Wycliffe Bible

Genesis 35

God sendeth Jacob to Beth-el.

Genesis 35:1 Yn the mene tyme the Lord spak to Jacob, Ryse thou, and stie to Bethel, and dwelle thou there, and make thou an auter to the Lord, that apperide to thee whanne thou fleddist Esau, thi brother.

He purgeth his house of idols.

Genesis 35:2 Forsothe Jacob seide, whanne al his hous was clepid to gidere, Caste ye a wei alien goddis, that ben in the myddis of you, and be ye clensid, and chaunge ye youre clothis; Genesis 35:3 rise ye, and stie we into Bethel, that we make there an auter to the Lord, which herde me in the dai of my tribulacioun, and was felowe of my weie. Genesis 35:4 Therfor thei yauen to hym alle alien goddis which thei hadden, and eere ryngis, that weren in the eeris of hem; and he deluyde tho vndur a tre, clepid therubynte, which is bihynde the citee of Sichem. Genesis 35:5 And whanne thei yeden, drede assailide alle men by cumpas of the citee, and thei weren not hardi to pursue hem goynge a wei.

He buildeth an altar at Beth-el.

Genesis 35:6 Therfor Jacob cam to Lusa, which is in the lond of Canaan, bi sire name Bethel, he and al his puple with hym. Genesis 35:7 And he bildide there an auter to the Lord, and clepide the name of that place The hows of God, for God apperide there to hym, whanne he fledde his brothir.

Deborah dieth at Allon-bachuth.

Genesis 35:8 Delbora, the nurische of Rebecca, diede in the same tyme, and sche was biried at the roote of Bethel, vndir an ook, and the name of the place was clepid The ook of wepyng.

God blesseth Jacob at Beth-el.

Genesis 35:9 Forsothe God apperide eft to Jacob, aftir that he turnede ayen fro Mesopotanye of Sirie, and cam into Bethel, and blesside hym, Genesis 35:10 and seide, Thou schalt no more be clepid Jacob, but Israel schal be thi name. And God clepide hym Israel, and seide to hym, Genesis 35:11 Y am God Almyyti, encreesse thou, and be thou multiplied, folkis and puplis of naciouns schulen be of thee, kyngis schulen go out of thi leendis; Genesis 35:12 and Y shal yyue to thee, and to thi seed after thee, the lond which Y yaf to Abraham, and Ysaac. Genesis 35:13 And God departide fro hym. Genesis 35:14 Forsothe Jacob reiside a title ether memorial of stoonys, in the place where ynne God spak to hym, and he sacrifiede ther onne fletynge sacrifices, and schedde out oile, Genesis 35:15 and clepide the name of that place Bethel.

Rachel travaileth of Benjamin, and dieth in the way to Ephrath.

Genesis 35:16 Forsothe Jacob yede out fro thennus, and cam in the bigynnynge of somer to the lond that ledith to Effrata; in which lond whanne Rachel trauelide in child beryng, Genesis 35:17 sche bigan to be in perel for the hardnesse of childberyng; and the medewijf seide to hir, Nyle thou drede, for thou schalt haue also this sone. Genesis 35:18 Forsothe while the soule yede out for sorew, and deeth neiyede thanne, she clepide the name of hir sone Bennony, that is, the sone of my sorewe; forsothe the fadir clepide hym Beniamyn, that is the sone of the riyt side. Genesis 35:19 Therfor Rachel diede, and was biriede in the weie that ledith to Effrata, this is Bethleem. Genesis 35:20 And Jacob bildide a title on the sepulcre of hir; this is the title of biriel of Rachel til into present dai.

Genesis 35:21 Jacob yede fro thennus, and settide tabernacle ouer the tour of the flok.

Reuben lieth with Bilhah.

Genesis 35:22 And while he dwellide in that cuntrei, Ruben yede, and slepte with Bala, the secundarie wijf of his fadir, which thing was not hid fro hym. Forsothe the sones of Jacob weren twelue;

The sons of Jacob.

Genesis 35:23 the sones of Lia weren, the firste gendrid Ruben, and Symeon, and Leuy, and Judas, and Isachar, and Zabulon; Genesis 35:24 the sones of Rachel weren, Joseph and Beniamyn; Genesis 35:25 the sones of Bala, handmayde of Rachel, weren Dan, and Neptalym; Genesis 35:26 the sones of Zelfa, handmayde of Lya, weren Gad, and Aser. These weren the sones of Jacob, that weren borun to hym in Mesopotanye of Sirie.

Jacob cometh to Isaac at Hebron.

Genesis 35:27 Also Jacob came to Isaac, his fadir, in to Manbre, a citee Arabee, this is Ebron, in which Manbre Abraham and Isaac was a pylgrym.

The age, death, and burial of Isaac.

Genesis 35:28 And the daies of Isaac weren fillid an hundrid and foure scoore of yeris; Genesis 35:29 and he was wastid in age, and diede, and he was put to his puple, and was eeld, and ful of daies; and Esau and Jacob his sones birieden hym.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!