Balaam, leaving divinations, prophesieth the happiness of Israel.
Numbers 24:1 And whanne Balaam siy that it pleside the Lord that he schulde blesse Israel, he yede not as he hadde go bifore, that he schulde seke fals dyuynyng bi chiteryng of briddis, but he dresside his face ayens the desert, Numbers 24:2 and reiside iyen, and siy Israel dwellynge in tentis bi hise lynagis. And whanne the Spirit of God felde on hym, and whanne a parable was takun, Numbers 24:3 he seide, Balaam, the sone of Beor, seide, a man whois iye is stoppid seide, Numbers 24:4 the herere of Goddis wordis seide, which bihelde the reuelacioun of almyyti God, which fallith doun, and hise iyen ben openyd so, Numbers 24:5 Hou faire ben thi tabernaclis, Jacob, and thi tentis, Israel! Numbers 24:6 as valeys ful of woodis, and moiste gardyns bisidis floodis, as tabernaclis whiche the Lord hath set, as cedris bisidis watris; Numbers 24:7 watir schal flowe of his bokat, and his seed schal be in to many watris, that is, puplis. The kyng of hym schal be takun a wei for Agag, and the rewme of hym schal be doon awai. Numbers 24:8 God ledde hym out of Egipt, whos strengthe is lijk an vnicorn; thei schulen deuoure hethene men, enemyes of hym, that is, of Israel; and thei schulen breke the boonus of hem, and schulen perse with arowis. Numbers 24:9 He restide and slepte as a lyoun, and as a lionesse, whom no man schal dore reise. He that blessith thee, schal be blessid; he that cursith, schal
Balak in anger dismisseth him.
Numbers 24:10 be arettid in to cursyng And Balaach was wrooth ayens Balaam, and seide, whanne the hondis weren wrungun to gidere, I clepide thee to curse myn enemyes, whiche ayenward thou hast blessid thries. Numbers 24:11 Turne ayen to thi place; forsothe Y demede to onoure thee greetli, but the Lord priuyde thee fro onour disposid. Numbers 24:12 Balaam answeride to Balaach, Whethir Y seide not to thi messangeris, whiche thou sentist to me, Numbers 24:13 Thouy Balaach schal yyue to me his hows ful of siluer and of gold, Y schal not mow passe the word of my Lord God, that Y brynge forth of myn herte ony thing, ethir of good ethir of yuel, but what euer thing the Lord schal seie, Y schal speke this? Numbers 24:14 Netheles Y schal go to my puple, and Y schal yyue counsel to thee, what thi puple schal do in the laste tyme to this puple.
He prophesieth of the Star of Jacob, and the destruction of some nations.
Numbers 24:15 Therfor whanne a parable was takun, he seide eft, Balaam, the sone of Beor seide, a man whos iye is stoppid, Numbers 24:16 seide, the herere of Goddis wordis seide, which knowith the doctrine of the hiyeste, and seeth the reuelacioun of almiyti God, which fallith doun and hath opyn iyen, Numbers 24:17 Y schal se hym, but not now; Y schal biholde hym, but not nyy; a sterre schal be borun of Jacob, and a yerde schal rise of Israel; and he schal smyte the duykis of Moab, and he schal waste alle the sones of Seth; and Ydumye schal be hys possessioun, Numbers 24:18 the eritage of Seir schal bifalle to his enemyes; forsothe Israel schal do strongli, of Jacob schal be he that schal be lord, Numbers 24:19 and schal leese the relikis of the citee.
Numbers 24:20 And whanne he hadde seyn Amalech, he took a parable, and seide, Amalech is the bigynning of hethene men, whos laste thingis schulen be lost. Numbers 24:21 Also he siy Cyney, and whanne a parable was takun, he seide, Forsothe thi dwellyng place is strong, but if thou schalt sette thi nest in a stoon, Numbers 24:22 and schalt be chosun of the generacioun of Cyn, hou longe schalt thou mow dwelle? forsothe Assur schal take thee. Numbers 24:23 And whanne a parable was takun, he spak eft, Alas! who schal lyue, whanne the Lord schal make thes thingis? Numbers 24:24 Thei schulen come in grete schippis fro Ytalie, thei schulen ouercome Assiries, and thei schulen distrie Ebrews, and at the last also thei hem silf schulen perische. Numbers 24:25 And Balaam roos, and turnide ayen in to his place; and Balaach yede ayen bi the weye in which he cam.