Jacob is comforted by God at Beer-sheba.
Genesis 46:1 And Israel yede forth with alle thingis that he hadde, and he cam to the pit of ooth; and whanne sacrifices weren slayn there to God of his fadir Isaac, Genesis 46:2 he herde God bi a visioun in that nyyt clepynge hym, and seiynge to hym, Jacob! Jacob! To whom he answeride, Lo! Y am present. Genesis 46:3 God seide to hym, Y am the strongeste God of thi fadir; nyle thou drede, go doun in to Egipt, for Y schal make thee there in to a greet folk; Genesis 46:4 Y schal go doun thidir with thee, and Y schal brynge thee turnynge ayen fro thennus, and Joseph schal sette his hond on thin iyen.
Thence he with his company goeth into Egypt.
Genesis 46:5 Jacob roos fro the pit of ooth, and the sones token him, with her litle children, and wyues, in the waynes whiche Farao hadde sent to bere the eld man, Genesis 46:6 and alle thingis whiche he weldide in the lond of Canaan; and he cam in to Egipt with his seed, Genesis 46:7 hise sones, and her sones, and douytris, and al the generacioun togidere.
The number of his family that went into Egypt.
Genesis 46:8 Forsothe thes ben the names of the sones of Israel, that entriden in to Egipte; he with hise fre children. The firste gendrid Ruben; Genesis 46:9 the sones of Ruben, Enoch, and Fallu, and Esrom, and Carmi.
Genesis 46:10 The sones of Symeon, Jemuhel, and Jamyn, and Ahoth, and Jachyn, and Sab, and Saber, and Saul, the sone of a womman of Canaan.
Genesis 46:11 The sones of Leuy, Gerson, Caath, and Merarie.
Genesis 46:12 The sones of Juda, Her and Onam, and Sela, and Fares, and Zara. Forsothe Her and Onam dieden in the lond of Canaan; and the sones of Fares weren borun, Esrom, and Amul.
Genesis 46:13 The sones of Isacar, Thola, and Fua, and Jobab, and Semron.
Genesis 46:14 The sones of Zabulon, Sared, and Thelom, and Jahel. Genesis 46:15 These ben the sones of Lia, whiche sche childide in Mesopotanye of Sirie, with Dyna, hir douyter; alle the soules of hise sones and douytris, thre and thretti.
Genesis 46:16 The sones of Gad, Sefion, and Aggi, Suny, and Hesebon, Heri, and Arodi, and Areli.
Genesis 46:17 The sones of Aser, Jamne, and Jesua, and Jesui, and Beria; and Sara, the sister of hem. The sones of Beria, Heber and Melchiel. Genesis 46:18 These weren the sones of Zelfa, whom Laban yaf to Lia, his douyter, and Jacob gendryde these sixtene persones. Genesis 46:19 The sones of Rachel, wijf of Jacob, weren Joseph and Beniamyn.
Genesis 46:20 And sones weren borun to Joseph in the loond of Egipt, Manasses and Effraym, whiche Asenech, douytir of Putifar, preest of Helipoleos, childide to hym.
Genesis 46:21 The sones of Beniamin weren Bela, and Becor, and Asbel, Gera, and Naaman, and Jechi, Ros, and Mofym, and Ofym, and Ared. Genesis 46:22 These weren the sones of Rachel, whiche Jacob gendride; alle the persones weren fouretene.
Genesis 46:23 The sone of Dan, Vsym.
Genesis 46:24 The sones of Neptalym, Jasiel, and Guny, and Jeser, and Salem. Genesis 46:25 These weren the sones of Bala, whom Laban yaf to Rachel his douytir. Genesis 46:26 And Jacob gendride these; alle the soules weren seuene. And alle the men that entriden with Jacob in to Egipt, and yeden out of his thiy, with out the wyues of his sones, weren sixti and sixe. Genesis 46:27 Forsothe the sones of Joseph, that weren borun to hym in the loond of Egipt, weren two men. Alle the soulis of the hows of Jacob, that entriden in to Egipt, weren seuenti.
Joseph meeteth Jacob.
Genesis 46:28 Forsothe Jacob sente Judas bifore hym to Joseph, that he schulde telle to hym, and he schulde come in to Gessen. Genesis 46:29 And whanne Jacob hadde come thidir, Joseph stiede in his chare to mete his fadir at the same place. And he siy Jacob, and felde on his necke, and wepte bitwixe collyngis. Genesis 46:30 And the fadir seide to Joseph, Now Y schal die ioiful, for Y siy thi face, and Y leeue thee lyuynge.
He instructeth his brethren how to answer to Pharaoh.
Genesis 46:31 And Joseph spak to hise brithren, and to al the hows of his fadir, I schal stie, and Y schal telle to Farao, and Y schal seie to hym, My britheren, and the hows of my fadir, that weren in the lond of Canaan, ben comun to me, Genesis 46:32 and thei ben men kepers of scheep, and han bisynesse of flockis to be fed; thei brouyten with hem her scheep and grete beestis, and alle thingis whiche thei miyten haue. Genesis 46:33 And whanne Farao schal clepe you, and schal seie, What is youre werk? Genesis 46:34 ye schulen answere, We ben thi seruauntis, men scheepherdis, fro oure childhed til in to present tyme, bothe we and oure fadris. Sotheli ye schulen seye these thingis, that ye moun dwelle in the lond of Gessen, for Egipcians wlaten alle keperis of scheep.