Sundry observations of moral virtues, and their contrary vices (10-24).
Proverbs 19:1 Betere is a pore man, that goith in his simplenesse, than a riche man bitynge hise lippis, and vnwijs. Proverbs 19:2 Where is not kunnyng of the soule, is not good; and he that is hasti, in feet hirtith. Proverbs 19:3 The foli of a man disseyueth hise steppis; and he brenneth in his soule ayens God. Proverbs 19:4 Richessis encreessen ful many freendis; forsothe also thei ben departid fro a pore man, whiche he hadde. Proverbs 19:5 A fals witnesse schal not be vnpunyschid; and he that spekith leesingis, schal not ascape. Proverbs 19:6 Many men onouren the persoone of a myyti man; and ben frendis of hym that deelith yiftis. Proverbs 19:7 The britheren of a pore man haten hym; ferthermore and the freendis yeden awei fer fro hym. He that sueth wordis oonli, schal haue no thing; Proverbs 19:8 but he that holdith stabli the mynde, loueth his soule, and the kepere of prudence schal fynde goodis. Proverbs 19:9 A fals witnesse schal not be vnpunyschid; and he that spekith leesyngis, schal perische. Proverbs 19:10 Delices bicomen not a fool; nether it bicometh a seruaunt to be lord of princes. Proverbs 19:11 The teching of a man is knowun bi pacience; and his glorie is to passe ouere wickid thingis. Proverbs 19:12 As the gnasting of a lioun, so and the ire of the king; and as deewe on eerbe, so and the gladnesse of the kyng. Proverbs 19:13 The sorewe of the fadir is a fonned sone; and roofes droppynge contynueli is a womman ful of chiding. Proverbs 19:14 Housis and richessis ben youun of fadir and modir; but a prudent wijf is youun propirli of the Lord. Proverbs 19:15 Slouth bringith in sleep; and a negligent soule schal haue hungur. Proverbs 19:16 He that kepith the comaundement of God, kepith his soule; but he that chargith not his weie, schal be slayn. Proverbs 19:17 He that hath mercy on a pore man, leeneth to the Lord; and he schal yelde his while to hym. Proverbs 19:18 Teche thi sone, and dispeire thou not; but sette thou not thi soule to the sleyng of hym. Proverbs 19:19 Forsothe he that is vnpacient, schal suffre harm; and whanne he hath rauyschid, he schal leie to anothir thing. Proverbs 19:20 Here thou counsel, and take thou doctryn; that thou be wijs in thi laste thingis. Proverbs 19:21 Many thouytis ben in the herte of a man; but the wille of the Lord schal dwelle. Proverbs 19:22 A nedi man is merciful; and betere is a pore iust man, than a man liere. Proverbs 19:23 The drede of the Lord ledith to lijf of blis; and he that dredith God schal dwelle in plentee, with outen visityng of the worste. Proverbs 19:24 A slow man hidith his hond vndur the armpit; and putteth it not to his mouth. Proverbs 19:25 Whanne a man ful of pestilence is betun, a fool schal be wisere. If thou blamist a wijs man, he schal vndurstonde techyng. Proverbs 19:26 He that turmentith the fadir, and fleeth fro the modir, schal be ful of yuel fame, and schal be cursid. Proverbs 19:27 Sone, ceesse thou not to here techyng; and knowe thou the wordis of kunnyng. Proverbs 19:28 A wickid witnesse scorneth doom; and the mouth of vnpitouse men deuourith wickidnesse. Proverbs 19:29 Domes ben maad redi to scorneris; and hameris smytynge ben maad redi to the bodies of foolis.