Sundry observations of moral virtues, and their contrary vices (10-24).
Proverbs 20:1 Wiyn is a letcherouse thing and drunkenesse is ful of noise; who euere delitith in these, schal not be wijs. Proverbs 20:2 As the roryng of a lioun, so and the drede of the kyng; he that territh hym to ire, synneth ayens his owne lijf. Proverbs 20:3 It is onour to a man that departith hym silf fro stryuyngis; but fonned men ben medlid with dispisyngis. Proverbs 20:4 A slow man nolde ere for coold; therfor he schal begge in somer, and me schal not yyue to hym. Proverbs 20:5 As deep watir, so counsel is in the herte of a man; but a wijs man schal drawe it out. Proverbs 20:6 Many men ben clepid merciful; but who schal fynde a feithful man? Proverbs 20:7 Forsothe a iust man that goith in his simplenesse, schal leeue blessid sones aftir hym. Proverbs 20:8 A king that sittith in the seete of doom, distrieth al yuel bi his lokyng. Proverbs 20:9 Who may seie, Myn herte is clene; Y am clene of synne? Proverbs 20:10 A weiyte and a weiyte, a mesure and a mesure, euer eithir is abhomynable at God. Proverbs 20:11 A child is vndurstondun bi hise studies, yf his werkis ben riytful and cleene. Proverbs 20:12 An eere heringe, and an iye seynge, God made euere eithir. Proverbs 20:13 Nyle thou loue sleep, lest nedynesse oppresse thee; opene thin iyen, and be thou fillid with looues. Proverbs 20:14 Ech biere seith, It is yuel, it is yuel; and whanne he hath go awey, thanne he schal haue glorie. Proverbs 20:15 Gold, and the multitude of iemmes, and a preciouse vessel, ben the lippis of kunnyng. Proverbs 20:16 Take thou awei the cloth of hym, that was borewe of an othere man; and for straungeris take thou awei a wed fro hym. Proverbs 20:17 The breed of a leesing is sweet to a man; and aftirward his mouth schal be fillid with rikenyng. Proverbs 20:18 Thouytis ben maad strong bi counselis; and bateils schulen be tretid bi gouernals. Proverbs 20:19 Be thou not medlid with him that schewith pryuetees, and goith gylefulli, and alargith hise lippis. Proverbs 20:20 The liyt of hym that cursith his fadir and modir, schal be quenchid in the myddis of derknessis. Proverbs 20:21 Eritage to which me haastith in the bigynnyng, schal wante blessing in the laste tyme. Proverbs 20:22 Seie thou not, Y schal yelde yuel for yuel; abide thou the Lord, and he schal delyuere thee. Proverbs 20:23 Abhomynacioun at God is weiyte and weiyte; a gileful balaunce is not good. Proverbs 20:24 The steppis of man ben dressid of the Lord; who forsothe of men mai vndurstonde his weie? Proverbs 20:25 Falling of man is to make auow to seyntis, and aftirward to withdrawe the vowis. Proverbs 20:26 A wijs kyng scaterith wickid men; and bowith a bouwe of victorie ouer hem. Proverbs 20:27 The lanterne of the Lord is the spirit of man, that sekith out alle the priuetees of the wombe. Proverbs 20:28 Merci and treuthe kepen a kyng; and his trone is maad strong bi mekenesse. Proverbs 20:29 The ful out ioiyng of yonge men is the strengthe of hem; and the dignyte of elde men is hoornesse. Proverbs 20:30 The wannesse of wounde schal wipe aweie yuels, and woundis in the priuyere thingis of the wombe.