Wycliffe Bible

Psalms 68

A prayer at the removing of the Ark.

Psalms 68:1 {The titil of the seuene and sixtithe salm. To the victorie, the salm of the song of Dauid.} God rise vp, and hise enemyes be scaterid; and thei that haten hym fle fro his face. Psalms 68:2 As smoke failith, faile thei; as wax fletith fro the face of fier, so perische synneris fro the face of God. Psalms 68:3 And iust men eete, and make fulli ioye in the siyt of God; and delite thei in gladnesse.

An exhortation to praise God for his mercies,

Psalms 68:4 Synge ye to God, seie ye salm to his name; make ye weie to hym, that stieth on the goyng doun, the Lord is name to hym. Make ye fulli ioye in his siyt, enemyes schulen be disturblid fro the face of hym, Psalms 68:5 which is the fadir of fadirles and modirles children; and the iuge of widewis. Psalms 68:6 God is in his hooli place; God that makith men of o wille to dwelle in the hous. Which leedith out bi strengthe hem that ben boundun; in lijk maner hem that maken scharp, that dwellen in sepulcris.

for his care of the Church,

Psalms 68:7 God, whanne thou yedist out in the siyt of thi puple; whanne thou passidist forth in the desert. Psalms 68:8 The erthe was moued, for heuenes droppiden doun fro the face of God of Synay; fro the face of God of Israel. Psalms 68:9 God, thou schalt departe wilful reyn to thin eritage, and it was sijk; but thou madist it parfit. Psalms 68:10 Thi beestis schulen dwelle therynne; God, thou hast maad redi in thi swetnesse to the pore man. Psalms 68:11 The Lord schal yyue a word; to hem that prechen the gospel with myche vertu. Psalms 68:12 The kyngis of vertues ben maad loued of the derlyng; and to the fairnesse of the hous to departe spuylis. Psalms 68:13 If ye slepen among the myddil of eritagis, the fetheris of the culuer ben of siluer; and the hyndrere thingis of the bak therof ben in the shynyng of gold. Psalms 68:14 While the king of heuene demeth kyngis theronne, thei schulen be maad whitter then snow in Selmon; Psalms 68:15 the hille of God is a fat hille. The cruddid hil is a fat hil; Psalms 68:16 wherto bileuen ye falsli, cruddid hillis? The hil in which it plesith wel God to dwelle ther ynne; for the Lord schal dwelle in to the ende. Psalms 68:17 The chare of God is manyfoold with ten thousynde, a thousynde of hem that ben glad; the Lord was in hem, in Syna, in the hooli. Psalms 68:18 Thou stiedist an hiy, thou tokist caitiftee; thou resseyuedist yiftis among men. For whi thou tokist hem that bileueden not; for to dwelle in the Lord God.

for his great works.

Psalms 68:19 Blessid be the Lord ech dai; the God of oure heelthis schal make an eesie wei to vs. Psalms 68:20 Oure God is God to make men saaf; and outgoyng fro deeth is of the Lord God. Psalms 68:21 Netheles God schal breke the heedis of hise enemyes; the cop of the heere of hem that goen in her trespassis. Psalms 68:22 The Lord seide, Y schal turne fro Basan; Y schal turne in to the depthe of the see. Psalms 68:23 That thi foot be deppid in blood; the tunge of thi doggis be dippid in blood of the enemyes of hym. Psalms 68:24 God, thei sien thi goyngis yn; the goyngis yn of my God, of my king, which is in the hooli. Psalms 68:25 Prynces ioyned with syngeris camen bifore; in the myddil of yonge dameselis syngynge in tympans. Psalms 68:26 In chirchis blesse ye God; blesse ye the Lord fro the wellis of Israel. Psalms 68:27 There Beniamyn, a yonge man; in the rauyschyng of mynde. The princis of Juda weren the duykis of hem; the princis of Zabulon, the princis of Neptalym. Psalms 68:28 God, comaunde thou to thi vertu; God, conferme thou this thing, which thou hast wrouyt in vs. Psalms 68:29 Fro thi temple, which is in Jerusalem; kyngis schulen offre yiftis to thee. Psalms 68:30 Blame thou the wielde beestis of the reheed, the gaderyng togidere of bolis is among the kien of puplis; that thei exclude hem that ben preuyd bi siluer. Distrie thou folkis that wolen batels, Psalms 68:31 legatis schulen come fro Egipt; Ethiopie schal come bifore the hondis therof to God. Psalms 68:32 Rewmes of the erthe, synge ye to God; seie ye salm to the Lord. Psalms 68:33 Singe ye to God; that stiede on the heuene of heuene at the eest. Lo! he schal yyue to his vois the vois of vertu, Psalms 68:34 yyue ye glorie to God on Israel; his greet doyng and his vertu is in the cloudis. Psalms 68:35 God is wondirful in hise seyntis; God of Israel, he schal yyue vertu, and strengthe to his puple; blessid be God.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!

 

Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
!
Apple iBookstore
Apple iPad/iPhone/iPod
!
Barnes & Noble Nook
Barnes & Noble Nook
!