The people murmur at the news.
Numbers 14:1 Therfor al the cumpeny criede, and wepte in that nyyt, Numbers 14:2 and alle the sones of Israel grutchiden ayens Moises and Aaron, and seiden, Numbers 14:3 We wolden that we hadden be deed in Egipt, and not in this waast wildirnesse; we wolden that we perischen, and that the Lord lede vs not in to this lond, lest we fallen bi swerd, and oure wyues and fre children ben led prisoneris; whether it is not betere to turne ayen in to Egipt? Numbers 14:4 And thei seiden oon to another, Ordeyne we a duyk to vs, and turne we ayen in to Egipt. Numbers 14:5 And whanne this was herd, Moises and Aaron felden lowe to erthe, bifor al the multitude of the sones of Israel.
Joshua and Caleb labour to still them.
Numbers 14:6 And sotheli Josue, the sone of Nun, and Caleph, the sone of Jephone, whiche also cumpassiden the lond, to renten her clothis, Numbers 14:7 and spaken to al the multitude of the sones of Israel, The lond which we cumpassiden is ful good; Numbers 14:8 if the Lord is merciful to vs, he schal lede vs in to it, and schal yyue to vs the lond flowynge with mylk and hony. Numbers 14:9 Nyle ye be rebel ayens the Lord, nether drede ye the puple of this lond, for we moun deuoure hem so as breed; al her help passide awei fro hem, the Lord is with vs, nyle ye drede. Numbers 14:10 And whanne al the multitude criede, and wolde oppresse hem with stonys, the glorie of the Lord apperide on the roof of the boond of pees, while alle the sones of Israel sien.
God threateneth them.
Numbers 14:11 And the Lord seide to Moises, Hou long schal this puple bacbite me? Hou longe schulen thei not bileue to me in alle signes, whiche Y haue do bifor hem? Numbers 14:12 Therfor Y schal smyte hem with pestilence, and Y schal waste hem; forsothe Y schal make thee prince on a greet folk, and strongere than is this.
Moses persuadeth God, and obtaineth pardon.
Numbers 14:13 And Moises seide to the Lord, Egipcians here not, fro whos myddil thou leddist out this puple, Numbers 14:14 and the dwelleris of this loond, whiche herden that thou, Lord, art in this puple, and art seyn face to face, and that thi cloude defendith hem, and that thou goist bifore hem in a pilere of cloude bi dai,
Numbers 14:15 and in a piler of fier bi nyyt, that thou hast slayn so greet a multitude as o man, Numbers 14:16 and seie thei, He myyte not brynge this puple in to the lond for whiche he swoor, therfor he killide hem in wildirnesse; Numbers 14:17 therfor the strengthe of the Lord be magnified, as thou hast swore. And Moises seide, Numbers 14:18 Lord pacient, and of myche mercy, doynge awei wickidnesse and trespassis, and leeuynge no man vngilti, which visitist the synnes of fadris in to sones in to the thridde and fourthe generacioun, Y biseche, Numbers 14:19 foryyue thou the synne of this thi puple, aftir the greetnesse of thi merci, as thou were merciful to men goynge out of Egipt til to this place. Numbers 14:20 And the Lord seide, Y haue foryouun to hem, bi thi word. Numbers 14:21 Y lyue; and the glorie of the Lord schal be fillid in al erthe; Numbers 14:22 netheles alle men that sien my mageste, and my signes, whiche Y dide in Egipt and in the wildirnesse, and temptiden me now bi ten sithis, and obeieden not to my vois, Numbers 14:23 schulen not se the lond for which Y swore to her fadris, nethir ony of hem that bacbitide me, schal se it. Numbers 14:24 Y schal lede my seruaunt Caleph, that was ful of anothir spirit, and suede me, in to this lond, which he cumpasside, and his seed schal welde it. Numbers 14:25 For Amalech and Cananei dwellen in the valeis, to morewe moue ye tentis, and turne ye ayen in to wildirnesse bi the weie of the reed see.
The murmurers are deprived of entering into the land.
Numbers 14:26 And the Lord spak to Moises and to Aaron, and seide, Numbers 14:27 Hou long grutchith this werste multitude ayens me? Y haue herd the pleyntis of the sones of Israel. Numbers 14:28 Therfor seie thou to hem, Y lyue, seith the Lord; as ye spaken while Y herde, so Y schal do to you; Numbers 14:29 youre careyns schulen ligge in this wildirnesse. Alle ye that ben noumbrid, fro twenti yeer and aboue, and grutchiden ayens me, Numbers 14:30 schulen not entre in to the lond, on which Y reiside myn hond, that Y schulde make you to dwelle outakun Caleph, the sone of Jephone, and Josue, the sone of Nun. Numbers 14:31 Forsothe Y schal lede in youre litle children, of whiche ye seiden that thei schulden be preyes ethir raueyns to enemyes, that thei se the lond which displeside you. Numbers 14:32 Forsothe youre careyns schulen ligge in the wildirnesse; Numbers 14:33 youre sones schulen be walkeris aboute in the deseert bi fourti yeer, and thei schulen bere youre fornycacioun, til the careyns of the fadris ben wastid in the deseert, Numbers 14:34 by the noumbre of fourti daies, in whiche ye bihelden the loond; a yeer schal be arettid for a dai, and bi fourti yeer ye schulen resseyue youre wickidnesse, and ye schulen knowe my veniaunce. Numbers 14:35 For as Y spak, so Y schal do to al this werste multitude, that roos to gidere ayens me; it schal faile, and schal die in this wildirnesse.
The men who raised the evil report die by a plague.
Numbers 14:36 Therfor alle the men whyche Moises hadde sent to see the lond, and whiche turniden ayen, and maden al the multitude to grutche ayens hym, and depraueden the lond, that it was yuel, Numbers 14:37 weren deed, and smytun in the siyt of the Lord. Numbers 14:38 Sotheli Josue, the sone of Nun, and Caleph, the sone of Jephone, lyueden, of alle men that yeden to se the lond. Numbers 14:39 And Moises spak alle these wordis to alle the sones of Israel, and the puple mourenyde gretli.
The people that would invade the land against the will of God are smitten.
Numbers 14:40 And, lo! thei riseden in the morewtid first, and stieden in to the cop of the hil, and seiden, We ben redi to stie to the place, of which the Lord spak, for we synneden. Numbers 14:41 To whiche Moises seide, Whi passen ye the word of the Lord, that schal not bifalle to you in to prosperite? Numbers 14:42 Nyle ye stie, for the Lord is not with you, lest ye fallen bifor youre enemyes. Numbers 14:43 Amalech and Cananei ben bifor you, bi the swerd of whiche ye schulen falle, for ye nolden assente to the Lord, nether the Lord schal be with you. Numbers 14:44 And thei weren maad derk, and stieden in to the cop of the hil; forsothe the ark of the testament of the Lord and Moises yeden not awey fro the tentis. Numbers 14:45 And Amalech cam doun, and Chananei, that dwelliden in the hil, and he smoot hem, and kittide doun, and pursuede hem til Horma.