Wycliffe Bible

Nehemiah 6

Sanballat practiseth by craft, by rumours, by hired prophecies, to terrify Nehemiah.

Nehemiah 6:1 Forsothe it was doon, whanne Sanaballath hadde herd, and Tobie, and Gosem of Arabie, and oure other enemyes, that Y hadde bildide the wal, and nomore brekyng was therynne; sotheli til to that tyme Y hadde not set leeuys of schittyng in the yatis; Nehemiah 6:2 Sanaballath, and Tobie, and Gosem of Arabie senten to me, and seiden, Come thou, and smyte we boond of pees in calues, in o feeld; forsothe thei thouyten for to do yuel to me. Nehemiah 6:3 Therfor Y sente messangeris to hem, and Y seide, Y make a greet werk, and Y mai not go doun, lest perauenture it be doon retchelesli, whanne Y come, and go doun to you. Nehemiah 6:4 Sotheli thei senten to me bi this word bi foure tymes, and Y answeride to hem by the formere word. Nehemiah 6:5 And Sanaballath sente to me the fyuethe tyme bi the formere word his child; and he hadde in his hond a pistle writun in this maner; Nehemiah 6:6 It is herd among hethene men, and Gosem seide, that thou and the Jewis thenken for to rebelle, and therfor ye bilden, and thou wolt reise thee king on hem; Nehemiah 6:7 for which cause also thou hast set profetis, that prechen of thee in Jerusalem, and seien, A king is in Jerusalem; the king schal here these wordis; therfor come thou now, that we take counsel togidere. Nehemiah 6:8 And Y sente to hem, and seide, It is not doon bi these wordis whiche thou spekist; for of thin herte thou makist these thingis. Nehemiah 6:9 Alle these men maden vs aferd, and thouyten that oure hondis schulden ceesse fro werkis, that we schulden reste; for which cause Y coumfortide more myn hond. Nehemiah 6:10 And Y entride priueli in to the hows of Samaie, sone of Dalie, the sone of Methabehel, which seide, Trete we with vs silf in the hows of God, in the myddis of the temple, and close we the yatis of the hows; for thei schulen come to sle thee, and thei schulen come bi niyt to sle thee. Nehemiah 6:11 And Y seide, Whether ony man lijk me fledde, and who as Y schal entre in to the temple, and schal lyue? Nehemiah 6:12 Y schal not entre. And Y vndurstood that God hadde not sent hym, but he spak as profesiynge to me; and Tobie and Sanaballath hadden hirid hym for meede. Nehemiah 6:13 For he hadde take prijs, that Y schulde be aferd, and do, and that Y schulde do synne; and thei schulden haue yuel, which thei schulden putte to me with schenschip. Nehemiah 6:14 Lord, haue mynde of me, for Tobye and Sanaballath, bi siche werkis of hem; but also of Noadie, the profete, and of othere profetis, that maden me aferd.

The work is finished to the terror of the enemies.

Nehemiah 6:15 Forsothe the wal was fillid in the fyue and twentithe dai of the monethe Ebul, in two and fifti daies. Nehemiah 6:16 Sotheli it was doon, whanne alle oure enemyes hadden herd, that alle hethene men dredden, that weren in oure cumpas, and thei felden doun with ynne hem silf, and wiste, that this work was maad of God.

Secret intelligence passeth between the enemies and the nobles of Judah.

Nehemiah 6:17 But also in tho daies many pistlis of the principal men of Jewis weren sent to Tobie, and camen fro Tobie to hem. Nehemiah 6:18 For many men weren in Judee, and hadden his ooth; for he hadde weddid the douyter of Sechenye, the sone of Rotel; and Johannam, his sone, hadde take the douyter of Mosallam, sone of Barachie. Nehemiah 6:19 But also thei preisiden hym bifor me, and telden my wordis to hym; and Tobie sente lettris, for to make me aferd.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!