The Sabbath of the seventh year.
Leviticus 25:1 And the Lord spak to Moises in the hil of Synai, and seide, Leviticus 25:2 Speke thou to the sones of Israel, and thou schalt seye to hem, Whanne ye han entrid in to the lond which Y schal yyue to you, the erthe kepe the sabat of the Lord; Leviticus 25:3 sixe yeeris thou schalt sowe thi feeld, and sixe yeeris thou schalt kitte thi vyner, and thou schalt gadere the fruytis ther of; Leviticus 25:4 forsothe in the seuenthe yeer schal be sabat of the erthe of the restyng of the Lord; Leviticus 25:5 thou schalt not sowe the feeld, and thou schalt not kitte the vyner, thou schalt not repe tho thingis whiche the erthe bryngith forth bi fre wille, and thou schalt not gadere the grapis of thi firste fruytis, as vyndage; for it is the yeer of restyng of the lond; but tho schulen be to you in to mete, Leviticus 25:6 to thee, and to thi seruaunt, to thin handmaide, and to thin hirid man, and to the comelyng which is a pilgrym at thee; alle thingis that comen forth, Leviticus 25:7 schulen yyue mete to thi werk beestis and smale beestis.
The jubile in the fiftieth year.
Leviticus 25:8 Also thou schalt noumbre to thee seuene woukis of yeeris, that is, seuene sithes seuene, whiche togidere maken nyn and fourti yeer; Leviticus 25:9 and thou schalt sowne with a clarioun in the seuenthe monethe, in the tenthe dai of the monethe, in the tyme of propiciacioun, that is, merci, in al youre lond. Leviticus 25:10 And thou schalt halewe the fiftithe yeer, and thou schalt clepe remissioun to alle the dwellers of thi lond; for thilke yeer is iubilee; a man schal turne ayen to hys possessioun, and ech man schal go ayen to the firste meynee, Leviticus 25:11 for it is iubilee, and the fiftithe yeer. Ye schulen not sowe, nether ye schulen repe thingis, that comen forth freli in the feeld, and ye schulen not gadere the firste fruytis of vyndage, for the halewyng of iubilee; Leviticus 25:12 but anoon ye schulen ete thingis takun awey; Leviticus 25:13 in the yeer of iubilee alle men go ayen to her possessiouns.
Leviticus 25:14 Whanne thou schalt sille ony thing to thi citeseyn, ether schalt bie of hym, make thou not sory thi brother, Leviticus 25:15 but bi the noumbre of yeeris of iubile thou schalt bie of him, and bi the rekenyng of fruytis he schal sille to thee. Leviticus 25:16 Bi as myche as mo yeeris dwellen after the iubilee, by so myche also the prijs schal encreesse, and bi as myche as thou noumbrist lesse of tyme, bi so myche and the biyng schal cost lesse; for he schal sille to thee the time of fruytis. Leviticus 25:17 Nyle ye turment men of youre lynagis, but ech man drede his God; for Y am youre Lord God.
A blessing of obedience.
Leviticus 25:18 Do ye my comaundementis, and kepe ye my domes, and fille ye tho, that ye moun dwelle in his lond without ony drede, Leviticus 25:19 and that the erthe brynge forth hise fruytis to you, whiche ye schulen ete til to fulnesse, and drede not the assailyng of ony man. Leviticus 25:20 That if ye seien, what schulen we ete in the seuenthe yeer, if we sowen not, nether gaderen oure fruytis? Leviticus 25:21 Y schal yyue my blessyng to you in the sixte yeer, and it schal make fruytis of three yeer; Leviticus 25:22 and ye schulen sowe in the eiyte yeer, and ye schulen ete elde fruytis til to the nynthe yeer; til newe thingis comen forth ye schulen ete the elde thingis.
The redemption of the land,
Leviticus 25:23 Also the lond schal not be seeld in to with outen ende, for it is myn, and ye ben my comelyngis and tenauntis; Leviticus 25:24 wherfor al the cuntre of youre possessioun schal be seeld vndur the condicioun of ayenbiyng.
Leviticus 25:25 If thi brother is maad pore, and sillith his litil possessioun, and his nyy kynesman wole, he may ayenbie that that he seelde; Leviticus 25:26 sotheli if he hath no nyy kynesman, and he may fynde prijs to ayenbie, Leviticus 25:27 the fruytis schulen be rekynyd fro that tyme in which he seelde, and he schal yelde that that is residue to the biere, and he schal resseyue so his possessioun. Leviticus 25:28 That if his hond fynde not, that he yelde the prijs, the biere schal haue that that he bouyte, til to the yeer of iubilee; for in that yeer ech sillyng schal go ayen to the lord, and to the firste weldere.
