Romans 14:1 But take ye a sijk man in bileue, not in demyngis of thouytis. Romans 14:2 For another man leueth, that he mai ete alle thingis; but he that is sijk, ete wortis.
Men may not contemn nor condemn one the other for things different:
Romans 14:3 He that etith, dispise not hym that etith not; and he that etith not, deme not hym that etith. For God hath take him to hym. Romans 14:4 Who art thou, that demest anothris seruaunt? To his lord he stondith, or fallith fro hym. But he schal stonde; for the Lord is myyti to make hym parfit. Romans 14:5 For whi oon demeth a day bitwixe a dai, another demeth ech dai. Romans 14:6 Ech man encrees in his wit. He that vnderstondith the dai, vnderstondith to the Lord. And he that etith, etith to the Lord, for he doith thankyngis to God. And he that etith not, etith not to the Lord, and doith thankyngis to God. Romans 14:7 For no man of vs lyueth to hymsilf, and no man dieth to hymself. Romans 14:8 For whether we lyuen, we lyuen to the Lord; and whethir we dien, we dien to the Lord. Therfor whethir we lyuen or dien, we ben of the Lord. Romans 14:9 For whi for this thing Crist was deed, and roos ayen, that he be Lord bothe of quyke and of deed men. Romans 14:10 But what demest thou thi brothir? or whi dispisist thou thi brothir? for alle we schulen stonde bifore the trone of Crist. Romans 14:11 For it is writun, Y lyue, seith the Lord, for to me ech kne schal be bowid, and ech tunge schal knouleche to God. Romans 14:12 Therfor ech of vs schal yelde resoun to God for hym silf.
but take heed that they give no offence in them:
Romans 14:13 Therfor no more deme we ech other; but more deme ye this thing, that ye putte not hirtyng, or sclaundre, to a brothir. Romans 14:14 I woot and triste in the Lord Jhesu, that no thing is vnclene bi hym, no but to him that demeth ony thing to be vnclene, to him it is vnclene.
for that the apostle proveth unlawful by many reasons.
Romans 14:15 And if thi brother be maad sori in conscience for mete, now thou walkist not aftir charite. Nyle thou thorouy thi mete lese hym, for whom Crist diede. Romans 14:16 Therfor be not oure good thing blasfemed. Romans 14:17 For whi the rewme of God is not mete and drynk, but riytwisnesse and pees and ioye in the Hooli Goost. Romans 14:18 And he that in this thing serueth Crist, plesith God, and is proued to men. Romans 14:19 Therfor sue we tho thingis that ben of pees, and kepe we togidere tho thingis that ben of edificacioun. Romans 14:20 Nyle thou for mete distrie the werk of God. For alle thingis ben clene, but it is yuel to the man that etith bi offendyng. Romans 14:21 It is good to not ete fleisch, and to not drynke wyn, nethir in what thing thi brother offendith, or is sclaundrid, or is maad sijk. Romans 14:22 Thou hast feith anentis thi silf, haue thou bifore God. Blessid is he that demeth not hym silf in that thing that he preueth. Romans 14:23 For he that demeth, is dampned, if he etith; for it is not of feith. And al thing that is not of feith, is synne.