Wycliffe Bible

Luke 23

Jesus is accused before Pilate, and sent to Herod.

Luke 23:1 And al the multitude of hem arysen, and ledden hym to Pilat. Luke 23:2 And thei bigunnen to accuse hym, and seiden, We han foundun this turnynge vpsodoun oure folk, and forbedynge tributis to be youun to the emperour, and seiynge that hym silf is Crist and kyng. Luke 23:3 And Pilat axide hym, and seide, Art thou kyng of Jewis? And he answeride, and seide, Thou seist. Luke 23:4 And Pilat seide to the princis of prestis, and to the puple, Y fynde no thing of cause in this man. Luke 23:5 And thei woxen stronger, and seiden, He moueth the puple, techynge thorou al Judee, bigynnynge fro Galile til hidir. Luke 23:6 And Pilat herynge Galile axide, if he were a man of Galile. Luke 23:7 And whanne he knewe that he was of the powere of Eroude, he sente hym to Eroude; which was at Jerusalem in tho daies.

Herod mocketh him.

Luke 23:8 And whanne Eroude siy Jhesu, he ioyede ful myche; for long tyme he coueitide to se hym, for he herde many thingis of hym, and hopide to see sum tokene to be don of hym. Luke 23:9 And he axide hym in many wordis; and he answeride no thing to hym. Luke 23:10 And the princis of preestis and the scribis stoden, stidfastli accusynge hym. Luke 23:11 But Eroude with his oost dispiside hym, and scornede hym, and clothide with a white cloth, and sente hym ayen to Pilat.

Herod and Pilate are made friends.

Luke 23:12 And Eroude and Pilat weren maad freendis fro that dai; for bifor thei weren enemyes togidre.

Luke 23:13 And Pilat clepide togider the princis of prestis and the maiestratis of the puple, and seide to hem, Luke 23:14 Ye han brouyt to me this man, as turnynge awey the puple, and lo! Y axynge bifor you fynde no cause in this man of these thingis, in whiche ye accusen hym; Luke 23:15 nether Eroude, for he hath sent hym ayen to vs, and lo! no thing worthi of deth is don to hym. Luke 23:16 And therfor Y schal amende hym, and delyuere hym. Luke 23:17 But he moste nede delyuer to hem oon bi the feest dai.

Barabbas is desired of the people, and is loosed by Pilate, and Jesus is given to be crucified.

Luke 23:18 And al the puple criede togidir, and seide, Do awei hym, and delyuer to vs Barabas; Luke 23:19 which was sent in to prisoun for disturblyng maad in the cite, and for mansleynge. Luke 23:20 And eftsoone Pilat spak to hem, and wolde delyuer Jhesu. Luke 23:21 And thei vndurcrieden, and seiden, Crucifie, crucifie hym. Luke 23:22 And the thridde tyme he seide to hem, For what yuel hath this don? Y fynde no cause of deeth in hym; therfor Y schal chastise hym, and Y schal delyuer. Luke 23:23 And thei contynueden with greet voicis axynge, that he schulde be crucified; and the voicis of hem woxen stronge. Luke 23:24 And Pilat demyde her axyng to be don. Luke 23:25 And he delyueride to hem hym, that for mansleyng and sedicioun was sent in to prisoun, whom thei axiden; but he bitook Jhesu to her wille. Luke 23:26 And whanne thei ledden hym, thei token a man, Symon of Syrenen, comynge fro the toun, and thei leiden on hym the cross to bere aftir Jhesu.

He telleth the women, that lament him, the destruction of Jerusalem:

Luke 23:27 And there suede hym myche puple, and wymmen that weiliden, and bymorneden hym. Luke 23:28 And Jhesus turnede to hem, and seide, Douytris of Jerusalem, nyle ye wepe on me, but wepe ye on youre silf and on youre sones. Luke 23:29 For lo! daies schulen come, in whiche it schal be seid, Blessid be bareyn wymmen, and wombis that han not borun children, and the tetis that han not youun souke. Luke 23:30 Thanne thei schulen bigynne to seie to mounteyns, Falle ye doun on vs, and to smale hillis, Keuere ye vs. Luke 23:31 For if in a greene tre thei don these thingis, what schal be don in a drie? Luke 23:32 Also othere twei wickid men weren led with hym, to be slayn. Luke 23:33 And aftir that thei camen in to a place, that is clepid of Caluerie, there thei crucifieden hym, and the theues, oon on the riyt half, and the tother on the left half.

prayeth for his enemies.

Luke 23:34 But Jhesus seide, Fadir, foryyue hem, for thei witen not what thei doon. Luke 23:35 And thei departiden his clothis, and kesten lottis. And the puple stood abidynge; and the princis scorneden hym with hem, and seiden, Othere men he maad saaf; make he hym silf saaf, if this be Crist, the chosun of God. Luke 23:36 And the knyytis neiyeden, and scorneden hym, and profreden vynegre to hym, Luke 23:37 and seiden, If thou art king of Jewis, make thee saaf. Luke 23:38 And the superscripcioun was writun ouer hym with Greke lettris, and of Latyn, and of Ebreu, This is the kyng of Jewis.

Two evildoers are crucified with him.

Luke 23:39 And oon of these theues that hangiden, blasfemyde hym, and seide, If thou art Crist, make thi silf saaf and vs. Luke 23:40 But the tothir answerynge, blamyde hym, and seide, Nether thou dredist God, that art in the same dampnacioun? Luke 23:41 And treuli we iustli, for we han resseiued worthi thingis to werkis; but this dide no thing of yuel. Luke 23:42 And he seide to Jhesu, Lord, haue mynde of me, whanne thou comest in to thi kyngdom. Luke 23:43 And Jhesus seide to hym, Treuli Y seie to thee, this dai thou schalt be with me in paradise. Luke 23:44 And it was almest the sixte our, and derknessis weren maad in al the erthe in to the nynthe our. Luke 23:45 And the sun was maad derk, and the veile of the temple was to-rent atwo.

His death.

Luke 23:46 And Jhesus criynge with a greet vois, seide, Fadir, in to thin hoondis Y bitake my spirit. And he seiynge these thingis, yaf vp the goost. Luke 23:47 And the centurien seynge that thing that was don, glorifiede God, and seide, Verili this man was iust. Luke 23:48 And al the puple of hem that weren there togidir at this spectacle, and sayn tho thingis that weren don, smyten her brestis, and turneden ayen. Luke 23:49 But alle his knowun stoden afer, and wymmen that sueden hym fro Galile, seynge these thingis.

His burial.

Luke 23:50 And lo! a man, Joseph bi name, of Aramathie, a cite of Judee, that was a decurien, a good man and a iust, Luke 23:51 this man concentide not to the counseil and to the dedis of hem; and he abood the kyngdom of God. Luke 23:52 This Joseph cam to Pilat, and axide the bodi of Jhesu, Luke 23:53 and took it doun, and wlappide it in a cleene lynen cloth, and leide hym in a graue hewun, in which not yit ony man hadde be leid. Luke 23:54 And the dai was the euen of the halidai, and the sabat bigan to schyne. Luke 23:55 And the wymmen suynge, that camen with hym fro Galile, sayn the graue, and hou his bodi was leid. Luke 23:56 And thei turneden ayen, and maden redi swete smellynge spicis, and oynementis; but in the sabat thei restiden, aftir the comaundement.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!