Wycliffe Bible

Psalms 40

The benefit of confidence in God.

Psalms 40:1 {The title of the nyne and threttithe salm. For victorie, the song of Dauid.} Y abidynge abood the Lord; and he yaf tent to me. Psalms 40:2 And he herde my preieris; and he ledde out me fro the lake of wretchidnesse, and fro the filthe of draft. And he ordeynede my feet on a stoon; and he dresside my goyngis. Psalms 40:3 And he sente in to my mouth a newe song; a song to oure God. Many men schulen se, and schulen drede; and schulen haue hope in the Lord. Psalms 40:4 Blessid is the man, of whom the name of the Lord is his hope; and he bihelde not in to vanitees, and in to false woodnesses. Psalms 40:5 Mi Lord God, thou hast maad thi merueils manye; and in thi thouytis noon is, that is lijk thee. I teld, and Y spak; and thei ben multiplied aboue noumbre.

Obedience is the best sacrifice.

Psalms 40:6 Thou noldist sacrifice and offryng; but thou madist perfitli eeris to me. Thou axidist not brent sacrifice, and sacrifice for synne; Psalms 40:7 thanne Y seide, Lo! Y come. In the heed of the book it is writun of me, Psalms 40:8 that Y schulde do thi wille; my God, Y wolde; and thi lawe in the myddis of myn herte. Psalms 40:9 I telde thi riytfulnesse in a greet chirche; lo! Y schal not refreine my lippis, Lord, thou wistist. Psalms 40:10 I hidde not thi riytfulnesse in myn herte; Y seide thi treuthe and thin helthe. I hidde not thi mercy and thi treuthe; fro a myche counsel.

The sense of David's evils inflameth his prayer.

Psalms 40:11 But thou, Lord, make not fer thi merciful doyngis fro me; thi mercy and treuthe euere token me vp. Psalms 40:12 For whi yuels, of whiche is no noumbre, cumpassiden me; my wickidnessis token me, and y myyte not, that Y schulde se. Tho ben multiplied aboue the heeris of myn heed; and myn herte forsook me. Psalms 40:13 Lord, plese it to thee, that thou delyuere me; Lord, biholde thou to helpe me. Psalms 40:14 Be thei schent, and aschamed togidere; that seken my lijf, to take awei it. Be thei turned abac, and be thei schamed; that wolen yuels to me. Psalms 40:15 Bere thei her confusioun anoon; that seien to me, Wel! wel! that is, in scorn. Psalms 40:16 Alle men that seken thee, be fulli ioyful, and be glad on thee; and seie thei, that louen thin helthe, The Lord be magnyfied euere. Psalms 40:17 Forsothe Y am a beggere and pore; the Lord is bisi of me. Thou arte myn helpere and my defendere; my God, tarie thou not.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!