The Jews conspire against Christ.
Luke 22:1 And the halidai of therf looues, that is seid pask, neiyede. Luke 22:2 And the princis of preestis and the scribis souyten, hou thei schulden sle Jhesu, but thei dredden the puple.
Satan prepareth Judas to betray him.
Luke 22:3 And Sathanas entride in to Judas, that was clepid Scarioth, oon of the twelue. Luke 22:4 And he wente, and spak with the princis of preestis, and with the magistratis, hou he schulde bitray hym to hem. Luke 22:5 And thei ioyeden, and maden couenaunt to yyue hym money. Luke 22:6 And he bihiyte, and he souyte oportunyte, to bitraye hym, with outen puple.
The Apostles prepare the Passover.
Luke 22:7 But the daies of therf looues camen, in whiche it was neede, that the sacrifice of pask were slayn. Luke 22:8 And he sente Petre and Joon, and seide, Go ye, and make ye redi to vs the pask, that we ete. Luke 22:9 And thei seiden, Where wolt thou, that we make redi? Luke 22:10 And he seide to hem, Lo! whanne ye schulen entre in to the citee, a man berynge a vessel of watir schal meete you; sue ye hym in to the hous, in to which he entrith. Luke 22:11 And ye schulen seie to the hosebonde man of the hous, The maister seith to thee, Where is a chaumbre, where Y schal ete the pask with my disciplis? Luke 22:12 And he schal schewe to you a greet soupyng place strewid, and there make ye redi. Luke 22:13 And thei yeden, and founden as he seide to hem, and thei maden redi the pask. Luke 22:14 And whanne the our was come, he sat to the mete, and the twelue apostlis with hym. Luke 22:15 And he seide to hem, With desier Y haue desirid to ete with you this pask, bifor that Y suffre; Luke 22:16 for Y seie to you, that fro this tyme Y schal not ete it, til it be fulfillid in the rewme of God. Luke 22:17 And whanne he hadde take the cuppe, he dide gracis, and seide, Take ye, and departe ye among you; Luke 22:18 for Y seie to you, that Y schal not drynke of the kynde of this vyne, til the rewme of God come.
Christ instituteth his holy supper:
Luke 22:19 And whanne he hadde take breed, he dide thankyngis, and brak, and yaf to hem, and seide, This is my bodi, that schal be youun for you; do ye this thing in mynde of me. Luke 22:20 He took also the cuppe, aftir that he hadde soupid, and seide, This cuppe is the newe testament in my blood, that schal be sched for you.
covertly foretelleth of the traitor:
Luke 22:21 Netheles lo! the hoond of hym that bitraieth me, is with me at the table. Luke 22:22 And mannus sone goith, aftir that it is determyned; netheles wo to that man, bi whom he schal be bitraied. Luke 22:23 And thei bigunnen to seke among hem, who it was of hem, that was to do this thing.
dehorteth the rest of his Apostles from ambition:
Luke 22:24 And strijf was maad among hem, which of hem schulde be seyn to be grettest. Luke 22:25 But he seide to hem, Kyngis of hethen men ben lordis of hem, and thei that han power on hem ben clepid good doeris, but ye not so; Luke 22:26 but he that is grettest among you, be maad as yongere, and he that is bifor goere, as a seruaunt. Luke 22:27 For who is gretter, he that sittith at the mete, or he that mynystrith? whether not he that sittith at the mete? And Y am in the myddil of you, as he that mynystrith. Luke 22:28 And ye ben, that han dwellid with me in my temptaciouns; Luke 22:29 and Y dispose to you, as my fadir hath disposid to me, Luke 22:30 a rewme, that ye ete and drynke on my boord in my rewme, and sitte on trones, and deme the twelue kynredis of Israel.
assureth Peter his faith should not fail,
Luke 22:31 And the Lord seide to Symount, Symount, lo, Satanas hath axid you, that he schulde ridile as whete; but Y haue preyede for thee, Luke 22:32 that thi feith faile not; and thou sum tyme conuertid, conferme thi britheren. Luke 22:33 Which seide to hym, Lord, Y am redi to go in to prisoun and in to deeth with thee.
and yet he should deny him thrice.
Luke 22:34 And he seide, Y seie to thee, Petir, the cok schal not crowe to dai, til thou thries forsake that thou knowist me. Luke 22:35 And he seide to hem, Whanne Y sente you with outen sachel, and scrippe, and schone, whether ony thing failide to you? Luke 22:36 And thei seiden, No thing. Therfor he seide to hem, But now he that hath a sachel, take also and a scrippe; and he that hath noon, selle his coote, and bigge a swerd. Luke 22:37 For Y seie to you, that yit it bihoueth that thing that is writun to be fulfillid in me, And he is arettid with wickid men; for tho thingis that ben of me han ende. Luke 22:38 And thei seiden, Lord, lo! twei swerdis here. And he seide to hem, It is ynowy.
