The names of the men who were sent to search the land.
Numbers 13:1 And there the Lord spak to Moises, and seide, Numbers 13:2 Sende thou men that schulen biholde the lond of Canaan, which Y schal yyue to the sones of Israel, of ech lynage o man of the princes. Numbers 13:3 Moises dide that that the Lord comaundide, and sente fro the deseert of Pharan princes, Numbers 13:4 men of whiche these ben the names. Of the lynage of Ruben, Semmya, the sone of Zectur. Numbers 13:5 Of the lynage of Symeon, Saphat, the sone of Hury. Numbers 13:6 Of the lynage of Juda, Caleph, the sone of Jephone. Numbers 13:7 Of the lynage of Isachar, Igal, the sone of Joseph. Numbers 13:8 Of the lynage of Effraym, Osee, the sone of Nun. Numbers 13:9 Of the lynage of Beniamyn, Phalti, the sone of Raphu. Numbers 13:10 Of the lynage of Zabulon, Gediel, the sone of Sodi. Numbers 13:11 Of the lynage of Joseph, of the gouernaunce of Manasses, Gaddi, the sone of Susy. Numbers 13:12 Of the lynage of Dan, Amyel, the sone of Gemalli. Numbers 13:13 Of the lynage of Aser, Sur, the sone of Mychael. Numbers 13:14 Of the lynage of Neptalym, Nabdi, the sone of Napsi. Numbers 13:15 Of the lynage of Gad, Guel, the sone of Machi. Numbers 13:16 These ben the names of men, which Moises sente to biholde the lond of Canaan; and he clepide Osee, the sone of Nun, Josue.
Numbers 13:17 Therfor Moises sente hem to biholde the lond of Canaan, and seide to hem, Stie ye bi the south coost; and whanne ye comen to the hillis, Numbers 13:18 biholde ye the lond, what maner lond it is; and biholde ye the puple which is the dwellere therof, whether it is strong, ethir feble, whether thei ben fewe in noumbre, ether manye; Numbers 13:19 whether that lond is good, ethir yuel; what maner citees ben, wallid, ether without wallis; Numbers 13:20 whether the lond is fat, ether bareyn, whether it is ful of woodis, ethir without trees. Be ye coumfortid, and brynge ye to vs of the fruytis of that lond. Sotheli the tyme was, whanne grapis first ripe myyten be etun thanne.
Numbers 13:21 And whanne thei hadden stied, thei aspieden the lond, fro the deseert of Syn til to Rohob, as men entryth to Emath. Numbers 13:22 And thei stieden to the south, and camen in to Ebron, where Achyman, and Sisai, and Tholmai, the sones of Enach, weren; for Hebron was maad bi seuen yeer bifor Thamnys, the citee of Egipt. Numbers 13:23 And thei yeden til to the stronde of clustre, and kittiden doun a sioun with his grape, which twei men baren in a barre; also thei token of pumgarnadis, and of the figis of that place which is clepid Nehelescol, Numbers 13:24 that is, the stronde of grape, for the sones of Israel baren a clustre fro thennus. Numbers 13:25 And the aspieris of the lond, whanne thei hadden cumpassid al the cuntrey, after fourti daies camen to Moises and Aaron,
Numbers 13:26 and to al the cumpany of the sones of Israel, in to the deseert of Pharan which is in Cades. And the aspieris spaken to hem, and schewiden the fruytis of the lond to al the multitude, and telden, Numbers 13:27 and seiden, We camen to the lond, to which thou sentest vs, which lond treuli flowith with mylk and hony, as it may be knowun bi these fruytis; Numbers 13:28 but it hath strongeste inhabiteris, and grete cytees, and wallid; we sien there the kynrede of Anachym; Amalech dwellith in the south; Numbers 13:29 Ethei, and Jebusei, and Amorey dwellen in the hilli placis; forsothe Cananey dwellith bisidis the see, and bisidis the floodis of Jordan. Numbers 13:30 Among thes thingis Caleph peeside the grutchyng of the puple, that was maad ayens Moises, and seide, Stie we, and welde we the lond, for we moun gete it. Numbers 13:31 Forsothe other aspieris, that weren with hym, seiden, We moun not stie to this puple, for it is strongere than we. Numbers 13:32 And thei deprauyden the lond which thei hadden biholde, anentis the sones of Israel, and seiden, The lond which we cumpassiden deuourith hise dwelleris; the puple which we bihelden is of large stature; Numbers 13:33 there we syen summe wondris ayens kynde, of the sones of Enach, of the kynde of geauntis, to whiche we weren comparisound, and weren seien as locustis.