Wycliffe Bible

Mark 10

Mark 10:1 And Jhesus roos vp fro thennus, and cam in to the coostis of Judee ouer Jordan; and eftsoones the puple cam togidere to hym, and as he was wont, eftsoone he tauyte hem.

Christ diputeth with the Pharisees touching divorcement:

Mark 10:2 And the Farisees camen, and axiden hym, Whether it be leueful to a man to leeue his wijf? and thei temptiden hym. Mark 10:3 And he answeride, and seide to hem, What comaundide Moises to you? Mark 10:4 And thei seiden, Moises suffride to write a libel of forsaking, and to forsake. Mark 10:5 To whiche Jhesus answeride, and seide, For the hardnesse of youre herte Moises wroot to you this comaundement. Mark 10:6 But fro the bigynnyng of creature God made hem male and female; Mark 10:7 and seide, For this thing a man schal leeue his fadir and modir, Mark 10:8 and schal drawe to hys wijf, and thei schulen be tweyne in o flesch. And so now thei ben not tweyne, but o flesch. Mark 10:9 Therfor that thing that God ioynede togidere, no man departe. Mark 10:10 And eftsoone in the hous hise disciplis axiden hym of the same thing. Mark 10:11 And he seide to hem, Who euer leeuith his wijf, and weddith another, he doith auowtri on hir. Mark 10:12 And if the wijf leeue hir housebonde, and be weddid to another man, sche doith letcherie.

blesseth the children that are brought unto him:

Mark 10:13 And thei brouyten to hym litle children, that he schulde touche hem; and the disciplis threteneden the men, that brouyten hem. Mark 10:14 And whanne Jhesus hadde seyn hem, he baar heuy, and seide to hem, Suffre ye litle children to come to me, and forbede ye hem not, for of suche is the kyngdom of God. Mark 10:15 Treuli Y seie to you, who euer resseyueth not the kyngdom of God as a litil child, he schal not entre in to it. Mark 10:16 And he biclippide hem, and leide hise hondis on hem, and blisside hem.

resolveth a rich man how he may inherit life everlasting:

Mark 10:17 And whanne Jhesus was gon out in the weie, a man ranne bifore, and knelide bifor hym, and preiede hym, and seide, Good maister, what schal Y do, that Y resseyue euerlastynge lijf? Mark 10:18 And Jhesus seide to hym, What seist thou, that Y am good? Ther is no man good, but God hym silf. Mark 10:19 Thou knowist the comaundementis, do thou noon auowtrie, sle not, stele not, seie not fals witnessyng, do no fraude, worschipe thi fadir and thi modir. Mark 10:20 And he answeride, and seide to hym, Maister, Y haue kept alle these thingis fro my yongthe. Mark 10:21 And Jhesus bihelde hym, and louede hym, and seide to hym, O thing faileth to thee; go thou, and sille alle thingis that thou hast, and yyue to pore men, and thou schalt haue tresoure in heuene; and come, sue thou me. Mark 10:22 And he was ful sori in the word, and wente awei mornyng, for he hadde many possessiouns.

telleth his disciples of the danger of riches:

Mark 10:23 And Jhesus bihelde aboute, and seide to hise disciplis, Hou hard thei that han ritchessis schulen entre in to the kyngdom of God. Mark 10:24 And the disciplis weren astonyed in hise wordis. And Jhesus eftsoone answeride, and seide to hem, Ye litle children, hou hard it is for men that tristen in ritchessis to entre in to the kyngdom of God. Mark 10:25 It is liyter a camele to passe thorou a nedlis iye, than a riche man to entre in to the kyngdom of God. Mark 10:26 And thei wondriden more, and seiden among hem silf, And who may be sauyd? Mark 10:27 And Jhesus bihelde hem, and seide, Anentis men it is impossible, but not anentis God; for alle thingis ben possible anentis God.

promiseth rewards to them that forsake any thing for the Gospel:

