Wycliffe Bible

Genesis 31

Jacob upon displeasure departeth secretly.

Genesis 31:1 Aftir that Jacob herde the wordis of the sones of Laban, that seiden, Jacob hath take awei alle thingis that weren oure fadris, and of his catel Jacob is maad riche, and noble. Genesis 31:2 Also Jacob perseyuede the face of Laban, that it was not ayens hym as yistirdai, and the thridde dai agoon, Genesis 31:3 moost for the Lord seide to hym, Turne ayen into the lond of thi fadris, and to thi generacioun, and Y shal be with thee. Genesis 31:4 He sente, and clepide Rachel, and Lya, in to the feeld, where he kepte flockis, and he seide to hem, Genesis 31:5 Y se the face of youre fadir, that it is not ayens me as yisterdai and the thridde dai agoon; but God of my fadir was with me. Genesis 31:6 And ye witen that with alle my strengthis Y seruede youre fadir; Genesis 31:7 but and youre fadir disseyuyde me, and chaungide my meede ten sithis; and netheles God suffride not hym to anoye me. Genesis 31:8 If he seide ony tyme, Dyuerse colourid sheep schulen be thi medis, alle sheep brouyten forth dyuerse colourid lambren; forsothe whanne he seide ayenward, Thou shalte take alle white for mede, alle the flockis brouyten forth white beestis; Genesis 31:9 and God took a wey the substaunce of youre fadir, and yaf to me. Genesis 31:10 For aftir that the tyme of conseyuyng of sheep cam, Y reiside myn iyen, and seiy in sleep malis dyuerse, and spotti, and of dyuerse colouris, stiynge on femalis. Genesis 31:11 And the aungel of the Lord seide to me in sleep, Jacob! and Y answeride, Y am redy. Genesis 31:12 Which seide, Reise thin iyen, and se alle malis dyuerse, byspreynt, and spotti, stiynge on femalis; for Y seiy alle thingis whiche Laban dide to thee; Genesis 31:13 Y am God of Bethel, where thou anoyntidist a stoon, and madist auow to me. Now therefor rise thou, and go out of this lond, and turne ayen in to the lond of thi birthe. Genesis 31:14 And Rachel and Lya answeriden, Wher we han ony thing residue in the catels, and eritage of oure fadir? Genesis 31:15 Wher he arettide not vs as aliens, and selde, and eet oure prijs? Genesis 31:16 But God took awei the richessis of oure fadir, and yaf tho to vs, and to oure sones; wherfor do thou alle thingis whiche God hath comaundide to thee.

Genesis 31:17 Forsothe Jacob roos, and puttide hise fre children and wyues on camels, and yede forth; Genesis 31:18 and he took al his catel, flockis, and what euer thing he hadde gete in Mesopotanye, and yede to Isaac, his fadir, into the lond of Canaan.

Rachel stealeth her father's images.

Genesis 31:19 In that tyme Laban yede to schere scheep, and Rachel stal the idols of hir fadir. Genesis 31:20 And Jacob nolde knouleche to the fadir of his wijf, that he wolde fle; Genesis 31:21 and whanne he hadde go, as wel he as alle thingis that weren of his riyt, and whanne he hadde passid the water, and he yede ayens the hil of Galaad,

Laban pursueth after Jacob,

Genesis 31:22 it was teld to Laban, in the thridde dai, that Jacob fledde. Genesis 31:23 And Laban took his britheren, and pursuede hym seuene daies, and took hym in the hil of Galaad. Genesis 31:24 And Laban seiy in sleep the Lord seiynge to him, Be war that thou speke not ony thing sharpli ayens Jacob.

Genesis 31:25 And thanne Jacob hadde stretchid forth the tabernacle in the hil; and whanne he hadde sued Jacob with his britheren, he settide tente in the same hil of Galaad; and he seide to Jacob,

and complaineth of the wrong.

