Wycliffe Bible

Hebrews 12

An exhortation to constant faith, patience, and godliness.

Hebrews 12:1 Therfor we that han so greet a cloude of witnessis put to, do we awei al charge, and synne stondinge aboute vs, and bi pacience renne we to the batel purposid to vs, Hebrews 12:2 biholdinge in to the makere of feith, and the perfit endere, Jhesu; which whanne ioye was purposid to hym, he suffride the cros, and dispiside confusioun, and sittith on the riythalf of the seet of God. Hebrews 12:3 And bithenke ye on hym that suffride siche ayen seiynge of synful men ayens hym silf, that ye be not maad wery, failinge in youre soulis. Hebrews 12:4 For ye ayenstoden not yit til to blood, fiytyng ayens synne. Hebrews 12:5 And ye han foryet the coumfort that spekith to you as to sones, and seith, My sone, nyle thou dispise the teching of the Lord, nether be thou maad weri, the while thou art chastisid of hym. Hebrews 12:6 For the Lord chastisith hym that he loueth; he betith euery sone that he resseyueth. Hebrews 12:7 Abide ye stille in chastising; God proferith hym to you as to sones. For what sone is it, whom the fadir chastisith not? Hebrews 12:8 That if ye ben out of chastising, whos parteneris ben ye alle maad, thanne ye ben auowtreris, and not sones. Hebrews 12:9 And aftirward we hadden fadris of oure fleisch, techeris, and we with reuerence dredden hem. Whethir not myche more we schulen obeische to the fadir of spiritis, and we schulen lyue? Hebrews 12:10 And thei in tyme of fewe dayes tauyten vs bi her wille; but this fadir techith to that thing that is profitable, in resseyuynge the halewing of hym. Hebrews 12:11 And ech chastisyng in present tyme semeth to be not of ioye, but of sorewe; but aftirward it schal yelde fruyt of riytwisnesse moost pesible to men exercisid bi it. Hebrews 12:12 For whiche thing reise ye slowe hondis, and knees vnboundun, Hebrews 12:13 and make ye riytful steppis to youre feet; that no man haltinge erre, but more be heelid. Hebrews 12:14 Sue ye pees with alle men, and holynesse, with out which no man schal se God. Hebrews 12:15 Biholde ye, that no man faile to the grace of God, that no roote of bittirnesse buriownynge vpward lette, and manye ben defoulid bi it; Hebrews 12:16 that no man be letchour, ether vnhooli, as Esau, which for o mete seelde hise firste thingis. Hebrews 12:17 For wite ye, that afterward he coueitinge to enherite blessing, was repreued. For he foond not place of penaunce, thouy he souyte it with teeris. Hebrews 12:18 But ye han not come to the fier able to be touchid, and able to come to, and to the whirlewynd, and myst, and tempest, and soun of trumpe, and vois of wordis; Hebrews 12:19 which thei that herden, excusiden hem, that the word schulde not be maad to hem. Hebrews 12:20 For thei beren not that that was seid, And if a beeste touchide the hil, it was stonyd. Hebrews 12:21 And so dredeful it was that was seyn, that Moises seide, Y am a ferd, and ful of trembling.

A commendation of the New Testament above the Old.

Hebrews 12:22 But ye han come nyy to the hil Sion, and to the cite of God lyuynge, the heuenli Jerusalem, and to the multitude of many thousynde aungels, Hebrews 12:23 and to the chirche of the firste men, whiche ben writun in heuenes, and to God, domesman of alle, and to the spirit of iust perfit men, Hebrews 12:24 and to Jhesu, mediatour of the newe testament, and to the sprenging of blood, betere spekinge than Abel. Hebrews 12:25 Se ye, that ye forsake not the spekere; for if thei that forsaken him that spak on the erthe, aschapide not, myche more we that turnen awei fro him that spekith to vs fro heuenes. Hebrews 12:26 Whos vois than mouyde the erthe, but now he ayen bihetith, and seith, Yit onys and Y schal moue not oneli erthe, but also heuene. Hebrews 12:27 And that he seith, Yit onys, he declarith the translacioun of mouable thingis, as of maad thingis, that tho thingis dwelle, that ben vnmouable. Hebrews 12:28 Therfor we resseyuynge the kingdom vnmouable, haue we grace, bi which serue we plesynge to God with drede and reuerence. Hebrews 12:29 For oure God is fier that wastith.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!