Mark 10:28 And Petir bigan to seie to hym, Lo! we han left alle thingis, and han sued thee. Mark 10:29 Jhesus answeride, and seide, Treuli Y seie to you, ther is no man that leeueth hous, or britheren, or sistris, or fadir, or modir, or children, or feeldis for me and for the gospel, Mark 10:30 which schal not take an hundrid fold so myche now in this tyme, housis, and britheren, and sistris, and modris, and children, and feeldis, with persecuciouns, and in the world to comynge euerlastynge lijf. Mark 10:31 But many schulen be, the firste the last, and the last the firste.

foretelleth his death and resurrection:

Mark 10:32 And thei weren in the weie goynge vp to Jerusalem; and Jhesus wente bifor hem, and thei wondriden, and foleweden, and dredden. And eftsoone Jhesus took the twelue, and bigan to seie to hem, what thingis weren to come to hym. Mark 10:33 For lo! we stien to Jerusalem, and mannus sone schal be bitraied to the princis of prestis, and to scribis, and to the eldre men; and thei schulen dampne hym bi deth, and thei schulen take hym to hethene men. And thei schulen scorne hym, Mark 10:34 and bispete hym, and bete him; and thei schulen sle hym, and in the thridde dai he schal rise ayen.

biddeth the two ambitious suitors to think rather of suffering with him:

Mark 10:35 And James and Joon, Zebedees sones, camen to hym, and seiden, Maister, we wolen, that what euer we axen, thou do to vs. Mark 10:36 And he seide to hem, What wolen ye that Y do to you? Mark 10:37 And thei seiden, Graunte to vs, that we sitten the toon at thi riythalf, and the tother at thi left half, in thi glorie. Mark 10:38 And Jhesus seide to hem, Ye witen not what ye axen; moun ye drynke the cuppe, which Y schal drynke, or be waischun with the baptym, in which Y am baptisid? Mark 10:39 And thei seiden to hym, We moun. And Jhesus seide to hem, Ye schulen drynke the cuppe that Y drynke, and ye schulen be waschun with the baptym, in which Y am baptisid; Mark 10:40 but to sitte at my riythalf or lefthalf is not myn to yyue to you, but to whiche it is maad redi. Mark 10:41 And the ten herden, and bigunnen to haue indignacioun of James and Joon. Mark 10:42 But Jhesus clepide hem, and seide to hem, Ye witen, that thei that semen to haue prynshode of folkis, ben lordis of hem, and the princes of hem han power of hem. Mark 10:43 But it is not so among you, but who euer wole be maad gretter, schal be youre mynyster; Mark 10:44 and who euer wole be the firste among you, schal be seruaunt of alle. Mark 10:45 For whi mannus sone cam not, that it schulde be mynystrid to hym, but that he schulde mynystre, and yyue his lijf ayenbiyng for manye.

and restoreth to Bartimaeus his sight.

Mark 10:46 And thei camen to Jerico; and whanne he yede forth fro Jerico, and hise disciplis, and a ful myche puple, Barthymeus, a blynde man, the sone of Thimei, sat bisidis the weie, and beggide. Mark 10:47 And whanne he herde, that it is Jhesus of Nazareth, he bigan to crie, and seie, Jhesu, the sone of Dauid, haue merci on me. Mark 10:48 And manye thretneden hym, that he schulde be stille; and he criede myche the more, Jhesu, the sone of Dauid, haue merci on me. Mark 10:49 And Jhesus stood, and comaundide hym to be clepid; and thei clepen the blynde man, and seien to hym, Be thou of betere herte, rise vp, he clepith thee. Mark 10:50 And he castide awei his cloth, and skippide, and cam to hym. Mark 10:51 And Jhesus answeride, and seide to hym, What wolt thou, that Y schal do to thee? The blynde man seide to hym, Maister, that Y se. Mark 10:52 Jhesus seide to hym, Go thou, thi feith hath maad thee saaf. And anoon he saye, and suede hym in the weie.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!