The faithful bewail their calamities.
Lamentations 3:1 Aleph. I am a man seynge my pouert in the yerde of his indignacioun. Lamentations 3:2 Aleph. He droof me, and brouyte in to derknessis, and not in to liyt. Lamentations 3:3 Aleph. Oneli he turnede in to me, and turnede togidere his hond al dai. Lamentations 3:4 Beth. He made eld my skyn, and my fleisch; he al to-brak my boonys. Lamentations 3:5 Beth. He bildid in my cumpas, and he cumpasside me with galle and trauel. Lamentations 3:6 Beth. He settide me in derk places, as euerlastynge deed men. Lamentations 3:7 Gymel. He bildide aboute ayens me, that Y go not out; he aggregide my gyues. Lamentations 3:8 Gymel. But and whanne Y crie and preye, he hath excludid my preier. Lamentations 3:9 Gymel. He closide togidere my weies with square stoonus; he distriede my pathis. Lamentations 3:10 Deleth. He is maad a bere settinge aspies to me, a lioun in hid places. Lamentations 3:11 Deleth. He distriede my pathis, and brak me; he settide me desolat. Lamentations 3:12 Deleth. He bente his bowe, and settide me as a signe to an arowe. Lamentations 3:13 He. He sente in my reynes the douytris of his arowe caas. Lamentations 3:14 He. Y am maad in to scorn to al the puple, the song of hem al dai. Lamentations 3:15 He. He fillide me with bitternesses; he gretli fillide me with wermod. Lamentations 3:16 Vau. He brak at noumbre my teeth; he fedde me with aische. Lamentations 3:17 Vau. And my soule is putte awei; Y haue foryete goodis. Lamentations 3:18 Vau. And Y seide, Myn ende perischide, and myn hope fro the Lord. Lamentations 3:19 Zai. Haue thou mynde on my pouert and goyng ouer, and on wermod and galle. Lamentations 3:20 Zai. Bi mynde Y schal be myndeful; and my soule schal faile in me. Lamentations 3:21 Zai. Y bithenkynge these thingis in myn herte, schal hope in God.
By the mercies of God they nourish their hope.
Lamentations 3:22 Heth. The mercies of the Lord ben manye, for we ben not wastid; for whi hise merciful doyngis failiden not. Lamentations 3:23 Heth. Y knew in the morewtid; thi feith is miche. Lamentations 3:24 Heth. My soule seide, The Lord is my part; therfor Y schal abide hym. Lamentations 3:25 Teth. The Lord is good to hem that hopen in to hym, to a soule sekynge hym. Lamentations 3:26 Teth. It is good to abide with stilnesse the helthe of God. Lamentations 3:27 Teth. It is good to a man, whanne he hath bore the yok fro his yongthe. Lamentations 3:28 Joth. He schal sitte aloone, and he schal be stille; for he reiside hym silf aboue hym silf. Lamentations 3:29 Joth. He schal sette his mouth in dust, if perauenture hope is. Lamentations 3:30 Joth. He schal yyue the cheke to a man that smytith hym; he schal be fillid with schenschipis. Lamentations 3:31 Caph. For the Lord schal not putte awei with outen ende. Lamentations 3:32 Caph. For if he castide awei, and he schal do merci bi the multitude of hise mercies. Lamentations 3:33 Caph. For he makide not low of his herte; and castide not awei the sones of men. Lameth. Lamentations 3:34 That he schulde al to-foule vndur hise feet alle the boundun men of erthe. Lameth. Lamentations 3:35 That he schulde bowe doun the dom of man, in the siyt of the cheer of the hiyeste. Lamentations 3:36 Lameth. That he schulde peruerte a man in his dom, the Lord knew not.
They acknowledge God's justice.
Lamentations 3:37 Men. Who is this that seide, that a thing schulde be don, whanne the Lord comaundide not? Lamentations 3:38 Men. Nether goodis nether yuels schulen go out of the mouth of the hiyeste. Lamentations 3:39 Men. What grutchide a man lyuynge, a man for hise synnes? Lamentations 3:40 Nun. Serche we oure weies, and seke we, and turne we ayen to the Lord. Lamentations 3:41 Nun. Reise we oure hertis with hondis, to the Lord in to heuenes. Lamentations 3:42 Nun. We han do wickidli, and han terrid thee to wraththe; therfor thou art not able to be preied. Lamentations 3:43 Sameth. Thou hilidist in stronge veniaunce, and smitidist vs; thou killidist, and sparidist not. Lamentations 3:44 Sameth. Thou settidist a clowde to thee, that preier passe not. Lamentations 3:45 Sameth. Thou settidist me, drawing vp bi the roote, and castynge out, in the myddis of puplis. Lamentations 3:46 Ayn. Alle enemyes openyden her mouth on vs. Lamentations 3:47 Ayn. Inward drede and snare is maad to vs, profesie and defoulyng. Lamentations 3:48 Ayn. Myn iyen ledden doun departyngis of watris, for the defoulyng of the douyter of my puple. Lamentations 3:49 Phe. Myn iye was turmentid, and was not stille; for no reste was. Lamentations 3:50 Phe. Vntil the Lord bihelde, and siy fro heuenes. Lamentations 3:51 Phe. Myn iye robbide my soule in alle the douytris of my citee. Lamentations 3:52 Sade. Myn enemyes token me with out cause, bi huntyng as a brid. Lamentations 3:53 Sade. My lijf slood in to a lake; and thei puttiden a stoon on me. Lamentations 3:54 Sade. Watris flowiden ouer myn heed; Y seide, Y perischide.
They pray for deliverance,
Lamentations 3:55 Coph. Lord, Y clepide to help thi name, fro the laste lake. Lamentations 3:56 Coph. Thou herdist my vois; turne thou not awei thin eere fro my sobbyng and cries. Lamentations 3:57 Coph. Thou neiyidist to me in the dai, wherynne Y clepide thee to help; thou seidist, Drede thou not. Lamentations 3:58 Res. Lord, ayenbiere of my lijf, thou demydist the cause of my soule. Lamentations 3:59 Res. Lord, thou siest the wickidnesse of hem ayens me; deme thou my doom. Lamentations 3:60 Res. Thou siest al the woodnesse, alle the thouytis of hem ayenus me. Lamentations 3:61 Syn. Lord, thou herdist the schenshipis of hem; alle the thouytis of hem ayens me. Lamentations 3:62 Syn. The lippis of men risynge ayens me, and the thouytis of hem ayens me al dai. Lamentations 3:63 Syn. Se thou the sittynge and risyng ayen of hem; Y am the salm of hem.
and vengeance on their enemies.
Lamentations 3:64 Thau. Lord, thou schalt yelde while to hem, bi the werkis of her hondis. Lamentations 3:65 Tau. Thou schalt yyue to hem the scheeld of herte, thi trauel. Lamentations 3:66 Tau. Lord, thou schalt pursue hem in thi strong veniaunce, and thou schalt defoule hem vndur heuenes.