He prayeth in the mount, and sweateth blood:
Luke 22:39 And he yede out, and wente aftir the custom in to the hille of Olyues; and the disciplis sueden hym. Luke 22:40 And whanne he cam to the place, he seide to hem, Preye ye, lest ye entren in to temptacioun. Luke 22:41 And he was taken awei fro hem, so myche as is a stonys cast; and he knelide, Luke 22:42 and preyede, and seide, Fadir, if thou wolt, do awei this cuppe fro me; netheles not my wille be don, but thin. Luke 22:43 And an aungel apperide to hym fro heuene, and coumfortide hym. And he was maad in agonye, and preyede the lenger; Luke 22:44 and his swot was maad as dropis of blood rennynge doun in to the erthe. Luke 22:45 And whanne he was rysun fro preier, and was comun to hise disciplis, he foond hem slepynge for heuynesse. Luke 22:46 And he seide to hem, What slepen ye? Rise ye, and preye ye, that ye entre not in to temptacioun.
is betrayed with a kiss:
Luke 22:47 Yit while he spak, lo! a company, and he that was clepid Judas, oon of the twelue, wente bifor hem; and he cam to Jhesu, to kisse hym. Luke 22:48 And Jhesus seide to hym, Judas, with a coss thou bytrayest mannys sone. Luke 22:49 And thei that weren aboute hym, and sayn that that was to come, seiden to hym, Lord, whether we smyten with swerd?
he healeth Malchus' ear:
Luke 22:50 And oon of hem smoot the seruaunt of the prince of preestis, and kittide of his riyt eere. Luke 22:51 But Jhesus answerde, and seide, Suffre ye til hidir. And whanne he hadde touchid his eere, he heelide hym. Luke 22:52 And Jhesus seide to hem, that camen to hym, the princis of preestis, and maiestratis of the temple, and eldre men, As to a theef ye han gon out with swerdis and staues? Luke 22:53 Whanne Y was ech dai with you in the temple, ye streiyten not out hondis in to me; but this is youre our, and the power of derknessis.
he is thrice denied of Peter,
Luke 22:54 And thei token him, and ledden to the hous of the prince of prestis; and Petir suede hym afer. Luke 22:55 And whanne a fier was kyndelid in the myddil of the greet hous, and thei saten aboute, Petir was in the myddil of hem. Luke 22:56 Whom whanne a damysel hadde seyn sittynge at the liyt, and hadde biholdun hym, sche seide, And this was with hym. Luke 22:57 And he denyede hym, and seide, Womman, Y knowe hym not. Luke 22:58 And aftir a litil another man siy hym, and seide, And thou art of hem. But Petir seide, A! man, Y am not. Luke 22:59 And whanne a space was maad as of on our, another affermyd, and seide, Treuli this was with hym; for also he is of Galilee. Luke 22:60 And Petir seide, Man, Y noot what thou seist. And anoon yit while he spak, the cok crewe. Luke 22:61 And the Lord turnede ayen, and bihelde Petre; and Petre hadde mynde on the word of Jhesu, as he hadde seid, For bifor that the cok crowe, thries thou schalt denye me. Luke 22:62 And Petre yede out, and wepte bittirli.
Luke 22:63 And the men that helden hym scorneden hym, and smyten hym. Luke 22:64 And thei blynfelden hym, and smyten his face, and axiden hym, and seiden, Arede, thou Crist, to vs, who is he that smoot thee? Luke 22:65 Also thei blasfemynge seiden ayens hym many other thingis.
and confesseth himself to be the Son of God.
Luke 22:66 And as the day was come, the eldre men of the puple, and the princis of prestis, and the scribis camen togidir, and ledden hym in to her councel, and seiden, Luke 22:67 If thou art Crist, seie to vs. And he seide to hem, If Y seie to you, ye schulen not bileue to me; Luke 22:68 and if Y axe, ye schulen not answere to me, nethir ye schulen delyuere me. Luke 22:69 But aftir this tyme mannys sone schal be sittynge on the riyt half of the vertu of God. Luke 22:70 Therfor alle seiden, Thanne art thou the sone of God? And he seide, Ye seien that Y am. Luke 22:71 And thei seiden, What yit desiren we witnessyng? for we vs silf han herd of his mouth.