Wycliffe Bible

Exodus 18

Jethro bringeth to Moses his wife and two sons.

Exodus 18:1 And whanne Jetro, the prest of Madian, the alye of Moises, hadde herd alle thingis which God hadde do to Moises, and to Israel his puple, for the Lord hadde led Israel out of the lond of Egipt, Exodus 18:2 he took Sefora, the wijf of Moises, whom he hadde sent ayen, Exodus 18:3 and hise twei sones, of which oon was clepid Gersan, for the fadir seide, Y was a comelyng in alien lond, Exodus 18:4 forsothe the tother was clepid Eliezer, for Moises seide, God of my fadir is myn helpere, and he delyuerede me fro the swerd of Farao. Exodus 18:5 Therfor Jetro, alie of Moises, cam, and the sones of Moises and his wijf camen to Moises, in to deseert, where Jetro settide tentis bisidis the hil of God; Exodus 18:6 and sente to Moises, and seide, Y Jetro, thin alie, come to thee, and thi wijf, and thi twei sones with hir.

Moses entertaineth him.

Exodus 18:7 And Moises yede out into the comyng of his alie, and worschipide, and kiste hym, and thei gretten hem silf to gidere with pesible wordis. Exodus 18:8 And whanne he hadde entrid in to the tabernacle, Moises tolde to his alie alle thingis whiche God hadde do to Farao, and to Egipcians, for Israel, and he tolde al the trauel which bifelle to hem in the weie, of which the Lord delyuerede hem. Exodus 18:9 And Jetro was glad on alle the goodis whiche the Lord hadde do to Israel, for he delyuerede Israel fro the hond of Egipcians. Exodus 18:10 And Jetro seide, Blessid be the Lord, that delyuerede you fro the hond of Egipcians, and fro the hond of Farao, which Lord delyuered his puple fro the hond of Egipt; Exodus 18:11 now Y knowe that the Lord is greet aboue alle goddis, for thei diden proudli ayens hem. Exodus 18:12 Therfor Jetro, alie of Moises, offride brent sacrifices and offryngis to God; and Aaron, and alle the eldere men of Israel, camen to ete breed with hym bifore God.

Jethro's counsel is accepted.

Exodus 18:13 Forsothe in the tother dai Moises sat that he schulde deme the puple, that stood niy Moises, fro the morewtid til to euentid. Exodus 18:14 And whanne his alie hadde seyn this, that is, alle thingis whiche he dide in the puple, he seide, What is this that thou doist in the puple? whi sittist thou aloone, and al the puple abidith fro the morewtid til to euentid? Exodus 18:15 To whom Moises answeride, The puple cometh to me, and axith the sentence of God; Exodus 18:16 and whanne ony strijf bifallith to hem, thei comen to me, that Y deme bitwixe hem, and schewe the comaundementis of God, and hise lawis. Exodus 18:17 And Jetro seide, Thou doist a thing not good, Exodus 18:18 thou art wastid with a fonned trauel, bothe thou and this puple which is with thee; the werk is a boue thi strengthis, thou aloone maist not suffre it. Exodus 18:19 But here thou my wordis and counseils, and the Lord schal be with thee; be thou to the puple in these thingis that perteynen to God, that thou telle the thingis that ben seid to the puple; Exodus 18:20 and schewe to the puple the cerymonyes, and custom of worschipyng, and the weie bi which thei owen to go, and the werk which thei owen to do. Exodus 18:21 Forsothe puruey thou of al the puple myyti men, and dredynge God, in whiche is treuthe, and whiche haten auarice; and ordeyne thou of hem tribunes, and centuriouns, and quinquagenaries, and deenys, Exodus 18:22 whiche schulen deme the puple in al tyme; sotheli what ever thing is grettere, telle thei to thee, and deme thei ooneli lesse thingis, and be it esiere to thee, whanne the burthun is departid in to othere men. Exodus 18:23 If thou schalt do this, thou schalt fille the comaundement of God, and thou schalt mowe bere hise comaundementis; and al this puple schal turne ayen with pees to her places. Exodus 18:24 And whanne these thingis weren herd, Moises dide alle thingis whiche Jetro counselide. Exodus 18:25 And whanne noble men of al Israel weren chosun Moises ordeynede hem princis of the puple, tribunes, and centuriouns, and quinquagenaries, and denes, Exodus 18:26 whiche demeden the puple in al tyme; forsothe, whateuer thing was hardere, thei telden to Moises, and thei demeden esiere thingis oneli.

Jethro departeth.

Exodus 18:27 And Moises lefte his alie, which turnede ayen, and yede in to his lond.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!