The weakness of the law sacrifices.
Hebrews 10:1 For the lawe hauinge a schadewe of good thingis that ben to come, not the ilke image of thingis, mai neuer make men neiyinge perfit bi the ilke same sacrifices, which thei offren without ceessing bi alle yeeris; Hebrews 10:2 ellis thei schulden haue ceessid to be offrid, for as myche as the worschiperis clensid onys, hadden not ferthermore conscience of synne. Hebrews 10:3 But in hem mynde of synnes is maad bi alle yeris. Hebrews 10:4 For it is impossible that synnes be doon awei bi blood of boolis, and of buckis of geet. Hebrews 10:5 Therfor he entrynge in to the world, seith, Thou woldist not sacrifice and offryng; but thou hast schapun a bodi to me; Hebrews 10:6 brent sacrificis also for synne plesiden not to thee. Hebrews 10:7 Thanne Y seide, Lo! Y come; in the bigynnyng of the book it is writun of me, that Y do thi wille, God. Hebrews 10:8 He seiynge bifor, That thou woldist not sacrificis, and offringis, and brent sacrifices for synne, ne tho thingis ben plesaunt to thee, whiche ben offrid bi the lawe, Hebrews 10:9 thanne Y seide, Lo! Y come, that Y do thi wille, God. He doith awei the firste, that he make stidfast the secounde.
The sacrifice of Christ's body once offered,
Hebrews 10:10 In which wille we ben halewid bi the offring of the bodi of Crist Jhesu onys. Hebrews 10:11 And ech prest is redi mynystrynge ech dai, and ofte tymes offringe the same sacrifices, whiche moun neuere do awei synnes. Hebrews 10:12 But this man offringe o sacrifice for synnes, for euere more sittith in the riythalf of God the fadir; Hebrews 10:13 fro thennus forth abidinge, til hise enemyes ben put a stool of hise feet.
for ever hath taken away sins.
Hebrews 10:14 For bi oon offring he made perfit for euere halewid men. Hebrews 10:15 And the Hooli Goost witnessith to vs; for aftir that he seide, This is the testament, Hebrews 10:16 which Y schal witnesse to hem after tho daies, the Lord seith, in yyuynge my lawes in the hertis of hem, and in the soulis of hem Y schal aboue write hem; Hebrews 10:17 and now Y schal no more thenke on the synnes and the wickidnessis of hem. Hebrews 10:18 And where remyssioun of these is, now is ther noon offring for synne.
An exhortation to hold fast the faith, with patience and thanksgiving.
Hebrews 10:19 Therfor, britheren, hauynge trist in to the entring of hooli thingis in the blood of Crist, Hebrews 10:20 which halewide to vs a newe weie, and lyuynge bi the hiling, that is to seie, Hebrews 10:21 his fleisch, and we hauynge the greet preest on the hous of God, Hebrews 10:22 neiye we with very herte in the plente of feith; and be oure hertis spreined fro an yuel conscience, and oure bodies waischun with clene watir, Hebrews 10:23 and holde we the confessioun of oure hope, bowinge to no side; for he is trewe that hath made the biheeste. Hebrews 10:24 And biholde we togidere in the stiring of charite and of good werkis; not forsakinge oure gadering togidere, Hebrews 10:25 as it is of custom to sum men, but coumfortinge, and bi so myche the more, bi hou myche ye seen the dai neiyynge. Hebrews 10:26 Forwhi now a sacrifice for synnes is not left to vs, that synnen wilfuli, aftir that we han take the knowyng of treuthe. Hebrews 10:27 Forwhi sum abiding of the dom is dreedful, and the suyng of fier, which schal waste aduersaries. Hebrews 10:28 Who that brekith Moises lawe, dieth withouten ony merci, bi tweine or thre witnessis; Hebrews 10:29 hou myche more gessen ye, that he disserueth worse turmentis, which defouleth the sone of God, and holdith the blood of the testament pollut, in which he is halewid, and doith dispit to the spirit of grace? Hebrews 10:30 For we knowen him that seide, To me veniaunce, and Y schal yelde. And eft, For the Lord schal deme his puple. Hebrews 10:31 It is ferdful to falle in to the hondis of God lyuynge. Hebrews 10:32 And haue ye mynde on the formere daies, in which ye weren liytned, and suffriden greet strijf of passiouns. Hebrews 10:33 And in the tothir ye weren maad a spectacle bi schenschipis and tribulaciouns; in an othir ye weren maad felowis of men lyuynge so. Hebrews 10:34 For also to boundun men ye hadden compassioun, and ye resseyueden with ioye the robbyng of youre goodis, knowinge that ye han a betere and a dwellinge substaunce. Hebrews 10:35 Therfor nyle ye leese youre trist, which hath greet rewarding. Hebrews 10:36 For pacience is nedeful to you, that ye do the wille of God, and bringe ayen the biheest. Hebrews 10:37 For yit a litil, and he that is to comynge schal come, and he schal not tarie. Hebrews 10:38 For my iust man lyueth of feith; that if he withdrawith hym silf, he schal not plese to my soule. Hebrews 10:39 But we ben not the sones of withdrawing awei in to perdicioun, but of feith in to getynge of soule.