By a basket of summer fruit is shewed the propinquity of Israel's end.
Amos 8:1 The Lord God schewide to me these thingis; and lo! an hook of applis. Amos 8:2 And the Lord seide, What seist thou, Amos? And Y seide, An hook of applis. And the Lord seide to me, The ende is comun on my puple Israel; Y schal no more putte to, that Y passe bi hym. Amos 8:3 And the herris, ether twistis, of the temple schulen greetli sowne in that dai, seith the Lord God. Many men schulen die, silence schal be cast forth in ech place.
Oppression is reproved.
Amos 8:4 Here ye this thing, whiche al to-breken a pore man, and maken nedi men of the lond for to faile; Amos 8:5 and ye seien, Whanne schal heruest passe, and we schulen sille marchaundises? and the sabat, and we schulen opene wheete? that we make lesse the mesure, and encreesse the cicle, and vndur put gileful balauncis; Amos 8:6 that we welde bi siluer nedi men and pore men for schoon, and we sille outcastyngis of wheete? Amos 8:7 The Lord swoor ayens the pride of Jacob, Y schal not foryete til to the ende alle the werkis of hem. Amos 8:8 Whether on this thing the erthe schal not be mouyd togidere, and eche dwellere therof schal mourene? And it schal stie vp as al the flood, and schal be cast out, and schal flete awei as the stronde of Egipt. Amos 8:9 And it schal be, seith the Lord, in that dai the sunne schal go doun in myddai, and Y schal make the erthe for to be derk in the dai of liyt. Amos 8:10 And Y schal conuerte youre feeste daies in to mourenyng, and alle youre songis in to weilyng; and Y schal brynge yn on ech bac of you a sak, and on ech heed of you ballidnesse; and Y schal put it as the mourenyng of oon bigetun sone, and the laste thingis therof as a bittir dai.
A famine of the Word threatened.
Amos 8:11 Lo! the daies comen, seith the Lord, and Y schal sende out hungur in to erthe; not hungur of breed, nether thirst of watir, but of herynge the word of God. Amos 8:12 And thei schulen be mouyd to gidere fro the see til to the see, and fro the north til to the eest thei schulen cumpasse, sekynge the word of the Lord, and thei schulen not fynde. Amos 8:13 In that dai faire maidens schulen faile, and yonge men in thirst, whiche sweren in trespas of Samarie, Amos 8:14 and seien, Dan, thi god lyueth, and the weie of Bersabee lyueth; and thei schulen falle, and thei schulen no more rise ayen.