Wycliffe Bible

Luke 20

Christ avoucheth his authority by a question of John's baptism.

Luke 20:1 And it was don in oon of the daies, whanne he tauyte the puple in the temple, and prechide the gospel, the princis of preestis and scribis camen togidere with the elder men; Luke 20:2 and thei seiden to hym, Seie to vs, in what power thou doist these thingis, or who is he that yaf to thee this power? Luke 20:3 And Jhesus answeride, and seide to hem, And Y schal axe you o word; answere ye to me. Luke 20:4 Was the baptym of Joon of heuene, or of men? Luke 20:5 And thei thouyten with ynne hem silf, seiynge, For if we seien, Of heuene, he schal seie, Whi thanne bileuen ye not to hym? Luke 20:6 and if we seien, Of men, al the puple schal stoone vs; for thei ben certeyn, that Joon is a prophete. Luke 20:7 And thei answeriden, that thei knewen not, of whennus it was. Luke 20:8 And Jhesus seide to hem, Nether Y seie to you, in what power Y do these thingis.

The parable of the vineyard.

Luke 20:9 And he bigan to seie to the puple this parable. A man plauntide a vynyerd, and hiride it to tilieris; and he was in pilgrimage longe tyme. Luke 20:10 And in the tyme of gaderynge of grapis, he sente a seruaunt to the tilieris, that thei schulden yyue to hym of the fruyt of the vynyerd; whiche beten hym, and leten hym go voide. Luke 20:11 And he thouyte yit to sende another seruaunt; and thei beten this, and turmentiden hym sore, and leten hym go. Luke 20:12 And he thouyte yit to sende the thridde, and hym also thei woundiden, and castiden out. Luke 20:13 And the lord of the vyneyerd seide, What schal Y do? Y schal sende my dereworthe sone; perauenture, whanne thei seen hym, thei schulen drede. Luke 20:14 And whanne the tilieris sayn hym, thei thouyten with ynne hem silf, and seiden, This is the eire, sle we hym, that the eritage be oure. Luke 20:15 And thei castiden hym out of the vyneyerd, and killiden hym. What schal thanne the lord of the vyneyerd do to hem? Luke 20:16 He schal come, and distruye these tilieris, and yyue the vyneyerd to othere. And whanne this thing was herd, thei seiden to hym, God forbede. Luke 20:17 But he bihelde hem, and seide, What thanne is this that is writun, The stoon which men bildynge repreueden, this is maad in to the heed of the corner? Luke 20:18 Ech that schal falle on that stoon, schal be to-brisid, but on whom it schal falle, it schal al to-breke him.

Of giving tribute to Caesar.

Luke 20:19 And the princis of prestis, and scribis, souyten to leye on hym hoondis in that our, and thei dredden the puple; for thei knewen that to hem he seide this liknesse. Luke 20:20 And thei aspieden, and senten aspieris, that feyneden hem iust, that thei schulden take hym in word, and bitaak hym to the power of the prince, and to the power of the iustice. Luke 20:21 And thei axiden hym, and seiden, Maister, we witen, that riytli thou seist and techist; and thou takist not the persoone of man, but thou techist in treuthe the weie of God. Luke 20:22 Is it leueful to vs to yyue tribute to the emperoure, or nay? Luke 20:23 And he biheld the disseit of hem, and seide to hem, What tempten ye me? Luke 20:24 Shewe ye to me a peny; whos ymage and superscripcioun hath it? Thei answerden, and seiden to hym, The emperouris. Luke 20:25 And he seide to hem, Yelde ye therfor to the emperoure tho thingis that ben the emperours, and tho thingis that ben of God, to God. Luke 20:26 And thei myyten not repreue his word bifor the puple; and thei wondriden in his answere, and heelden pees.

He convinceth the Sadducees that denied the resurrection.

Luke 20:27 Summe of the Saduceis, that denyeden the ayenrisyng fro deeth to lijf, camen, and axiden hym, Luke 20:28 and seiden, Maister, Moises wroot to vs, if the brother of ony man haue a wijf, and be deed, and he was with outen eiris, that his brothir take his wijf, and reise seed to his brother. Luke 20:29 And so there weren seuene britheren. The firste took a wijf, and is deed with outen eiris; Luke 20:30 and the brothir suynge took hir, and he is deed with outen sone; Luke 20:31 and the thridde took hir; also and alle seuene, and leften not seed, but ben deed; Luke 20:32 and the laste of alle the womman is deed. Luke 20:33 Therfor in the risyng ayen, whos wijf of hem schal sche be? for seuene hadden hir to wijf. Luke 20:34 And Jhesus seide to hem, Sones of this world wedden, and ben youun to weddyngis; Luke 20:35 but thei that schulen be had worthi of that world, and of the risyng ayen fro deeth, nethir ben wedded, Luke 20:36 nethir wedden wyues, nethir schulen mowe die more; for thei ben euen with aungels, and ben the sones of God, sithen thei ben the sones of risyng ayen fro deeth. Luke 20:37 And that deed men risen ayen, also Moises schewide bisidis the busch, as he seith, The Lord God of Abraham, and God of Ysaac, and God of Jacob. Luke 20:38 And God is not of deed men, but of lyuynge men; for alle men lyuen to hym.

Luke 20:39 And summe of scribis answeringe, seiden, Maistir, thou hast wel seid. Luke 20:40 And thei dursten no more axe hym ony thing.

How Christ is the son of David.

Luke 20:41 But he seide to hem, How seien men, Crist to be the sone of Dauid, Luke 20:42 and Dauid hym silf seith in the book of Salmes, The Lord seide to my lord, Sitte thou on my riythalf, Luke 20:43 til that Y putte thin enemyes a stool of thi feet? Luke 20:44 Therfor Dauid clepith hym lord, and hou is he his sone?

He warneth his disciples to beware of the scribes.

Luke 20:45 And in heryng of al the puple, he seide to hise disciplis, Luke 20:46 Be ye war of scribis, that wolen wandre in stolis, and louen salutaciouns in chepyng, and the firste chaieris in synagogis, and the firste sittynge placis in feestis; Luke 20:47 that deuouren the housis of widewis, and feynen long preiyng; these schulen take the more dampnacioun.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!