Wycliffe Bible

Luke 18

Luke 18:1 And he seide to hem also a parable, that it bihoueth to preye euer more, and not faile; Luke 18:2 and seide, There was a iuge in a citee, that dredde not God, nether schamede of men.

Of the importunate widow.

Luke 18:3 And a widowe was in that citee, and sche cam to hym, and seide, Venge me of myn aduersarie; Luke 18:4 and he wolde not longe tyme. But aftir these thingis he seide with ynne hym silf, Thouy Y drede not God, and schame not of man, Luke 18:5 netheles for this widewe is heuy to me, Y schal venge hir; lest at the laste sche comynge condempne me. Luke 18:6 And the Lord seide, Here ye, what the domesman of wickidnesse seith; Luke 18:7 and whether God schal not do veniaunce of hise chosun, criynge to hym dai and nyyt, and schal haue pacience in hem? Luke 18:8 Sotheli Y seie to you, for soone he schal do veniaunce of hem. Netheles gessist thou, that mannus sone comynge schal fynde feith in erthe?

Of the Pharisee and the publican.

Luke 18:9 And he seide also to sum men, that tristiden in hem silf, as thei weren riytful, and dispiseden othere, this parable, Luke 18:10 seiynge, Twei men wenten vp in to the temple to preye; the toon a Farisee, and the tother a pupplican. Luke 18:11 And the Farisee stood, and preiede bi hym silf these thingis, and seide, God, Y do thankyngis to thee, for Y am not as other men, raueinouris, vniust, auoutreris, as also this pupplican; Luke 18:12 Y faste twies in the woke, Y yyue tithis of alle thingis that Y haue in possessioun. Luke 18:13 And the pupplican stood afer, and wolde nether reise hise iyen to heuene, but smoot his brest, and seide, God be merciful to me, synnere. Luke 18:14 Treuli Y seie to you, this yede doun in to his hous, and was iustified fro the other. For ech that enhaunsith hym, schal be maad low, and he that mekith hym, schal be enhaunsid.

Children brought to Christ.

Luke 18:15 And thei brouyten to hym yonge children, that he schulde touche hem; and whanne the disciplis saien this thing, thei blameden hem. Luke 18:16 But Jhesus clepide togider hem, and seide, Suffre ye children to come to me, and nyle ye forbede hem, for of siche is the kyngdom of heuenes. Luke 18:17 Treuli Y seie to you, who euer schal not take the kyngdom of God as a child, he schal not entre in to it.

A ruler that would follow Christ, but is hindered by his riches.

Luke 18:18 And a prince axide hym, and seide, Goode maister, in what thing doynge schal Y weilde euerlastynge lijf? Luke 18:19 And Jhesus seide to hym, What seist thou me good? No man is good, but God aloone. Luke 18:20 Thou knowist the comaundementis, Thou schalt not sle, Thou schalt not do letcherie, Thou schalt not do theft, Thou schalt not seie fals witnessyng, Worschipe thi fadir and thi modir. Luke 18:21 Which seide, Y haue kept alle these thingis fro my yongthe. Luke 18:22 And whanne this thing was herd, Jhesus seide to hym, Yit o thing failith to thee; sille thou alle thingis that thou hast, and yyue to pore men, and thou schalt haue tresour in heuene; and come, and sue thou me. Luke 18:23 Whanne these thingis weren herd, he was soreful, for he was ful ryche. Luke 18:24 And Jhesus seynge hym maad sorie, seide, How hard thei that han money schulen entre in to the kyngdom of God; Luke 18:25 for it is liyter a camel to passe thorou a nedlis iye, than a riche man to entre in to the kyngdom of God. Luke 18:26 And thei that herden these thingis seiden, Who may be maad saaf? Luke 18:27 And he seide to hem, Tho thingis that ben impossible anentis men, ben possible anentis God.

The reward of them that leave all for his sake.

Luke 18:28 But Petir seide, Lo! we han left alle thingis, and han sued thee. Luke 18:29 And he seide to hym, Treuli Y seie to you, there is no man that schal forsake hous, or fadir, modir, or britheren, or wijf, or children, or feeldis, for the rewme of God, Luke 18:30 and schal not resseyue many mo thingis in this tyme, and in the world to comynge euerlastynge lijf.

He foresheweth his death,

Luke 18:31 And Jhesus took hise twelue disciplis, and seide to hem, Lo! we gon vp to Jerusalem, and alle thingis schulen be endid, that ben writun bi the prophetis of mannus sone. Luke 18:32 For he schal be bitraied to hethen men, and he schal be scorned, and scourgid, and bispat; Luke 18:33 and aftir that thei han scourgid, thei schulen sle hym, and the thridde dai he schal rise ayen. Luke 18:34 And thei vndurstoden no thing of these; and this word was hid fro hem, and thei vndurstoden not tho thingis that weren seid.

and restoreth a blind man to his sight.

Luke 18:35 But it was don, whanne Jhesus cam nyy to Jerico, a blynde man sat bisidis the weie, and beggide. Luke 18:36 And whanne he herde the puple passynge, he axide, what this was. Luke 18:37 And thei seiden to hym, that Jhesus of Nazareth passide. Luke 18:38 And he criede, and seide, Jhesu, the sone of Dauyd, haue mercy on me. Luke 18:39 And thei that wenten bifor blamyden hym, that he schulde be stille; but he criede myche the more, Thou sone of Dauid, haue mercy on me. Luke 18:40 And Jhesus stood, and comaundide hym to be brouyt forth to hym. And whanne he cam nyy, he axide hym, Luke 18:41 and seide, What wolt thou that Y schal do to thee? And he seide, Lord, that Y se. Luke 18:42 And Jhesus seide to hym, Biholde; thi feith hath maad thee saaf. Luke 18:43 And anoon he say, and suede hym, and magnyfiede God. And al the puple, as it say, yaf heriyng to God.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!