Paul after his shipwreck is kindly entertained of the barbarians.
Acts 28:1 And whanne we hadden ascapid, thanne we knewen that the ile was clepid Militene. And the hethene men diden to vs not litil curtesie. Acts 28:2 And whanne a fier was kyndelid, thei refreschiden vs alle, for the reyn that cam, and the coold. Acts 28:3 But whanne Poul hadde gederid a quantite of kittingis of vines, and leide on the fier, an edder sche cam forth fro the heete, and took hym bi the hoond. Acts 28:4 And whanne the hethene men of the ile siyen the beest hangynge in his hoond, thei seiden togidir, For this man is a manquellere; and whanne he scapide fro the see, Goddis veniaunce suffrith hym not to lyue in erthe.
The viper on his hand hurteth him not.
Acts 28:5 But he schoke awei the beest in to the fier, and hadde noon harm. Acts 28:6 And thei gessiden that he schulde be turned in to swellyng, and falle doun sudenli, and die. But whanne thei abiden longe, and sien that no thing of yuel was don in him, thei turneden hem togider, and seiden, that he was God. Acts 28:7 And in tho placis weren maners of the prince of the ile, Puplius bi name, which resseyuede vs bi thre daies benygnli, and foond vs.
He healeth many diseases in the island.
Acts 28:8 And it bifel, that the fader of Pupplius lai trauelid with fyueris and blodi flux. To whom Poul entride, and whanne he hadde preied, and leid his hondis on hym, he helide hym. Acts 28:9 And whanne this thing was don, alle that in the ile hadden sijknesses, camen, and weren heelid. Acts 28:10 Which also onouriden vs in many worschipis, and puttiden what thingis weren necessarie to vs, whanne we schippiden.
They depart towards Rome.
Acts 28:11 And after thre monethis we schippiden in a schip of Alisaundre, that hadde wyntrid in the ile, to which was an excellent singne of Castours. Acts 28:12 And whanne we camen to Siracusan, we dwelliden there thre daies. Acts 28:13 Fro thennus we seiliden aboute, and camen to Regyum; and aftir oo dai, while the south blew, in the secounde dai we camen to Puteolos. Acts 28:14 Where whanne we founden britheren, we weren preied to dwelle there anentis hem seuene daies. And so we camen to Rome. Acts 28:15 And fro thennus whanne britheren hadden herd, thei camen to vs to the cheping of Appius, and to the Thre tauernes. Acts 28:16 And whanne Poul hadde seyn hem, he dide thankyngis to God, and took trist. And whanne we camen to Rome, it was suffrid to Poul to dwelle bi hym silf, with a kniyt kepinge him.
He declareth to the Jews the cause of his coming.
Acts 28:17 And after the thridde dai, he clepide togidir the worthieste of the Jewis. And whanne thei camen, he seide to hem, Britheren, Y dide no thing ayens the puple ether custom of fadris, and Y was boundun at Jerusalem, and was bitakun in to the hondis of Romayns. Acts 28:18 And whanne thei hadden axid of me, wolden haue delyuerid me, for that no cause of deth was in me. Acts 28:19 But for Jewis ayenseiden, Y was constreyned to appele to the emperour; not as hauynge ony thing to accuse my puple. Acts 28:20 Therfor for this cause Y preiede to se you, and speke to you; for for the hope of Israel Y am gird aboute with this chayne. Acts 28:21 And thei seiden to hym, Nether we han resseyued lettris of thee fro Judee, nether ony of britheren comynge schewide, ether spak ony yuel thing of thee. Acts 28:22 But we preyen to here of thee, what thingis thou felist; for of this sect it is knowun to vs, that euerywhere me ayenseith it. Acts 28:23 And whanne thei hadden ordeined a dai to hym, many men camen to hym in to the in. To whiche he expownede, witnessinge the kyngdom of God, and counseilide hem of Jhesu, of the lawe of Moyses, and profetis, for the morewe til to euentid.
After his preaching some were persuaded, and some believed not.
Acts 28:24 And summe bileueden to these thingis that weren seid of Poul, summe bileueden not. Acts 28:25 And whanne thei weren not consentinge togidir, thei departiden. And Poul seide o word, For the Hooli Goost spak wel bi Ysaye, the profete, to oure fadris, Acts 28:26 and seide, Go thou to this puple, and seie to hem, With eere ye schulen here, and ye schulen not vndirstonde; and ye seynge schulen se, and ye schulen not biholde. Acts 28:27 For the herte of this puple is greetli fattid, and with eeris thei herden heuyli, and thei closiden togider her iyen, lest perauenture thei se with iyen, and with eeris here, and bi herte vndurstonde, and be conuertid, and Y hele hem. Acts 28:28 Therfor be it knowun to you, that this helthe of God is sent to hethen men, and thei schulen here. Acts 28:29 And whanne he hadde seid these thingis, Jewis wenten out fro hym, and hadden myche questioun, ethir musyng, among hem silf.
Yet he preacheth there two years.
Acts 28:30 And he dwellide ful twei yeer in his hirid place; and he resseyuede alle that entryden to hym, Acts 28:31 and prechide the kingdom of God, and tauyte tho thingis that ben of the Lord Jhesu Crist, with al trist, with out forbedyng. Amen.