For what end Titus was left in Crete.
Titus 1:1 Poul, the seruaunt of God, and apostle of Jhesu Crist, bi the feith of the chosun of God, and bi the knowing of the treuthe, Titus 1:2 whiche is aftir pitee, in to the hope of euerlastinge lijf, which lijf God that lieth not, bihiyte bifore tymes of the world; Titus 1:3 but he hath schewid in hise tymes his word in preching, that is bitakun to me bi the comaundement of God oure sauyour, Titus 1:4 to Tite, most dereworthe sone bi the comyn feith, grace and pees of God the fadir, and of Crist Jhesu, oure sauyour. Titus 1:5 For cause of this thing Y lefte thee at Crete, that thou amende tho thingis that failen, and ordeyne preestis bi citees, as also Y disposide to thee.
How they that are to be chosen ministers ought to be qualified.
Titus 1:6 If ony man is withoute cryme, an hosebonde of o wijf, and hath feithful sones, not in accusacioun of letcherie, or not suget. Titus 1:7 For it bihoueth a bischop to be without cryme, a dispendour of God, not proud, not wrathful, not drunkelew, not smytere, not coueytouse of foul wynnyng; Titus 1:8 but holdinge hospitalite, benygne, prudent, sobre, iust, Titus 1:9 hooli, contynent, takinge that trewe word, that is aftir doctryn; that he be miyti to amoneste in hoolsum techyng, and to repreue hem that ayenseien. Titus 1:10 For ther ben many vnobedient, and veyn spekeris, and disseyueris, moost thei that ben of circumcisyoun,
The mouths of evil teachers to be stopped:
Titus 1:11 whiche it bihoueth to be repreued; whiche subuerten alle housis, techinge whiche thingis it bihoueth not, for the loue of foul wynnyng.
and what manner of men they be.
Titus 1:12 And oon of hem, her propre profete, seide, Men of Crete ben euere more lyeris, yuele beestis, of slowe wombe. Titus 1:13 This witnessyng is trewe. For what cause blame hem sore, that thei be hool in feith, Titus 1:14 not yyuynge tent to fablis of Jewis, and to maundementis of men, that turnen awei hem fro treuthe. Titus 1:15 And alle thingis ben clene to clene men; but to vnclene men and to vnfeithful no thing is clene, for the soule and conscience of hem ben maad vnclene. Titus 1:16 Thei knoulechen that thei knowen God, but bi dedis thei denyen; whanne thei ben abhominable, and vnbileueful, and repreuable to al good werk.