God mustereth the armies of his wrath.
Isaiah 13:1 The birthun of Babiloyne, which birthun Ysaie, the sone of Amos, siy. Isaiah 13:2 Reise ye a signe on a myisti hil, and enhaunse ye vois; reise ye the hond, and duykis entre bi the yatis. Isaiah 13:3 Y haue comaundid to myn halewid men, and Y clepid my stronge men in my wraththe, that maken ful out ioie in my glorie. Isaiah 13:4 The vois of multitude in hillis, as of many puplis; the vois of sown of kyngis, of hethene men gaderit togidere. The Lord of oostis comaundide to the chyualry of batel, Isaiah 13:5 to men comynge fro a fer lond. The Lord cometh fro the hiynesse of heuene, and the vessels of his strong veniaunce, that he distrie al the lond.
He threateneth to destroy Babylon by the Medes.
Isaiah 13:6 Yelle ye, for the dai of the Lord is niy; as wastyng it schal come of the Lord. Isaiah 13:7 For this thing alle hondis schulen be vnmyyti, and eche herte of man schal faile, Isaiah 13:8 and schal be al to-brokun. Gnawyngis and sorewis schulen holde Babiloyns; thei schulen haue sorewe, as they that trauelen of child. Ech man schal wondre at his neiybore; her cheris schulen be brent faces. Isaiah 13:9 Lo! the dai of the Lord schal come, cruel, and ful of indignacioun, and of wraththe, and of woodnesse; to sette the lond into wildirnesse, and to al to-breke the synneris therof fro that lond. Isaiah 13:10 For whi the sterris of heuene and the schynyng of tho schulen not sprede abrood her liyt; the sunne is maade derk in his risyng, and the moone schal not schine in hir liyt. Isaiah 13:11 And Y schal visite on the yuels of the world, and Y schal visite ayens wickid men the wickidnesse of hem; and Y schal make the pride of vnfeithful men for to reste, and Y schal make low the boost of stronge men. Isaiah 13:12 A man of ful age schal be preciousere than gold, and a man schal be preciousere than pure gold and schynyng. Isaiah 13:13 On this thing I schal disturble heuene, and the erthe schal be moued fro his place; for the indignacioun of the Lord of oostis, and for the dai of wraththe of his strong veniaunce. Isaiah 13:14 And it schal be as a doo fleynge, and as a scheep, and noon schal be that schal gadere togidere; ech man schal turne to his puple, and alle bi hem silf schulen fle to her lond. Isaiah 13:15 Ech man that is foundun, schal be slayn; and ech man that cometh aboue, schal falle doun bi swerd. Isaiah 13:16 The yonge children of them schulen be hurtlid doun bifore the iyen of them; her housis schulen be rauischid, and her wyues schulen be defoulid. Isaiah 13:17 Lo! Y schal reise on them Medeis, that seken not siluer, nethir wolen gold; Isaiah 13:18 but thei shulen sle litle children bi arowis, and thei schulen not haue merci on wombis yyuynge mylk, and the iye of them schal not spare on sones.
The desolation of Babylon.
Isaiah 13:19 And Babiloyne, thilke gloriouse citee in rewmes, noble in the pride of Caldeis, schal be destried, as God destried Sodom and Gomore. Isaiah 13:20 It shall not be enhabitid til in to the ende, and it schal not be foundid til to generacioun and generacioun; a man of Arabie schal not sette tentis there, and scheepherdis schulen not reste there. Isaiah 13:21 But wielde beestis schulen reste there, and the housis of hem schulen be fillid with dragouns; and ostrichis schulen dwelle there, and heeri beestis schulen skippe there. Isaiah 13:22 And bitouris schulen answere there in the housis therof, and fliynge serpentis in the templis of lust.