Under the parable of a vineyard God excuseth his severe judgment.
Isaiah 5:1 I schal synge for my derlyng the song of myn vnclis sone, of his vyner. A vyner was maad to my derlyng, in the horne in the sone of oile. Isaiah 5:2 And he heggide it, and chees stoonys therof, and plauntide a chosun vyner; and he bildide a tour in the myddis therof, and rerede a presse ther ynne; and he abood, that it schulde bere grapis, and it bare wielde grapis. Isaiah 5:3 Now therfor, ye dwelleris of Jerusalem, and ye men of Juda, deme bitwixe me and my viner. Isaiah 5:4 What is it that Y ouyt to do more to my vyner, and Y dide not to it? whether that Y abood, that it schulde bere grapis, and it bare wielde grapis? Isaiah 5:5 And now Y schal schewe to you, what Y schal do to my vyner. Y schal take awei the hegge therof, and it schal be in to rauyschyng; Y schal caste doun the wal therof, and it schal be in to defoulyng; and Y schal sette it desert, Isaiah 5:6 ether forsakun. It schal not be kit, and it schal not be diggid, and breris and thornes schulen growe vp on it; and Y schal comaunde to cloudis, that tho reyne not reyn on it. Isaiah 5:7 Forsothe the vyner of the Lord of oostis is the hous of Israel, and the men of Juda ben the delitable buriownyng of hym. Y abood, that it schal make doom, and lo! wickidnesse; and that it schulde do riytfulnesse, and lo! cry.
His judgments upon covetousness,
Isaiah 5:8 Wo to you that ioynen hows to hous, and couplen feeld to feeld, til to the ende of place. Whether ye aloone schulen dwelle in the myddis of the lond? Isaiah 5:9 These thingis ben in the eeris of me, the Lord of oostis; if many housis ben not forsakun, grete housis and faire, with outen dwellere, bileue ye not to me. Isaiah 5:10 For whi ten acris of vynes schulen make a potel, and thretti buschels of seed schulen make thre buschels.
Isaiah 5:11 Wo to you that risen togidere eerli to sue drunkennesse, and to drinke til to euentid, that ye brenne with wyn. Isaiah 5:12 Harpe, and giterne, and tympan, and pipe, and wyn ben in youre feestis; and ye biholden not the werk of the Lord, nether ye biholden the werkis of hise hondis.
Isaiah 5:13 Therfor my puple is led prisoner, for it hadde not kunnyng; and the noble men therof perischiden in hungur, and the multitude therof was drye in thirst. Isaiah 5:14 Therfor helle alargide his soule, and openyde his mouth with outen ony ende; and strong men therof, and the puple therof, and the hiy men, and gloriouse men therof, schulen go doun to it. Isaiah 5:15 And a man schal be bowid doun, and a man of age schal be maad low; and the iyen of hiy men schulen be pressid doun. Isaiah 5:16 And the Lord of oostis schal be enhaunsid in doom, and hooli God schal be halewid in riytfulnesse. Isaiah 5:17 And lambren schulen be fed bi her ordre, and comelyngis schulen ete desert places turned in to plentee. Isaiah 5:18 Wo to you that drawen wickydnesse in the cordis of vanyte, and drawen synne as the boond of a wayn; and ye seien, Isaiah 5:19 The werk of hym haaste, and come soone, that we se; and the counsel of the hooli of Israel neiy, and come, and we schulen knowe it.
and upon injustice.
Isaiah 5:20 Wo to you that seien yuel good, and good yuel; and putten derknessis liyt, and liyt derknessis; and putten bittir thing in to swete, and swete thing in to bittir. Isaiah 5:21 Wo to you that ben wise men in youre iyen, and ben prudent bifor you silf. Isaiah 5:22 Wo to you that ben myyti to drynke wyn, and ben stronge to meddle drunkenesse; Isaiah 5:23 and ye iustifien a wickid man for yiftis, and ye taken awei the riytfulnesse of a iust man fro hym. Isaiah 5:24 For this thing, as the tunge of fier deuourith stobil, and the heete of flawme brenneth, so the roote of hem schal be as a deed sparcle, and the seed of hem schal stie as dust; for thei castiden awei the lawe of the Lord of oostis, and blasfemyden the speche of the hooli of Israel. Isaiah 5:25 Therfor the strong veniaunce of the Lord was wrooth ayens his puple, and he stretchide forth his hond on it, and smoot it; and hillis weren disturblid, and the deed bodies of hem weren maad as a toord in the myddis of stretis. In alle these thingis the stronge vengeaunce of him was not turned awei, but yit his hond was stretchid forth.
The executioners of God's judgments.
Isaiah 5:26 And he schal reise a signe among naciouns afer, and he schal hisse to hym fro the endis of erthe; and lo! he schal haaste, and schal come swiftli. Isaiah 5:27 Noon is failynge nethir trauelynge in that oost; he schal not nappe, nether slepe, nether the girdil of his reynes schal be vndo, nether the lace of his scho schal be brokun. Isaiah 5:28 Hise arowis ben scharpe, and alle hise bowis ben bent; the houys of hise horsis ben as a flynt, and hise wheelis ben as the feersnesse of tempest. Isaiah 5:29 His roryng schal be as of lioun; he schal rore as the whelpis of liouns; and he schal gnaste, and schal holde prey, and schal biclippe, and noon schal be, that schal delyuere. Isaiah 5:30 And he schal sowne on it in that dai, as doith the soun of the see; we schulen biholde in to the erthe, and lo! derknessis of tribulacioun, and liyt is maad derk in the derknesse therof.