Genesis 31:26 Whi hast thou do so, that the while I wiste not thou woldist dryue awey my douytris as caitifs by swerd? Genesis 31:27 Whi woldist thou fle the while Y wiste not, nether woldist shewe to me, that Y shulde sue thee with ioie, and songis, and tympans, and harpis? Genesis 31:28 Thou suffridist not that Y schulde kisse my sones and douytris; thou hast wrouyt folili. Genesis 31:29 And now sotheli myn hond mai yelde yuel to thee, but the God of thi fadir seide to me yisterdai, Be war that thou speke not ony harder thing with Jacob. Genesis 31:30 Suppose, if thou coueitedist to go to thi kynesmen, and the hows of thi fadir was in desir to thee, whi hast thou stole my goddis? Genesis 31:31 Jacob answeride, That Y yede forth while thou wistist not, Y dredde lest thou woldist take awey thi douytris violentli; Genesis 31:32 sotheli that thou repreuest me of thefte, at whom euer thou fyndist thi goddis, be he slayn bifor oure britheren; seke thou, what euer thing of thine thou fyndist at me, and take awei. Jacob seide these thingis, and wiste not that Rachel stal the idols. Genesis 31:33 And so Laban entride into the tabernacle of Jacob, and of Lya, and of euer eithir meyne, and foond not; and whanne Laban hadde entrid in to the tente of Rachel,

Rachel's policy to hide the images.

Genesis 31:34 sche hastide, and hidde the idols vndur the strewyngis of the camel, and sat aboue. And sche seide to Laban, sekynge al the tente and fyndynge no thing, Genesis 31:35 My lord, be not wrooth that Y may not rise bifore thee, for it bifelde now to me bi the custom of wymmen; so the bisynesse of the sekere was scorned.

Jacob's complaint of Laban.

Genesis 31:36 And Jacob bolnyde, and seide with strijf, For what cause of me, and for what synne of me, hast thou come so fersly aftir me, Genesis 31:37 and hast souyt al the portenaunce of myn hous? What hast thou founde of al the catel of thin hows? Putte thou here bifore my britheren and thi britheren, and deme thei betwixe me and thee. Genesis 31:38 Was I with thee herfore twenti yeer? Thi sheep and geet weren not bareyn, Y eet not the rammes of thi flok, Genesis 31:39 nether Y schewide to thee ony thing takun of a beeste; Y yeldide al harm; what euer thing perischide bi thefte, thou axidist of me; Genesis 31:40 Y was angwischid in dai and nyyt with heete and frost, and sleep fledde fro myn iyen; Genesis 31:41 so Y seruede thee bi twenti yeer in thin hows, fourtene yeer for thi douytris, and sixe yeer for thi flockis; and thou chaungidist my mede ten sithis. Genesis 31:42 If God of my fadir Abraham, and the drede of Isaac hadde not helpid me, perauenture now thou haddist left me nakid; the Lord bihelde my turmentyng and the traueyl of myn hondis, and repreuyde thee yistirdai.

The covenant of Laban and Jacob at Galeed.

Genesis 31:43 Laban answeride hym, The douytris, and thi sones, and flockis, and alle thingis whiche thou seest, ben myne, what mai Y do to my sones, and to the sones of sones? Genesis 31:44 Therfor come thou, and make we boond of pees, that it be witnessyng bitwixe me, and thee. Genesis 31:45 And so Jacob took a stoon, and reiside it in to a signe, and seide to hise britheren, Genesis 31:46 Brynge ye stoonus; whiche gadriden, and maden an heep, and eten on it. Genesis 31:47 And Laban clepide it the heep of wittnesse, and Jacob clepide it the heep of witnessyng; euer eithir clepide bi the proprete of his langage. Genesis 31:48 And Laban seide, This heep schal be witnesse bytwixe me and thee to day, and herfor the name therof was clepid Galaad, that is, the heep of witnesse. Genesis 31:49 And Laban addide, The Lord biholde, and deme bitwixe vs, whanne we schulen go awei fro yow; Genesis 31:50 if thou schalt turmente my douytris, and if thou schal brynge yn othere wyues on hem, noon is witnesse of oure word, outakun God, whiche is present, and biholdith. Genesis 31:51 And eft he seide to Jacob, Lo! this heep, and stoon, whiche Y reiside bitwixe me and thee, schal be witnesse; Genesis 31:52 sotheli this heep, and stoon be in to witnessyng, forsothe if Y schal passe it, and go to thee, ether thou shalt passe, and thenke yuel to me. Genesis 31:53 God of Abraham, and God of Nachor, God of the fadir of hem, deme bitwixe vs. Therfor Jacob swoor by the drede of his fadir Ysaac; Genesis 31:54 and whanne slayn sacrifices weren offrid in the hil, he clepyde his britheren to ete breed, and whanne thei hadden ete, thei dwelliden there. Genesis 31:55 Forsothe Laban roos bi nyyt, and kisside his sones, and douytris, and blesside hem, and turnede ayen in to his place.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!