Wycliffe Bible

John 19

Christ is scourged, crowned with thorns, and beaten.

John 19:1 Therfor Pilat took thanne Jhesu, and scourgide. John 19:2 And kniytis writhen a coroun of thornes, and setten on his heed, and diden aboute hym a cloth of purpur, John 19:3 and camen to him, and seiden, Heil, kyng of Jewis. And thei yauen to him buffatis.

Pilate is desirous to release him, but being overcome with the outrage of the Jews, he delivered him to be crucified.

John 19:4 Eftsoone Pilat wente out, and seide to hem, Lo! Y brynge hym out to you, that ye knowe, that Y fynde no cause in him. John 19:5 And so Jhesus wente out, berynge a coroun of thornes, and a cloth of purpur. And he seith to hem, Lo! the man. John 19:6 But whanne the bischopis and mynystris hadden seyn hym, thei crieden, and seiden, Crucifie, crucifie hym. Pilat seith to hem, Take ye hym, and crucifie ye, for Y fynde no cause in hym. John 19:7 The Jewis answeriden to hym. We han a lawe, and bi the lawe he owith to die, for he made hym Goddis sone.

John 19:8 Therfor whanne Pilat hadde herd this word, he dredde the more. John 19:9 And he wente in to the moot halle eftsoone, and seide to Jhesu, Of whennus art thou? But Jhesus yaf noon answere to him. John 19:10 Pilat seith to him, Spekist thou not to me? Woost thou not, that Y haue power to crucifie thee, and Y haue power to delyuere thee? John 19:11 Jhesus answeride, Thou schuldist not haue ony power ayens me, but it were youun to thee from aboue; therfor he that bitook me to thee, hath the more synne. John 19:12 Fro that tyme Pilat souyte to delyuere hym; but the Jewis crieden, and seiden, If thou delyuerist this man, thou art not the emperouris freend; for ech man that makith hym silf king, ayen seith the emperoure.

John 19:13 And Pilat, whanne he hadde herd these wordis, ledde Jhesu forth, and sat for domesman in a place, that is seid Licostratos, but in Ebrew Golgatha. John 19:14 And it was pask eue, as it were the sixte our. And he seith to the Jewis, Lo! youre king. John 19:15 But thei crieden, and seiden, Take awei, take awei; crucifie him. Pilat seith to hem, Schal I crucifie youre king? The bischops answeriden, We han no king but the emperour. John 19:16 And thanne Pilat bitook him to hem, that he schulde be crucified. And thei token Jhesu, and ledden him out. John 19:17 And he bar to hym silf a cros, and wente out in to that place, that is seid of Caluarie, in Ebreu Golgatha; John 19:18 where thei crucifieden him, and othere tweyne with him, oon on this side and oon on that side, and Jhesus in the myddil.

John 19:19 And Pilat wroot a title, and sette on the cros; and it was writun, Jhesu of Nazareth, king of Jewis. John 19:20 Therfor manye of the Jewis redden this title, for the place where Jhesus was crucified, was niy the citee, and it was writun in Ebreu, Greek, and Latyn. John 19:21 Therfor the bischops of the Jewis seiden to Pilat, Nyle thou write kyng of Jewis, but for he seide, Y am king of Jewis. John 19:22 Pilat answeride, That that Y haue writun, Y haue writun.

They cast lots for his garments.

John 19:23 Therfor the knyytis whanne thei hadden crucified hym, token hise clothis, and maden foure partis, to ech knyyt a part, and a coot. And the coot was without seem, and wouun al aboute. John 19:24 Therfor thei seiden togidere, Kitte we not it, but caste we lot, whos it is; that the scripture be fulfillid, seiynge, Thei partiden my clothis to hem, and on my cloth thei casten lot. And the kniytis diden these thingis.

John 19:25 But bisidis the cros of Jhesu stoden his modir, and the sistir of his modir, Marie Cleofe, and Marie Maudeleyne.

He commendeth his mother to John.

John 19:26 Therfor whanne Jhesu hadde seyn his modir, and the disciple stondynge, whom he louyde, he seith to hise modir, Womman, lo thi sone. John 19:27 Aftyrward he seith to the disciple, Lo! thi modir. And fro that our the disciple took hir in to his modir.

He dieth.

John 19:28 Aftirward Jhesus witynge, that now alle thingis ben endid, that the scripture were fulfillid, he seith, Y thirste. John 19:29 And a vessel was set ful of vynegre. And thei leiden in isope aboute the spounge ful of vynegre, and putten to his mouth. John 19:30 Therfor whanne Jhesus hadde takun the vynegre, he seid, It is endid. And whanne his heed was bowid doun, he yaf vp the goost.

His side is pierced.

John 19:31 Therfor for it was the pask eue, that the bodies schulden not abide on the cros in the sabat, for that was a greet sabat dai, the Jewis preiden Pilat, that the hipis of hem schulden be brokun, and thei takun awei. John 19:32 Therfor knyytis camen, and thei braken the thies of the firste, and of the tothere, that was crucified with hym. John 19:33 But whanne thei weren comun to Jhesu, as thei sayn him deed thanne, thei braken not hise thies; John 19:34 but oon of the knyytis openyde his side with a spere, and anoon blood and watir wenten out. John 19:35 And he that saiy, bare witnessyng, and his witnessing is trewe; and he woot that he seith trewe thingis, that ye bileue. John 19:36 And these thingis weren don, that the scripture schulde be fulfillid, Ye schulen not breke a boon of hym. John 19:37 And eftsoone another scripture seith, Thei schulen se in whom thei piyten thorow.

He is buried by Joseph and Nicodemus.

John 19:38 But after these thingis Joseph of Armathi preyede Pilat, that he schulde take awei the bodi of Jhesu, for that he was a disciple of Jhesu, but priui for drede of the Jewis. And Pilat suffride. And so he cam, and took awei the bodi of Jhesu. John 19:39 And Nychodeme cam also, that hadde come to hym first bi nyyt, and brouyte a meddlynge of myrre and aloes, as it were an hundrid pound. John 19:40 And thei token the bodi of Jhesu, and boundun it in lynun clothis with swete smellynge oynementis, as it is custom to Jewis for to birie. John 19:41 And in the place where he was crucified, was a yerd, and in the yerd a newe graue, in which yit no man was leid. John 19:42 Therfor there thei putten Jhesu, for the vigilie of Jewis feeste, for the sepulcre was niy.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!