Wycliffe Bible

Leviticus 16

How the high priest must enter into the holy place.

Leviticus 16:1 And the Lord spak to Moises, aftir the deeth of the twei sones of Aaron, whanne thei offriden alien fier, and weren slayn, and comaundide to hym, Leviticus 16:2 and seide, Speke thou to Aaron, thi brother, that he entre not in al tyme in to the seyntuarie, which is with ynne the veil bifor the propiciatorie, bi which the arke is hilid, that he die not; for Y schal appere in a cloude on Goddis answeryng place; Leviticus 16:3 no but he do these thingis bifore. He schal offer a calf for synne, and a ram in to brent sacrifice; Leviticus 16:4 he schal be clothid with a lynnun coote, he schal hide the schamefast membris with pryuy lynnun clothis; he schal be gird with a lynnun girdil, he schal putte a lynnun mytre on his heed; for these clothis ben hooli, with whiche alle he schal be clothid, whanne he is waischun. Leviticus 16:5 And he schal take of al the multitude of the sones of Israel twei kidis for synne, and o ram in to brent sacrifice; Leviticus 16:6 and whanne he offrith a calf, and preieth for hym, Leviticus 16:7 and for his hows, he schal make twei buckis of geet to stonde bifor the Lord, in the dore of the tabernacle of witnessyng; Leviticus 16:8 and he schal sende on euer eithir, o lot to the Lord, and another lot to the goot that schal be sent out. Leviticus 16:9 Whos lot goith out to the Lord, he schal offre it for synne; Leviticus 16:10 sotheli whos lot goith out in to goot that schal be sent out, he schal sette hym quyk bifor the Lord, that he sende preyers on hym, and sende hym out in to wildirnesse.

The sin offering for himself.

Leviticus 16:11 Whanne these thingis ben doon riytfuli, he schal offre the calf, and he schal preye for hym silf, and for his hows, and schal offre the calf. Leviticus 16:12 And whanne he hath take the censeer, which he hath fillid of the coolis of the auter, and he hath take in hond the swete smellynge spicery maad into encense, he schal entre ouer the veil in to the hooli thingis; Leviticus 16:13 that whanne swete smellynge spiceries ben put on the fier, the cloude and vapour of tho hile Goddis answeryng place, which is on the witnessyng, and he die not. Leviticus 16:14 Also he schal take of the blood of the calf, and he schal sprenge seuensithis with the fyngur ayens the propiciatorie, to the eest.

The sin offering for the people.

Leviticus 16:15 And whanne he hath slayn the buk of geet, for synne of the puple, he schal brynge in the blood therof with ynne the veil, as it is comaundid of the blood of the calf, that he sprynge euene ayens Goddis answeryng place, Leviticus 16:16 and he schal clense the seyntuarie fro vnclennessis of the sones of Israel, and fro her trespassyngis, and alle synnes. Bi this custom he schal do in the tabernacle of witnessyng, which is set among hem, in the myddis of partis of the abitacioun of hem. Leviticus 16:17 No man be in the tabernacle, whanne the bischop schal entre in to the seyntuarie, that he preye for hym silf, and for his hows, and for al the cumpeny of Israel, til he go out of the tabernacle. Leviticus 16:18 Sotheli whanne he hath go out to the auter which is bifor the Lord, preye he for hym silf, and schede he on the hornes therof, bi cumpas, the blood that is takun of the calf, and of the buk of geet; Leviticus 16:19 and sprynge he seuensithis with the fyngur, and clense he, and halewe the autir fro vnclennessis of the sones of Israel.

The scapegoat.

Leviticus 16:20 Aftir that he hath clensid the seyntuarie, and tabernacle, and auter, thanne offre he the lyuynge buc of geet; Leviticus 16:21 and whanne euer eithir hond is set on the heed therof, knowleche the preest alle the wickidnessis of the sones of Israel, and alle the trespassis and synnes of hem, whiche the preest schal wische to the heed therof, and schal sende hym out in to deseert bi a man maad redi. Leviticus 16:22 And whanne the buc of geet hath bore alle the wickidnessis of hem in to a deseert lond, Leviticus 16:23 and is left in deseert, Aaron schal turn ayen in to the tabernacle of witnessyng; and whanne the clothis ben put of, in whiche he was clothid bifore, whanne he entrid in to the seyntuarie of God, and ben left there, Leviticus 16:24 he schal waische his fleisch in the hooli place, and he schal be clothid in his owen clothis, and aftir that he hath go out, and hath offrid the brent sacrifice of hym silf, and of the puple, he schal preye as wel for hym silf, as for the puple; Leviticus 16:25 and he schal brenne on the auter the innere fatnesse which is offrid for synne. Leviticus 16:26 Sotheli he that leet go the buk of geet able to be sent out, schal waische hise clothis and bodi with water, and so he schal entre in to the castels. Leviticus 16:27 Forsothe thei schulen bere out of the castels the calf and buk of geet, that weren offrid for synne, and whos blood was brouyt in to the seyntuarie, that the clensyng were fillid; and thei schulen brenne bi fier as well the skynnys, as the fleischis and dung of tho. Leviticus 16:28 And who euer brenneth tho, schal waische hise clothis and fleisch in watir, and so he schal entre in to the castels.

The yearly feast of the expiations.

Leviticus 16:29 And this schal be to you a lawful thing euerlastynge; in the seuenthe monethe, in the tenthe dai of the monethe, ye schulen turment youre soulis, and ye schulen not do ony werk, nethir a man borun in the lond, nether a comelyng which is a pilgrym among you. Leviticus 16:30 The delyueryng fro synne, and the clensyng of you schal be in this dai, ye schulen be clensid bifore the Lord fro alle youre synnes; Leviticus 16:31 for it is sabat of restyng, and ye schulen turment youre soulis bi euerlastynge religioun. Leviticus 16:32 Sotheli the preest schal clense, which is anoyntid, and whos hondis ben halewid, that he be set in preesthod for his fadir; and he schal be clothid in a lynnun stoole, and in hooli clothis, Leviticus 16:33 and he schal clense the seyntuarie, and the tabernacle of witnessyng, and the auter, and the preestis, and al the puple. Leviticus 16:34 And this schal be to you a lawful thing euerlastynge, that ye preye for the sones of Israel, and for alle the synnes of hem, onys in the yeer. Therfor he dide, as the Lord comaundide to Moises.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!