Wycliffe Bible

Mark 8

Christ feedeth the people miraculously:

Mark 8:1 In tho daies eft, whanne myche puple was with Jhesu, and hadden not what thei schulden ete, whanne hise disciplis weren clepid togidir, Mark 8:2 he seide to hem, I haue reuth on the puple, for lo! now the thridde dai thei abiden me, and han not what to ete; Mark 8:3 and if Y leeue hem fastynge in to her hous, thei schulen faile in the weie; for summe of hem camen fro fer. Mark 8:4 And hise disciplis answerden to hym, Wherof schal a man mowe fille hem with looues here in wildirnesse? Mark 8:5 And he axide hem, Hou many looues han ye? Whiche seiden, Seuene. Mark 8:6 And he comaundide the puple to sitte doun on the erthe. And he took the seuene looues, and dide thankyngis, and brak, and yaf to hise disciplis, that thei schulden sette forth. And thei settiden forth to the puple. Mark 8:7 And thei hadden a few smale fischis; and he blesside hem, and comaundide, that thei weren sette forth. Mark 8:8 And thei eten, and weren fulfillid; and thei token vp that that lefte of relifs, seuene lepis. Mark 8:9 And thei that eeten, weren as foure thousynde of men; and he lefte hem.

refuseth to give a sign to the Pharisees:

Mark 8:10 And anoon he wente vp in to a boot, with hise disciplis, and cam in to the coostis of Dalmamytha. Mark 8:11 And the Farisees wenten out, and bigunnen to dispuyte with hym, and axiden a tokne of hym fro heuene, and temptiden hym. Mark 8:12 And he sorewynge with ynne in spirit, seide, What sekith this generacioun a tokne? Treuli Y seie to you, a tokene schal not be youun to this generacioun. Mark 8:13 And he lefte hem, and wente vp eftsoone in to a boot, and wente ouer the see.

admonisheth his disciples to beware of the leaven of the Pharisees, and of the leaven of Herod:

Mark 8:14 And thei foryaten to take breed, and thei hadden not with hem but o loof in the boot. Mark 8:15 And he comaundide hem, and seide, Se ye, and be war of the sowre dowy of Farisees, and of the sowrdowy of Eroude. Mark 8:16 And thei thouyten, and seiden oon to anothir, For we han not looues. Mark 8:17 And whanne this thing was knowun, Jhesus seide to hem, What thenken ye, for ye han not looues? Yit ye knowun not, ne vndurstonden; yit ye han youre herte blyndid. Mark 8:18 Ye hauynge iyen, seen not, and ye hauynge eeris, heren not; nethir ye han mynde, Mark 8:19 whanne Y brak fyue looues among fyue thousynde, and hou many cofynes ful of brokun meete ye tokun vp? Thei seien to hym, Twelue. Mark 8:20 Whanne also seuene looues among foure thousynde of men, hou many lepis of brokun mete tokun ye vp? Mark 8:21 And thei seien to hym, Seuene. And he seide to hem, Hou vndurstonden ye not yit?

giveth a blind man his sight:

Mark 8:22 And thei camen to Bethsaida, and thei bryngen to hym a blynde man, and thei preieden hym, that he schulde touche hym. Mark 8:23 And whanne he hadde take the blynde mannus hoond, he ledde hym out of the street, and spete in to hise iyen, and sette hise hoondis on hym; and he axide hym, if he saye ony thing. Mark 8:24 And he bihelde, and seide, Y se men as trees walkynge. Mark 8:25 Aftirward eftsoones he sette hise hondis on hise iyen, and he bigan to see, and he was restorid, so that he saiy cleerli alle thingis. Mark 8:26 And he sente hym in to his hous, and seide, Go in to thin hous; and if thou goist in to the streete, seie to no man.

acknowledgeth that he is the Christ, who should suffer and rise again:

Mark 8:27 And Jhesus entride and hise disciplis in to the castels of Cesarye of Philip. And in the weie he axide hise disciplis, and seide to hem, Whom seien men that Y am? Mark 8:28 Whiche answeriden to hym, and seiden, Summen seien, Joon Baptist; other seien, Heli; and other seien, as oon of the prophetis. Mark 8:29 Thanne he seith to hem, But whom seien ye that Y am? Petre answeride, and seide to hym, Thou art Crist. Mark 8:30 And he chargide hem, that thei schulden not seie of hym to ony man. Mark 8:31 And he bigan to teche hem, that it bihoueth mannus sone to suffre many thingis, and to be repreued of the elder men, and of the hiyest prestis, and the scribis, and to be slayn, and aftir thre dayes, to rise ayen. Mark 8:32 And he spak pleynli the word. And Peter took hym, and bigan to blame hym, and seide, Lord, be thou merciful to thee, for this schal not be. Mark 8:33 And he turnede, and saiy hise disciplis, and manasside Petir, and seide, Go after me, Satanas; for thou sauerist not tho thingis that ben of God, but tho thingis that ben of men.

and exhorteth to patience in persecution for the profession of the Gospel.

Mark 8:34 And whanne the puple was clepid togidere, with hise disciplis, he seide to hem, If ony man wole come after me, denye he hym silf, and take his cros, and sue he me. Mark 8:35 For he that wole make saaf his lijf, schal leese it; and he that leesith his lijf for me, and for the gospel, schal make it saaf. Mark 8:36 For what profitith it to a man, if he wynne al the world, and do peiryng to his soule? Mark 8:37 or what chaunging schal a man yyue for his soule? Mark 8:38 But who that knoulechith me and my wordis in this generacioun avowtresse and synful, also mannus sone schal knouleche him, whanne he schal come in the glorie of his fadir, with his aungels.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!