Job curseth the day and services of his birth.
Job 3:1 Aftir these thingis Joob openyde his mouth, and curside his dai, Job 3:2 and seide, Job 3:3 Perische the dai in which Y was borun, and the nyyt in which it was seid, The man is conceyued. Job 3:4 Thilke dai be turnede in to derknessis; God seke not it aboue, and be it not in mynde, nethir be it liytned with liyt. Job 3:5 Derknessis make it derk, and the schadewe of deeth and myist occupie it; and be it wlappid with bittirnesse. Job 3:6 Derk whirlwynde holde that niyt; be it not rikynyd among the daies of the yeer, nethir be it noumbrid among the monethes. Job 3:7 Thilke nyyt be soleyn, and not worthi of preisyng. Job 3:8 Curse thei it, that cursen the dai, that ben redi to reise Leuyathan. Job 3:9 Sterris be maad derk with the derknesse therof; abide it liyt, and se it not, nethir the bigynnyng of the morwetid risyng vp. Job 3:10 For it closide not the doris of the wombe, that bar me, nethir took awei yuels fro min iyen. Job 3:11 Whi was not Y deed in the wombe? whi yede Y out of the wombe, and perischide not anoon? Job 3:12 Whi was Y takun on knees? whi was Y suclid with teetis?
The ease of death.
Job 3:13 For now Y slepynge schulde be stille, and schulde reste in my sleep, Job 3:14 with kyngis, and consuls of erthe, that bilden to hem soleyn places; Job 3:15 ethir with prynces that han gold in possessioun, and fillen her housis with siluer; Job 3:16 ethir as a thing hid not borun Y schulde not stonde, ethir whiche conseyued sien not liyt. Job 3:17 There wickid men ceessiden of noise, and there men maad wery of strengthe restiden. Job 3:18 And sum tyme boundun togidere with out disese thei herden not the voys of the wrongful axere. Job 3:19 A litil man and greet man be there, and a seruaunt free fro his lord.
He complaineth of life, because of his anguish.
Job 3:20 Whi is liyt youun to the wretche, and lijf to hem that ben in bitternesse of soule? Job 3:21 Whiche abiden deeth, and it cometh not; as men diggynge out tresour Job 3:22 and ioien greetly, whanne thei han founde a sepulcre? Job 3:23 Whi is liyt youun to a man, whos weie is hid, and God hath cumpassid hym with derknessis? Job 3:24 Bifore that Y ete, Y siyhe; and as of watir flowynge, so is my roryng. Job 3:25 For the drede, which Y dredde, cam to me; and that, that Y schamede, bifelde. Job 3:26 Whether Y dissymilide not? whether Y was not stille? whether Y restide not? and indignacioun cometh on me.