Solomon persuadeth to a sincere and kind familiarity with wisdom.
Proverbs 7:1 Mi sone, kepe thou my wordis; and kepe myn heestis to thee. Sone, onoure thou the Lord, and thou schalt be myyti; but outakun hym drede thou not an alien. Proverbs 7:2 Kepe thou myn heestis, and thou schalt lyue; and my lawe as the appil of thin iyen. Proverbs 7:3 Bynde thou it in thi fyngris; write thou it in the tablis of thin herte. Proverbs 7:4 Seie thou to wisdom, Thou art my sistir; and clepe thou prudence thi frendesse. Proverbs 7:5 That it kepe thee fro a straunge womman; and fro an alien womman, that makith hir wordis swete.
In an example of his own experience,
Proverbs 7:6 For whi fro the wyndow of myn hous bi the latijs Y bihelde; Proverbs 7:7 and Y se litle children. I biholde a yong man coward, Proverbs 7:8 that passith bi the stretis, bisidis the corner; and he Proverbs 7:9 goith niy the weie of hir hous in derk tyme, whanne the dai drawith to niyt, in the derknessis and myst of the nyyt.
he sheweth the cunning of a whore,
Proverbs 7:10 And lo! a womman, maad redi with ournement of an hoore to disseyue soulis, meetith hym, and sche is a ianglere, and goynge about, Proverbs 7:11 and vnpacient of reste, and mai not stonde in the hous with hir feet; Proverbs 7:12 and now without forth, now in stretis, now bisidis corneris sche aspieth. Proverbs 7:13 And sche takith, and kissith the yong man; and flaterith with wowynge cheer, and seith, Proverbs 7:14 Y ouyte sacrifices for heelthe; to dai Y haue yolde my vowis. Proverbs 7:15 Therfor Y yede out in to thi meetyng, and Y desiride to se thee; and Y haue founde thee. Proverbs 7:16 Y haue maad my bed with coordis, Y haue arayed with tapetis peyntid of Egipt; Proverbs 7:17 Y haue bispreynt my bed with myrre, and aloes, and canel. Proverbs 7:18 Come thou, be we fillid with tetis, and vse we collyngis that ben coueitid; til the dai bigynne to be cleer. Proverbs 7:19 For myn hosebonde is not in his hows; he is goon a ful long weie. Proverbs 7:20 He took with hym a bagge of money; he schal turne ayen in to his hous in the dai of ful moone. Proverbs 7:21 Sche boonde hym with many wordis; and sche drow forth hym with flateryngis of lippis.
and the desperate simplicity of a young wanton.
Proverbs 7:22 Anoon he as an oxe led to slayn sacrifice sueth hir, and as a ioli lomb and vnkunnynge; and the fool woot not, that he is drawun to bondys, Proverbs 7:23 til an arowe perse his mawe. As if a brid hastith to the snare; and woot not, that it is don of the perel of his lijf.
He dehorteth from such wickedness.
Proverbs 7:24 Now therfor, my sone, here thou me; and perseyue the wordis of my mouth. Proverbs 7:25 Lest thi soule be drawun awei in the weies of hir; nether be thou disseyued in the pathis of hir. Proverbs 7:26 For sche castide doun many woundid men; and alle strongeste men weren slayn of hir. Proverbs 7:27 The weies of helle is hir hous; and persen in to ynnere thingis of deeth.