Ephesians 5:1 Therfor be ye foloweris of God, as moost dereworthe sones;
After general exhortations, to love,
Ephesians 5:2 and walke ye in loue, as Crist louyde vs, and yaf hym silf for vs an offryng and a sacrifice to God, in to the odour of swetnesse.
to flee fornication,
Ephesians 5:3 And fornycacioun, and al vnclennesse, or aueryce, be not named among you, as it bicometh holi men;
and all uncleanness,
Ephesians 5:4 ethir filthe, or foli speche, or harlatrye, that perteyneth not to profit, but more doyng of thankyngis. Ephesians 5:5 For wite ye this, and vndurstonde, that ech letchour, or vnclene man, or coueytouse, that serueth to mawmetis, hath not eritage in the kingdom of Crist and of God. Ephesians 5:6 No man disseyue you bi veyn wordis; for whi for these thingis the wraththe of God cam on the sones of vnbileue.
not to converse with the wicked,
Ephesians 5:7 Therfor nyle ye be maad parteneris of hem. Ephesians 5:8 For ye weren sum tyme derknessis, but now ye ben liyt in the Lord. Walke ye as the sones of liyt. Ephesians 5:9 For the fruyt of liyt is in al goodnesse, and riytwisnesse, and treuthe. Ephesians 5:10 And preue ye what thing is wel plesynge to God. Ephesians 5:11 And nyle ye comyne to vnfruytouse werkis of derknessis; but more repreue ye. Ephesians 5:12 For what thingis ben don of hem in priuy, it is foule, yhe, to speke. Ephesians 5:13 And alle thingis that ben repreuyd of the liyt, ben opynli schewid; for al thing that is schewid, is liyt. Ephesians 5:14 For which thing he seith, Rise thou that slepist, and rise vp fro deth, and Crist schal liytne thee.
to walk warily,
Ephesians 5:15 Therfor, britheren, se ye, hou warli ye schulen go; Ephesians 5:16 not as vnwise men, but as wise men, ayenbiynge tyme, for the daies ben yuele. Ephesians 5:17 Therfor nyle ye be maad vnwise, but vndurstondynge which is the wille of God.
and to be filled with the Spirit,
Ephesians 5:18 And nyle ye be drunkun of wyn, in which is letcherie, but be ye fillid with the Hooli Goost; and speke ye to you silf in salmes, Ephesians 5:19 and ymnes, and spiritual songis, syngynge and seiynge salm in youre hertis to the Lord; Ephesians 5:20 euermore doynge thankingis for alle thingis in the name of oure Lord Jhesu Crist to God and to the fadir. Ephesians 5:21 Be ye suget togidere in the drede of Crist.
he descendeth to the particular duties, how wives ought to obey their husbands,
Ephesians 5:22 Wymmen, be thei suget to her hosebondis, as to the Lord, Ephesians 5:23 for the man is heed of the wymman, as Crist is heed of the chirche; he is sauyour of his bodi. Ephesians 5:24 But as the chirche is suget to Crist, so wymmen to her hosebondis in alle thingis.
and husbands ought to love their wives,
Ephesians 5:25 Men, loue ye youre wyues, as Crist louyde the chirche, and yaf hym silf for it, to make it holi; Ephesians 5:26 and clenside it with the waisching of watir, in the word of lijf, Ephesians 5:27 to yyue the chirche gloriouse to hym silf, that it hadde no wem, ne ryueling, or ony siche thing, but that it be hooli and vndefoulid. Ephesians 5:28 So and men schulen loue her wyues, as her owne bodies. He that loueth his wijf, loueth hym silf; Ephesians 5:29 for no man hatide euere his owne fleisch, but nurischith and fostrith it, as Crist doith the chirche. Ephesians 5:30 And we ben membris of his bodi, of his fleisch, and of his boonys. Ephesians 5:31 For this thing a man schal forsake his fadir and modir, and he schal drawe to his wijf; and thei schulen be tweyne in o fleisch.
even as Christ doth his Church.
Ephesians 5:32 This sacrament is greet; yhe, Y seie in Crist, and in the chirche. Ephesians 5:33 Netheles ye alle, ech man loue his wijf as hym silf; and the wijf drede hir hosebonde.