre of his owne thingis to him.
He preacheth Christ to the governor and his wife.
Acts 24:24 And after summe dayes Felix cam, with Drussille his wijf, that was a Jewesse, and clepide Poul, and herde of him the feith that is in Crist Jhesu. Acts 24:25 And while he disputide of riytwisnesse, and chastite, and of dom to comynge, Felix was maad tremblinge, and answerde, That perteneth now, go; but in tyme couenable Y schal clepe thee.
The governor hopeth for a bribe, but in vain.
Acts 24:26 Also he hopide, that money schulde be youun to hym of Poul; for which thing eft he clepide hym, and spak with hym.
At last, going out of his office, he leaveth Paul in prison.
Acts 24:27 And whanne twei yeeris weren fillid, Felix took a successoure, Porcius Festus; and Felix wolde yyue grace to Jewis, and lefte Poul boundun.