Wycliffe Bible

Matthew 22

The parable of the marriage of the king's son.

Matthew 22:1 And Jhesus answeride, and spak eftsoone in parablis to hem, and seide, Matthew 22:2 The kyngdom of heuenes is maad lijk to a kyng that made weddyngis to his sone. Matthew 22:3 And he sente hise seruauntis for to clepe men that weren bode to the weddyngis, and thei wolden not come. Matthew 22:4 Eftsoone he sente othere seruauntis, and seide, Seie ye to the men that ben bode to the feeste, Lo! Y haue maad redi my meete, my bolis and my volatilis ben slayn, and alle thingis ben redy; come ye to the weddyngis. Matthew 22:5 But thei dispisiden, and wenten forth, oon in to his toun, anothir to his marchaundise. Matthew 22:6 But othere helden his seruauntis, and turmentiden hem, and slowen. Matthew 22:7 But the kyng, whanne he hadde herd, was wroth; and he sente hise oostis, and he distruyede tho manquelleris, and brente her citee. Matthew 22:8 Thanne he seide to hise seruauntis, The weddyngis ben redi, but thei that weren clepid to the feeste, weren not worthi.

The vocation of the Gentiles.

Matthew 22:9 Therfor go ye to the endis of weies, and whom euere ye fynden, clepe ye to the weddyngis. Matthew 22:10 And hise seruauntis yeden out in to weies, and gadriden togider alle that thei founden, good and yuele; and the bridale was fulfillid with men sittynge at the mete.

Matthew 22:11 And the kyng entride, to se men sittynge at the mete; and he siye there a man not clothid with bride cloth.

The punishment of him that wanted the wedding garment.

Matthew 22:12 And he seide to hym, Freend, hou entridist thou hidir with out bride clothis? And he was doumbe. Matthew 22:13 Thanne the kyng bad hise mynystris, Bynde hym bothe hondis and feet, and sende ye him in to vtmer derknessis; there schal be wepyng and grentyng of teeth. Matthew 22:14 For many ben clepid, but fewe ben chosun.

Tribute ought to be paid to Caesar.

Matthew 22:15 Thanne Farisees yeden awei, and token a counsel to take Jhesu in word. Matthew 22:16 And thei senden to hym her disciplis, with Erodians, and seien, Maister, we witen, that thou art sothefast, and thou techist in treuthe the weie of God, and thou chargist not of ony man, for thou biholdist not the persoone of men. Matthew 22:17 Therfor seie to vs, what it seemeth to thee. Is it leueful that tribute be youun to the emperoure, ether nay? Matthew 22:18 And whanne Jhesus hadde knowe the wickidnesse of hem, he seide, Ypocritis, what tempten ye me? Matthew 22:19 Schewe ye to me the prynte of the money. And thei brouyten to hym a peny. Matthew 22:20 And Jhesus seide to hem, Whos is this ymage, and the writyng aboue? Matthew 22:21 Thei seien to hym, The emperouris. Thanne he seide to hem, Therfor yelde ye to the emperoure tho thingis that ben the emperouris, and to God tho thingis that ben of God. Matthew 22:22 And thei herden, and wondriden; and thei leften hym, and wenten awey.

Christ confuteth the Sadducees for the resurrection:

Matthew 22:23 In that dai Saduceis, that seien there is no risyng ayen to lijf, camen to hym, and axiden him, Matthew 22:24 and seiden, Mayster, Moises seide, if ony man is deed, not hauynge a sone, that his brother wedde his wijf, and reise seed to his brothir. Matthew 22:25 And seuen britheren weren at vs; and the firste weddide a wijf, and is deed. And he hadde no seed, and lefte his wijf to his brother; Matthew 22:26 also the secounde, and the thridde, til to the seuenthe. Matthew 22:27 But the laste of alle, the woman is deed. Matthew 22:28 Also in the risyng ayen to lijf, whos wijf of the seuene schal sche be? for alle hadden hir. Matthew 22:29 Jhesus answeride, and seide to hem, Ye erren, and ye knowen not scripturis, ne the vertu of God. Matthew 22:30 For in the rysyng ayen to lijf, nether thei schulen wedde, nethir schulen be weddid; but thei ben as the aungels of God in heuene. Matthew 22:31 And of the risyng ayen of deed men, han ye not red, that is seid of the Lord, that seith to you, Matthew 22:32 Y am God of Abraham, and God of Ysaac, and God of Jacob? he is not God of deede men, but of lyuynge men. Matthew 22:33 And the puple herynge, wondriden in his techynge.

answereth the lawyer, which is the first and great commandment:

Matthew 22:34 And Fariseis herden that he hadde put silence to Saduceis, and camen togidere. Matthew 22:35 And oon of hem, a techere of the lawe, axide Jhesu, and temptide him, Matthew 22:36 Maistir, which is a greet maundement in the lawe? Matthew 22:37 Jhesus seide to him, Thou schalt loue thi Lord God, of al thin herte, and in al thi soule, and in al thi mynde. Matthew 22:38 This is the firste and the moste maundement. Matthew 22:39 And the secounde is lijk to this; Thou schalt loue thi neiyebore as thi silf. Matthew 22:40 In these twey maundementis hangith al the lawe and the profetis.

and poseth the Pharisees about the Messias.

Matthew 22:41 And whanne the Farisees weren gederid togidere, Jhesus axide hem, Matthew 22:42 and seide, What semeth to you of Crist, whos sone is he? Thei seien to hym, Of Dauid. Matthew 22:43 He seith to hem, Hou thanne Dauid in spirit clepith hym Lord, Matthew 22:44 and seith, The Lord seide to my Lord, Sitte on my riythalf, til Y putte thin enemyes a stool of thi feet? Matthew 22:45 Thanne if Dauid clepith hym Lord, hou is he his sone? Matthew 22:46 And no man miyte answere a word to hym, nethir ony man was hardi fro that day, to axe hym more.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!