Wycliffe Bible

Proverbs 17

Sundry observations of moral virtues, and their contrary vices (10-24).

Proverbs 17:1 Betere is a drie mussel with ioye, than an hous ful of sacrifices with chidyng. Proverbs 17:2 A wijs seruaunt schal be lord of fonned sones; and he schal departe eritage among britheren. Proverbs 17:3 As siluer is preued bi fier, and gold is preued bi a chymnei, so the Lord preueth hertis. Proverbs 17:4 An yuel man obeieth to a wickid tunge; and a fals man obeieth to false lippis. Proverbs 17:5 He that dispisith a pore man, repreueth his maker; and he that is glad in the fallyng of another man, schal not be vnpunyschid. Proverbs 17:6 The coroun of elde men is the sones of sones; and the glorie of sones is the fadris of hem. Proverbs 17:7 Wordis wel set togidere bisemen not a fool; and a liynge lippe bicometh not a prince. Proverbs 17:8 A preciouse stoon moost acceptable is the abiding of hym that sekith; whidur euere he turneth hym silf, he vndurstondith prudentli. Proverbs 17:9 He that helith trespas, sekith frenschipis; he that rehersith bi an hiy word, departith hem, that ben knyt togidere in pees. Proverbs 17:10 A blamyng profitith more at a prudent man, than an hundryd woundis at a fool. Proverbs 17:11 Euere an yuel man sekith stryues; forsothe a cruel aungel schal be sent ayens hym. Proverbs 17:12 It spedith more to meete a femal bere, whanne the whelpis ben rauyschid, than a fool tristynge to hym silf in his foli. Proverbs 17:13 Yuel schal not go a wei fro the hous of hym, that yeldith yuels for goodis. Proverbs 17:14 He that leeueth watir, is heed of stryues; and bifor that he suffrith wrong, he forsakith dom. Proverbs 17:15 Bothe he that iustifieth a wickid man, and he that condempneth a iust man, euer ethir is abhomynable at God. Proverbs 17:16 What profitith it to a fool to haue richessis, sithen he mai not bie wisdom? He that makith his hous hiy, sekith falling; and he that eschewith to lerne, schal falle in to yuels. Proverbs 17:17 He that is a frend, loueth in al tyme; and a brother is preuyd in angwischis. Proverbs 17:18 A fonned man schal make ioie with hondis, whanne he hath bihiyt for his frend. Proverbs 17:19 He that bithenkith discordis, loueth chidingis; and he that enhaunsith his mouth, sekith fallyng. Proverbs 17:20 He that is of weiward herte, schal not fynde good; and he that turneth the tunge, schal falle in to yuel. Proverbs 17:21 A fool is borun in his schenschipe; but nether the fadir schal be glad in a fool. Proverbs 17:22 A ioiful soule makith likinge age; a sorewful spirit makith drie boonys. Proverbs 17:23 A wickid man takith yiftis fro the bosum, to mys turne the pathis of doom. Proverbs 17:24 Wisdom schyneth in the face of a prudent man; the iyen of foolis ben in the endis of erthe. Proverbs 17:25 A fonned sone is the ire of the fadir, and the sorewe of the modir that gendride hym. Proverbs 17:26 It is not good to brynge in harm to a iust man; nether to smyte the prince that demeth riytfuli. Proverbs 17:27 He that mesurith his wordis, is wijs and prudent; and a lerud man is of preciouse spirit. Proverbs 17:28 Also a foole, if he is stille, schal be gessid a wijs man; and, if he pressith togidre hise lippis, he schal be gessid an vndurstondynge man.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!