Wycliffe Bible

Proverbs 11

Sundry observations of moral virtues, and their contrary vices (10-24).

Proverbs 11:1 A gileful balaunce is abhominacioun anentis God; and an euene weiyte is his wille. Proverbs 11:2 Where pride is, there also dispising schal be; but where meeknesse is, there also is wisdom. Proverbs 11:3 The simplenesse of iust men schal dresse hem; and the disseyuyng of weiward men schal destrie hem. Proverbs 11:4 Richessis schulen not profite in the dai of veniaunce; but riytfulnesse schal delyuere fro deth. Proverbs 11:5 The riytfulnesse of a simple man schal dresse his weie; and a wickid man schal falle in his wickidnesse. Proverbs 11:6 The riytfulnesse of riytful men schal delyuere hem; and wickid men schulen be takun in her aspiyngis. Proverbs 11:7 Whanne a wickid man is deed, noon hope schal be ferther; and abidyng of bisy men schal perische. Proverbs 11:8 A iust man is delyuered from angwisch; and a wickid man schal be youun for hym. Proverbs 11:9 A feynere bi mouth disseyueth his freend; but iust men schulen be deliuered bi kunnyng. Proverbs 11:10 A citee schal be enhaunsid in the goodis of iust men; and preysyng schal be in the perdicioun of wickid men. Proverbs 11:11 A citee schal be enhaunsid bi blessing of iust men; and it schal be distried bi the mouth of wickid men. Proverbs 11:12 He that dispisith his freend, is nedi in herte; but a prudent man schal be stille. Proverbs 11:13 He that goith gilefuli, schewith priuetees; but he that is feithful, helith the priuetee of a freend. Proverbs 11:14 Where a gouernour is not, the puple schal falle; but helthe of the puple is, where ben many counsels. Proverbs 11:15 He that makith feith for a straunger, schal be turmentid with yuel; but he that eschewith snaris, schal be sikur. Proverbs 11:16 A graciouse womman schal fynde glorie; and stronge men schulen haue richessis. Proverbs 11:17 A merciful man doith wel to his soule; but he that is cruel, castith awei, yhe, kynnesmen. Proverbs 11:18 A wickid man makith vnstable werk; but feithful mede is to hym, that sowith riytfulnesse. Proverbs 11:19 Merci schal make redi lijf; and the suyng of yuels schal make redi deth. Proverbs 11:20 A schrewid herte is abhomynable to the Lord; and his wille is in hem, that goen symply. Proverbs 11:21 Thouy hond be in the hond, an yuel man schal not be innocent; but the seed of iust men schal be sauyd. Proverbs 11:22 A goldun sercle, ether ryng, in the nose thrillis of a sowe, a womman fair and fool. Proverbs 11:23 The desir of iust men is al good; abiding of wickid men is woodnesse. Proverbs 11:24 Sum men departen her owne thingis, and ben maad richere; other men rauyschen thingis, that ben not hern, and ben euere in nedynesse. Proverbs 11:25 A soule that blessith, schal be maad fat; and he that fillith, schal be fillid also. Proverbs 11:26 He that hidith wheete in tyme, schal be cursid among the puplis; but blessyng schal come on the heed of silleris. Proverbs 11:27 Wel he risith eerli, that sekith good thingis; but he that is a serchere of yuels, schal be oppressid of tho. Proverbs 11:28 He that tristith in hise richessis, schal falle; but iust men schulen buriowne as a greene leef. Proverbs 11:29 He that disturblith his hows, schal haue wyndis in possessioun; and he that is a fool, schal serue a wijs man. Proverbs 11:30 The fruyt of a riytful man is the tre of lijf; and he that takith soulis, is a wijs man. Proverbs 11:31 If a iust man receyueth in erthe, how miche more an vnfeithful man, and synnere.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!