Leviticus 25:29 He that sillith his hows, with ynne the wallis of a citee, schal haue licence to ayenbie til o yeer be fillid; Leviticus 25:30 if he ayenbieth not, and the sercle of the yeer is passid, the biere schal welde it, and his eiris in to with outen ende, and it schal not mow be ayenbouyt, ye, in the iubilee. Leviticus 25:31 Forsothe if the hows is in a town that hath not wallis, it schal be seeld bi the lawe of feeldis; sotheli if it is not ayenbouyt in the iubilee, it schal turne ayen to his lord. Leviticus 25:32 The howsis of dekenes, that ben in citees, moun euer be ayenbouyt; if tho ben not ayenbouyt, Leviticus 25:33 tho schulen turne ayen in the iubilee to the lordis; for the howsis of the citees of dekenes ben for possessiouns among the sones of Israel; Leviticus 25:34 forsothe the suburbabis of hem schulen not be seeld, for it is euerlastynge possessioun.
Compassion of the poor.
Leviticus 25:35 If thi brother is maad pore, and feble in power, and thou resseyuest hym as a comelyng and pilgrym, and he lyueth with thee, Leviticus 25:36 take thou not vsuris of hym, nether more than thou hast youe; drede thou thi God, that thi brothir mai lyue anentis thee. Leviticus 25:37 Thou schalt not yyue to hym thi money to vsure, and thou schalt not axe ouer aboundaunce, ether encrees ouer of fruytis; Leviticus 25:38 Y am youre Lord God, that ladde you out of the lond of Egipt, that Y schulde yyue to you the lond of Canaan, and that Y schulde be youre God.
The usage of bondmen.
Leviticus 25:39 If thi brother compellid bi pouert sillith hym silf to thee, thou schalt not oppresse hym bi seruage of seruauntis, Leviticus 25:40 but he schal be as an hirid man and tenaunt; til to the yeer of iubilee he schal worche at thee, Leviticus 25:41 and aftirward he schal go out with his fre children, and he schal turne ayen to the kynrede, and to the possessioun of his fadris. Leviticus 25:42 For thei ben my seruauntis, and Y ledde hem out of the lond of Egipt; thei schulen not be seeld bi the condicioun of seruauntis; Leviticus 25:43 turmente thou not hem bi thi power, but drede thou thi Lord. Leviticus 25:44 A seruaunt and handmaide be to you of naciouns that ben in youre cumpas, Leviticus 25:45 and of comelyngis that ben pilgrimys at you, ether thei that ben borun of hem in youre lond; ye schulen haue these seruauntis, Leviticus 25:46 and bi riyt of eritage ye schulen sende ouer to aftir comeris, and ye schulen welde with outen ende; sothely oppresse ye not bi power youre britheren, the sones of Israel.
The redemption of servants.
Leviticus 25:47 If the hond of a comelyng and of a pilgrim wexith strong at you, and thi brother is maad pore, and sillith hym silf to hym, Leviticus 25:48 ether to ony of his kyn, he may be ayenbouyt aftir the sillyng; he that wole of hise britheren, ayenbie hym; bothe the brother of fadir, Leviticus 25:49 and the sone of the fadris brother, and kynesman, and alye. Ellis if also he schal mow, he schal ayenbie hym silf, Leviticus 25:50 while the yeeris ben rykenid oneli fro the tyme of his sillyng til in to the yeer of iubylee; and while the money, for which he was seeld, is rikenyd bi the noumbre of yeeris, and while the hire of an hirid man is rikenyd. Leviticus 25:51 If mo yeeris ben that dwellen til to the iubilee, bi these yeeris he schal yelde also the prijs; if fewe yeeris ben, Leviticus 25:52 he schal sette rikenyng with hym bi the noumbre of yeeris; Leviticus 25:53 and he schal yeelde to the biere that that is residue of yeeris, while tho yeeris, bi whiche he seruyde bifore, ben rikenyd for hiris; he schal not turmente that Ebreu violentli in thi siyt. Leviticus 25:54 That if he may not be ayenbouyt bi this, he schal go out with his free children in the yeer of iubilee; Leviticus 25:55 for the sones of Israel ben myn seruauntis, whiche Y ledde out of the lond of Egipt. Y am youre Lord God;