Christ turneth water into wine,
John 2:1 And the thridde dai weddyngis weren maad in the Cane of Galilee; and the modir of Jhesu was there. John 2:2 And Jhesus was clepid, and hise disciplis, to the weddyngis. John 2:3 And whanne wijn failide, the modir of Jhesu seide to hym, Thei han not wijn. John 2:4 And Jhesus seith to hir, What to me and to thee, womman? myn our cam not yit. John 2:5 His modir seith to the mynystris, What euere thing he seie to you, do ye. John 2:6 And there weren set sixe stonun cannes, aftir the clensyng of the Jewis, holdynge ech tweyne ether thre metretis. John 2:7 And Jhesus seith to hem, Fille ye the pottis with watir. And thei filliden hem, vp to the mouth. John 2:8 And Jhesus seide to hem, Drawe ye now, and bere ye to the architriclyn. And thei baren. John 2:9 And whanne the architriclyn hadde tastid the watir maad wiyn, and wiste not wherof it was, but the mynystris wisten that drowen the watir, the architriclyn clepith the spouse, John 2:10 and seith to hym, Ech man settith first good wiyn, and whanne men ben fulfillid, thanne that that is worse; but thou hast kept the good wiyn in to this tyme. John 2:11 Jhesus dide this the bigynnyng of signes in the Cane of Galilee, and schewide his glorie; and hise disciplis bileueden in hym.
departeth into Capernaum, and to Jerusalem,
John 2:12 Aftir these thingis he cam doun to Cafarnaum, and his modir, and hise britheren, and hise disciplis; and thei dwelliden there not many daies.
John 2:13 And the pask of Jewis was nyy, and Jhesus wente vp to Jerusalem.
where he purgeth the Temple of buyers and sellers.
John 2:14 And he foond in the temple men sillynge oxun, and scheep, and culueris, and chaungeris sittynge. John 2:15 And whanne he hadde maad as it were a scourge of smale cordis, he droof out alle of the temple, and oxun, and scheep; and he schedde the money of chaungeris, and turnede vpsedoun the boordis. John 2:16 And he seide to hem that selden culueris, Take awei fro hennus these thingis, and nyle ye make the hous of my fadir an hous of marchaundise. John 2:17 And hise disciplis hadden mynde, for it was writun, The feruent loue of thin hous hath etun me.
John 2:18 Therfor the Jewis answeriden, and seiden to hym, What token schewist thou to vs, that thou doist these thingis?
He foretelleth his death and resurrection.
John 2:19 Jhesus answerde, and seide to hem, Vndo ye this temple, and in thre daies Y schal reise it. John 2:20 Therfor the Jewis seiden to hym, In fourti and sixe yeer this temple was bildid, and schalt thou in thre daies reise it? John 2:21 But he seide of the temple of his bodi. John 2:22 Therfor whanne he was risun fro deeth, hise disciplis hadden mynde, that he seide these thingis of his bodi; and thei bileueden to the scripture, and to the word that Jhesus seide.
Many believed because of his miracles, but he would not trust himself with them.
John 2:23 And whanne Jhesus was at Jerusalem in pask, in the feeste dai, many bileueden in his name, seynge his signes that he dide. John 2:24 But Jhesus trowide not hym silf to hem, for he knewe alle men; John 2:25 and for it was not nede to hym, that ony man schulde bere witnessyng, for he wiste, what was in man.