Wycliffe Bible

Deuteronomy 21

The expiation of an uncertain murder.

Deuteronomy 21:1 Whanne the careyn of a man slayn is foundun in the lond which thi Lord God schal yyue to thee, and the gilti of sleyng is vnknowun, Deuteronomy 21:2 the grettere men in birthe and thi iugis schulen go out, and schulen mete fro the place of the careyn the spaces of alle citees bi cumpas; Deuteronomy 21:3 and the eldre men of that citee, which thei seen to be neer than othere, schulen take of the droue a cow calf, that drow not yok, nether kittide the erthe with a schar; Deuteronomy 21:4 and thei schulen lede that cow calf to a scharp valey, and ful of stoonys, that was neuere erid, nether resseyuede seed; and in that valey thei schulen kitte the heed of the cow calf. Deuteronomy 21:5 And the preestis, the sones of Leuy, schulen neiye, whiche thi Lord God chees, that thei mynystre to hym, and blesse in his name, and al the cause hange at the word of hem; and what euer thing is cleene ethir vncleene, be demed. Deuteronomy 21:6 And the grettere men in birthe of that citee schulen come to the slayn man, and thei schulen waische her hondis on the cow calf, that was slayn in the valei; Deuteronomy 21:7 and thei schulen seie, Oure hondis schedden not out this blood, nether oure iyen sien. Deuteronomy 21:8 Lord, be mercyful to thi puple Israel, whom thou ayen brouytist, and arette thou not innocent blood in the myddis of thi puple Israel. And the gilt of blood schal be don awey fro hem. Deuteronomy 21:9 Forsothe thou schalt be alien fro the blood of the innocent which is sched, whanne thou hast do that that the Lord comaundide.

The usage of a captive taken to wife.

Deuteronomy 21:10 If thou goist out to batel ayens thin enemyes, that thi Lord God bitakith hem in thin hond, and thou ledist prisoneris, Deuteronomy 21:11 and thou seest in the noumbre of prisounneris a fair womman, and thou louest hir, and wole haue hir to wijf, Deuteronomy 21:12 thou schalt brynge hir in to thin hows; which womman schal schaue the heer, and schal kitte the nailes aboute, and sche schal putte awei the clooth, Deuteronomy 21:13 wher ynne sche was takun, and sche schal sitte in thin hows, and schal biwepe hir fadir and modir o monethe; and aftirward thou schalt entre to hir, and schalt sleepe with hir, and sche schal be thi wijf. Deuteronomy 21:14 But if aftirward sche sittith not in thi soule, that is, plesith not thi wille, thou schalt delyuere hir fre, nethir thou schalt mowe sille hir for money, nether oppresse bi power, for thou madist hir lowe.

The firstborn is not to be disinherited upon private affection.

Deuteronomy 21:15 If a man hath twey wyues, oon loued, and the tothir hateful, and he gendrith of hir fre children, and the sone of the hateful wijf is the firste gendrid, Deuteronomy 21:16 and the man wole departe the catel bitwixe hise sones, he schal not mowe make the sone of the loued wijf the firste gendrid, and sette bifor the sone of the hateful wijf, Deuteronomy 21:17 but he schal knowe the sone of the hateful wijf the firste gendrid, and he schal yyue to that sone alle thingis double of tho thingis that he hath; for this sone is the begynnyng of his fre children, and the firste gendrid thingis ben due to hym.

A stubborn son is to be stoned to death.

Deuteronomy 21:18 If a man gendrith a sone rebel, and ouerthewert, which herith not the comaundement of fadir and modir, and he is chastisid, Deuteronomy 21:19 and dispisith to obei, thei schulen take hym, and schulen lede to the eldre men of that citee, and to the yate of doom; Deuteronomy 21:20 and thei schulen seie to hem, This oure sone is ouerthewert and rebel; he dispisith to here oure monestyngis, ethir heestis, he yyueth tent to glotonyes, and letcherie, and feestis. Deuteronomy 21:21 The puple of the citee schal oppresse hym with stoonus, and he schal die, that ye do awei yuel fro the myddis of you, and that al Israel here, and drede.

The malefactor must not hang all night of a tree.

Deuteronomy 21:22 Whanne a man doith a synne which is worthi to be punyschid bi deeth, and he is demed to deeth, and is hangid in a iebat, Deuteronomy 21:23 his careyn schal not dwelle in the tre, but it schal be biried in the same dai; for he that hangith in the cros is cursid of God, and thou schalt not defoule thi lond which thi Lord God yaf thee in to possessioun.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!