A new heaven and a new earth.
Revelation 21:1 And Y sai newe heuene and newe erthe; for the firste heuene and the firste erthe wenten awei, and the see is not now. Revelation 21:2 And Y Joon say the hooli citee Jerusalem, newe, comynge doun fro heuene, maad redi of God, as a wijf ourned to hir hosebonde. Revelation 21:3 And Y herde a greet vois fro the trone, seiynge, Lo! the tabernacle of God is with men, and he schal dwelle with hem; and thei schulen be his puple, and he God with hem schal be her God. Revelation 21:4 And God schal wipe awei ech teer fro the iyen of hem; and deth schal no more be, nether mornyng, nether criyng, nether sorewe schal be ouer; whiche firste thingis wenten awei. Revelation 21:5 And he seide, that sat in the trone, Lo! Y make alle thingis newe. And he seide to me, Write thou, for these wordis ben moost feithful and trewe. Revelation 21:6 And he seide to me, It is don; I am alpha and oo, the bigynnyng and ende. Y schal yyue freli of the welle of quic watir to hym that thirsteth. Revelation 21:7 He that schal ouercome, schal welde these things; and Y schal be God to hym, and he schal be sone to me. Revelation 21:8 But to ferdful men, and vnbileueful, and cursid, and manquelleris, and fornycatouris, and to witchis, and worschiperis of idols, and to alle lieris, the part of hem shal be in the pool brennynge with fier and brymstoon, that is the secounde deth. Revelation 21:9 And oon cam of the seuene aungels, hauynge violis fulle of seuene the laste veniauncis. And he spak with me, and seide, Come thou, and Y schal schewe to thee the spousesse, the wijf of the lomb.
The heavenly Jerusalem, with a full description thereof.
Revelation 21:10 And he took me vp in spirit in to a greet hille and hiy; and he schewide to me the hooli citee Jerusalem, comynge doun fro heuene of God, Revelation 21:11 hauynge the clerete of God; and the liyt of it lijk a preciouse stoon, as the stoon iaspis, as cristal. Revelation 21:12 And it hadde a walle greet and hiy, hauynge twelue yatis, and in the yatis of it twelue aungels, and names writun in, that ben the names of twelue lynagis of the sones of Israel; fro the east thre yatis, Revelation 21:13 and fro the north thre yatis, and fro the south thre yatis, and fro the west thre yatis. Revelation 21:14 And the wal of the citee hadde twelue foundementis, and in hem the twelue names of twelue apostlis, and of the lomb. Revelation 21:15 And he that spak with me, hadde a goldun mesure of a rehed, that he schulde mete the citee, and the yatis of it, and the wal. Revelation 21:16 And the citee was set in square; and the lengthe of it is so miche, as miche as is the breede. And he mat the citee with the rehed, bi furlongis twelue thousyndis. And the heiythe, and the lengthe and breede of it, ben euene. Revelation 21:17 And he mat the wallis of it, of an hundrid and foure and fourti cubitis, bi mesure of man, that is, of an aungel. Revelation 21:18 And the bildyng of the wal therof was of the stoon iaspis. And the citee it silf was clene gold, lijk clene glas. Revelation 21:19 And the foundementis of the wal of the citee weren ourned with al preciouse stoon. The firste foundement, iaspis; the secounde, safiris; the thridde, calcedonyus; the fourthe, smaragdus; Revelation 21:20 the fyuethe, sardony; the sixte, sardius; the seuenthe, crisolitus; the eiytthe, berillus; the nynthe, topacius; the tenthe, crisopassus; the eleuenthe, iacinctus; the tweluethe, ametistus. Revelation 21:21 And twelue yatis ben twelue margaritis, bi ech; and ech yate was of ech margarete. And the stretis of the citee weren clene gold, as of glas ful schynynge. Revelation 21:22 And Y say no temple in it, for the Lord God almyyti and the lomb, is temple of it.
She neededth no sun, the glory of God is her light.
Revelation 21:23 And the citee hath no nede of sunne, nethir moone, that thei schyne in it; for the clerete of God schal liytne it; and the lomb is the lanterne of it.
The kings of the earth bring their riches unto her.
Revelation 21:24 And folkis schulen walke in liyt of it; and the kyngis of the erthe schulen brynge her glorie and onour in to it. Revelation 21:25 And the yatis of it schulen not be closid bi dai; and niyt schal not be there. Revelation 21:26 And thei schulen brynge the glorie and onour of folkis in to it. Revelation 21:27 Nether ony man defoulid, and doynge abhominacioun and leesyng, schal entre in to it; but thei that ben writun in the book of lijf and of the lomb.