Directions given unto Titus both for his doctrine and life.
Titus 2:1 But speke thou tho thingis that bisemen hoolsum teching; Titus 2:2 that elde men be sobre, chast, prudent, hool in feith, in loue, and pacience; Titus 2:3 also olde wymmen in hooli abite, not sclaundereris, not seruynge myche to wyn, wel techynge, that thei teche prudence. Titus 2:4 Moneste thou yonge wymmen, that thei loue here hosebondis, that thei loue her children; Titus 2:5 and that thei be prudent, chast, sobre, hauynge cure of the hous, benygne, suget to her hosebondis, that the word of God be not blasfemyd. Titus 2:6 Also moneste thou yonge men, that thei be sobre. Titus 2:7 In alle thingis yyue thi silf ensaumple of good werkis, in teching, in hoolnesse, in sadnesse. Titus 2:8 An hoolsum word, and vnrepreuable; that he that is of the contrarie side, be aschamed, hauynge noon yuel thing to seie of you.
Of the duty of servants, and in general of all Christians.
Titus 2:9 Moneste thou seruauntis to be suget to her lordis; in alle thingis plesinge, not ayenseiynge, not defraudynge, Titus 2:10 but in alle thingis schewinge good feith, that thei onoure in alle thingis the doctryn of God, oure sauyour. Titus 2:11 For the grace of God, oure sauyour, hath apperid to alle men, Titus 2:12 and tauyte vs, that we forsake wickidnesse, and worldli desyris, lyue sobreli, and iustli, and piteuousli in this world, Titus 2:13 abidinge the blessid hope and the comyng of the glorie of the greet God, and of oure sauyour Jhesu Crist; Titus 2:14 that yaf hym silf for vs, to ayenbie vs fro al wickidnesse, and make clene to hym silf a puple acceptable, and suere of good werkis. Titus 2:15 Speke thou these thingis, and moneste thou, and repreue thou with al comaundement; no man dispise thee.